Yona 1 - Ibayibuli Ingwalaafu

Yona amiinyaalila shilakilo sh'Omukasya

¹ Shifukhu shitweela Umukasya waakanikha isi Yona, umwaana wa Amitayi, nga amulomela ari,

² “Yinyukha utsye i Nineve, shiriimba shikhulu isho. Utsye wikiitse babaandu baamwo uri bubwoonaki bwaabwe bwaabiririire naabi, ni nase noolile khuubumanya.”

³ Ne Yona waakhalawo khuutitukha khu Umukasya, wahaamba kumukhoosi kukuutsya i Tarushishi. Aryo waatsya i Yopa, isi aanyoola imeeri abe ili khuutsya i Tarushishi. Nga waamalile khuuwaanda kamapeesa ke lukyeendo, wekaamamwo atweela ni babaandu babaandi, waaselengela waatsya, nio anyale khuuba aleeyi n'Umukasya.

⁴ Ne Umukasya waasiindikha ikhuungu iye kamaani, aabawo khuuwuutsa khuukali naabi khu nyaantsa, ni meeri yaaba nga itsya khufunikhakamwo.

⁵ Ni naabo babaaba mu meeri baarya naabi, kila buli mutweela arakikha khuulilila wele weewe. Baryo boola ni khutuumaka ni bisutwa byaabwe mu nyaantsa bari nio banguyisekho busiro bwe meeri. Khu mbuka yino yoosi, Yona aba nga wekhile mu khaseenge khe aasi mu meeri, nga alikho akona liilo.

⁶ Umukhulu we meeri waamutsyayo, waamulomela ari, “Iwe wakoneelo, unyala uryeena waaba nga uli khuukona khu mbuka ifwaana nga iyi? Yinyukha nawe wilootsele wele woowo. Winyoola manya lukanile anyala wakhuwaambila shiisa khwalekha khuhela ta.”

⁷ Lwanyuma lwa byoosi, abo babaaba mu meeri beetsa atweela baaloma bari, “Lekha ari khuupe bukokha, nio manya khufuumbule naanu uuli khuukila bukosi buno bukhwoolilekho.” Baryo baakhupa bukokha, ni khaakokha khaakwa khu Yona.

⁸ Shiikila bareeba Yona bari, “Ari n'ukhuboolele, iwe niye ukilile bukosi buno bukhwoolilekho? Iwe ukhola mulimo shiina? Iwe waama waheena? Linaambo lyoowo, nilyo linaambo shiina? Iwe waama mu baandu shiina?”

⁹ Yona naye waabeelamo ari, “Ise ndi umu Heburaniya, naluundi nisaaya Umukasya Wele we likulu, niye uwakhola inyaantsa ni shibala she lulwoomu.”

¹⁰ Basaani be mu meeri ni baawulila bino, baaba ni khuurya khuukali naabi, kila bamureeba bari, “Lwashiina iwe ukholile shishiindu nga shino?” Shino baashiloma lwekhuuba Yona aaba waababooleele ari abe ali khuutitukha khu Mukasya.

¹¹ Ikhuungu yeloosela khuwuutsa ni kamaani naabi. Shino shaakila basaani be mu meeri bareeba Yona bari, “Ifwe ari khukhukhole khuryeena nio inyaantsa ikwalaale?”

¹² Yona waabeelamo ari, “Niimusute ise, muunduume mu nyaantsa, nayo kane iwoleele. Naamanyile ndi ise niye ukilile ikhuungu yino iboolilekho iri.”

¹³ Abo babaaba batimisa imeeri baakhakakho naabi nga ni banyala khuubona bari boola khu lwoomu. Ne baalekha khunyalisa ta, lwekhuuba ikhuungu yaba yiloosela busa buli mbuka, bakhaasikha.

¹⁴ Shikila balilila Umukasya nga baloma bari, “O Umukasya, ukhakila ifwe khwaahela lwe khukhwiira umusaani yuno ta. Bino byoosi bikholikhile, lwekhuuba wamweene waashisiimile uryo.”

¹⁵ Kila basuta Yona, baamutuuma mu nyaantsa. Lubaluba, inyaantsa yaakwalaala.

¹⁶ Shino shaakila basaani babaatimisa imeeri baarya Umukasya. Baryo bawaanayo tsisaayilo isi Umukasya, baakhola ni bibitsubo bye khuumwakaanisatsaka, bye tsisaambo tsitsikhali ndweela.

¹⁷ Umukasya abe waarekekhile kunyeeni kuboofu khuumila Yona, ni Yona aryo waamala muunda mwakwo biifukhu bitaru ni biilo nabyo bitaru.