Yakobo 1 - Ibayibuli Ingwalaafu

¹ Ibaluwa yino yaama is'ise Yakobo, umuraambi wa Wele, nalundi w'Omukasya Yezu Kristu. Mbasheesa inywe bikuuka liikhumi na bibili, bibisalaniile mu shiibala shoosi.

Khufukiilila ni kamakhula

² Be buulebe, ni mushiyilatsake nga she kumwikhoyo kumukali naabi, buli lweesi mwakaananila bibiindu bibibakhakilisa,

³ lwekhuba mwamanya muri, khukhakilisibwa lwe khufukiilila khweenywe khureera khukhwikhaliilikha.

⁴ Ni khukhwikhaliilikha khwakha khwokesanisibwila mu buraambi, nio akile mwikyele bakhosefu babetsufu babeene, babakhekhililakho musaambo yoosi ta.

⁵ Ne noola mutweela khusiinywe s'ali ni kamakhula ta, n'aloombe Wele, ni Wele naye kane akamuwe. Wele akabila busa babaandu boosi kamakhula khulwe bubweela bweewe, nalundi nga s'ekiitsa umuundu yeesi ta.

⁶ Ne uloomba aryo, akhila khuloomba ni khufukiilila, nga s'ali ni khukhwikanakana ta. Lwekhuba umuundu uli ni khukhwikanakana afwana nga khuyeŋaana khwe kameetsi khu nyaantsa, khukhureerebwa ni mbewo.

⁷ Umuundu uyeŋaana aryo, ukhanyala wakhalawo shishiindu na shitweela ta, nalundi nga ayeŋaana mu buli sheesi akhola,

⁸ akheyikina khutuya shishiindu shoosi khukhwaama isi Umukasya ta. Aba ali ni kimyoyo kibili, nga buli mbuka ekanakana.

Butaambi ni Buyindifu

⁹ Shiba shilayi uwe buulebe umutaambi khuuba umusangaafu, nga Wele wamuniinisile angaaki.

¹⁰ N'umuyindifu naye akha khuuba umusangaafu, nga Wele wamwikhisile asi. Lwekhuba umuyindifu amenyawo imbuka njeekhe, nga shiimuli she mwiirome.

¹¹ Inyaanga n'irura, ni bukhafu bukali, yoosha bunyaasi bwooma, ni shiimuli shalakala, ni bumiliwu bwasho bwakoraana. Ni musaambo niyo ndweela, umuyindifu naye aliniala aryo, nga ali mwiibyo byeesi ayayaanila.

Khukhakibwa ni Khutsemebwa

¹² Ali ni khabi umuundu uwikhalilikha mu khukhakibwa khweewe, lwekhuba nga wakhakiwile, ne wekhalilikha wabiramo, alifuna shiwaanwa she bulamu, sheesi Wele alomela ibo babamukana.

¹³ Noola umuundu yeesi akhakibwa, akhaloma ari, “Wele niye uwusindikhiile khukhakibwa khuno” ta. Lwekhuba Wele s'akhakibwa ni shiibi ta, nalundi niye umweene s'akhakilisa umuundu yeesi ta.

¹⁴ Ne khurusakho ndi umuundu umweene, akhongelesebwa nalundi wawambikha khulwe khukhwiwotooma khweewe umweene.

¹⁵ Khukhwiwotooma khuno nga khwahesile, khusaala shishonako; ni shishonako nasho nga shatsoyile, shisaala khuufwa.

¹⁶ Nashiryo, be buulebe baase bakanwa, mukhawombelesebwa ta.

¹⁷ Buli shiwaanwa shoosi shilayi, nabuli shiwaanwa shoosi shikwalaafu, shaama mwikulu, nga shiikha khukhwaama isi Wele Paapa, uwabuumba bibyaburukhila mu ngaaki byoosi. Mu niye imbaamo khukalukhakalukha namwe shishiniini shishikalukhakalukha ta.

¹⁸ Khulwe khukana khweewe khukhweene, Wele akhubuumba ifwe, wakhurawo nga abirira mu shilomo she bwa ŋali, ari nio manya nafwe khube nga baakiboole mu bibuumbe byeewe byoosi.

Khuwulila ni Khukhola

¹⁹ Be buulebe baase bakanwa, ni mumanye shino muri, buli mundu abe uwakhangu khurekeeresa, nga emenielesa byeesi akanikha nalundi alekhe khukhwikhalalisaka khangu ta.

²⁰ Lwekhuba lirima ly'omundu shilireera bukwalaafu bwa Wele ta.

²¹ Nashiryo, ni mwisisakule bye bunyaalu byoosi, ni tsisaambo tsiimbi tsoosi, mwakaanile ni buwolu shilomo sha Wele sheesi abyaala mus'iinywe, nisho shishinyala khuwonesa kimyoyo kyeenywe.

²² Ne mwakha mwakhola byeesi shilomo sha Wele shibaboolela, nga shino shibonekhela mu buraambi bweenywe, akhali khukhwiwombesa nga mwakama khukhurekeeresa busa ta.

²³ Lwekhuba umuundu n'arekeeresa shilomo sha Wele, ne walekha khushira mu buraambi, afwana busa nga umuundu uwilolela mu ndolelo, wabona nga n'afwaana.

²⁴ Ne khangu akho n'arurawo watsya, webilila nga n'eboneele mu ndolelo, nga n'afwaana.

²⁵ Ne uyo ulondelela bulayi bubweene likaambila lya ŋali lundi liliwonesa, waliandalalilakho, nga s'ali busa urekeeresa, ne webilila ta; umuundu uyo alifuna ikhabi mwibyo byoosi byeesi akhola.

²⁶ Ne noola umuundu yeesi eyambaasa khulweewe ari ali uwe diini, n'enga s'anyala khuwula lulimi lweewe ta, aba ewombesa busa mu mwoyo kweewe umweene. Idiini y'omundu uyo iba mbaawo sheesi ilikhumuyeeta ta.

²⁷ Idiini ili iya ŋali naluundi ikhalikho likoondo mu moni tsa Wele Paapa weefwe niyo yino: khuyeeta bafuubi, ni banamulekhwa mu bihangafu byaawe, nalundi umuundu umweene khukhwiliinda alekhe khuwakhibwakho lisaanda lyoosi lye shiibi she mu shiibala ta.