Yeremiya 1 - Ibayibuli Ingwalaafu

¹ Bino bili bilomo bya Yeremiya, umusooleli wa Hilukiya, uwaba mutweela khu basaayi babaaba i Anasosi, mu shibala sha Benyamini.

² Ilomo ya Wele yeetsa is'ali mu mwiiko kwe likhumi na kitaru, kwe buwuli bwa Yosiya, umusooleli wa Amoni, nga niye umuyiinga wa Yuda.

³ Naluundi Ilomo yino yeloosela khukhwiitsa ni mu buwuli bwa Yehoyakimu, umusooleli wa Yosiya, naye nga niye umuyiinga wa Yuda, khuutsya khwoolela ilala mu mweesi kukuukhola kharaano, kwe mu mwiiko kwe likhumi na mutweela kwe buwuli bwa Zedekiya, naye uwaba umusooleli wa Yosiya, khu mbuka isi aabeela umuyiinga wa Yuda. Mu mweesi kwe kharaano kuno yaba niyo imbuka isi babaandu be mu Yerusalemu baayilibwila mu bubowe.

Khuulaangibwa khwa Yeremiya

⁴ Ilomo y'Omukasya yeetsa isiindi nga iloma iri,

⁵ Ise ni naba nga ishiili khukhubuumba iwe muunda mwa maayi woowo ta, naba nga naakhumanya khaale, iwe niwaba nga ushiili khusaalikhana ta, ise naba naakhurobola khaale; ise nakhurawo iwe khuuba umuŋoosi isi kamanaambo.

⁶ Nio kila ise inoma ndi, “O Umukasya Wele, bona ise ishiili khumanyakho khuukanikha ta, lwekhuuba ishiili mwaana.”

⁷ Ne Umukasya waantsilamwo ari, “Iwe ukhaloma uri ushiili mwaana ta. Iwe waakha khuutsya isi ise inaba naakhurumanile khuutsya, naluundi utsye ukanikhe byeesi inaba naakhulakiile khuutsya khukanikha.

⁸ Ukharya babaandu abo ta, lwekhuuba ise ndi atweela ni nawe, naluundi kane ikhukhiinge iwe isi bali. Shino ise samweene Umukasya niye ushikanikhile.”

⁹ Lwanyuma Umukasya waatsaanuusa kumukhono kweewe waamaamba ise khu munwa kwase, waanomela ari, “Bona ari ise naareere tsilomo tsase mu khanwa mwoowo.

¹⁰ Bona shaleelo shino, ise naakhuroboore iwe khuuba umuŋoosi we kamanaambo, ni buyiinga, khukhuulaka ni khuufuniaakaka, khuuhesa ni khuufuuntsakilila, khukhwombekha ni khuubyaala.”

¹¹ Lwanyumakho kila ilomo y'Omukasya iwulilikha nga andeeba ise ari, “Yeremiya, shiina sheesi uli khuubona?” Kila nase nelamwo ndi, “Indi khuubona lusakya lwe kuusaala alumoondi.”

¹² Kila Umukasya anomela ise ari, “Waaboone buulayi, lwekhuuba ise ni mbeele indoleelela, imbone nga ilomo yase yoolelela.”

¹³ Ilomo y'Omukasya yaantsitsila kumuluundi kwe khaabili nga andeeba ise ari, “Yeremiya, waaboone shiina?” Nase nelamwo ndi, “Indikhuubona inyuungu nga itutuba, nga ili khu lubeka lwe ngaaki ne yaaloleleele kwe mwaalo.”

¹⁴ Lwanyuma Umukasya waanomela ise ari, “Khukhwaama khu lubeka lwe ngaaki, ikhaameyo buusiku, bubuukhaakwe khu baandu boosi babaamenya mu shibala.

¹⁵ Ise ndi aambi khuulaangilisa babaandu be mu bikuuka byoosi babaali mu buyiinga bwe ngaaki.” Shino Umukasya umweene niye ushikanikha. “Baryo baayiinga baabwe bakheetse bareke bitsoloŋo byaabwe mu bwinjililo bwe bilibwa bya Yerusalemu; bakheetse bebwakale kamatikiiyi kaasho koosi kakaashibotokheleele, ni khukhwibwakala biriimba byoosi bye mu shibala sha Yuda.

¹⁶ Ni nase indyo indikukuula biilomo byase bye kumusaango isi babaandu baase, lwe bubwoonaki bwaabwe bwe khukhuundekha baandura khusiise, baatsya boosha bubaani isi ba wele babaandi, naluundi baatsya besaaya bifwaani byeesi baakhola ni kamakhono kaabwe.”

¹⁷ “Ne iwe Yeremiya, yinyukha aasi, wibowe luukhoba mu shikuute shoowo, utsye uboolele babaandu bano byoosi byeesi ikhulakiile iwe. Ukhabaryakho na khafwiiti khoosi ta, ne siinga ushikhola, ise samweene kane ingile ube ni buuri buukali naabi isi bali.

¹⁸ Bona shaleelo, ise samweene naakhureerewo iwe khuuba nga shiriimba shishiilikho kuutikiiyi namaani, nga intseko iye shishuuma, naluundi nga kamatikiiyi ka buroonzi, nio unyale khukhwiimikhawo nga ukhaandisana ni shibala shoosi, nga mulimo ni bayiinga ba Yuda, ni bawuli baamwo babaandi, ni basaayi baasho, atweela ni babaandu boosi be mu shibala.

¹⁹ Bano boosi kane bakhusoolanise iwe, ne singene banyale khuukhufuura ta, lwekhuuba ise samweene indi ni nawe khuukhuwonesa isi bali.” Shino Umukasya umweene niye ushilaangilila aryo.