Umuleekeli 1 - Ibayibuli Ingwalaafu

Buulamu imbaamo kumukaso ta

¹ Bino bili biilomo by'Omuleekeli, uwaba umuyiinga uwa Yerusalemu, nga abe ali umwaana uwa Dawudi.

² Umuleekeli yuno aloma ari, bibiindu byoosi bili bya busa, imbaamo kumukaso ta. Byoosi bili bya busa, imbaamo kumukaso ta!

³ Umuundu n'amala imbuka yeewe mu shibala shino, wakhalabana, afunamo shiina?

⁴ Kumuboolo mutweela kutsya, kukuundi kweetsa, ne biilo ni biilo shibala shirama nga ni shili.

⁵ Inyaanga irura, yaakelawo yaakwa, yeelayo luundi mu shifwo mweesi irakikhila.

⁶ Imbewo iwuutsa nga yiikha imwaalo, yaabotookha yaaniina ingaaki, yaatsya nga yibotokhelela, khukhwoolisa n'ikobola luundi.

⁷ Kameetsi ke tsiintsitsi koosi keekha mu nyaantsa, ne inyaantsa siyitsula ta; kameetsi tsana keelayo isi tsiintsitsi tsirakikhila, tsyeelamo tsyeekha luundi.

⁸ Bibiindu byoosi bikhureerera busa shiiluwo; shiiluwo she kamaani sheesi umuundu akhanyala waakanikhakho na khukanikha ta. Tsiimoni tsyaakhabona, sitsiluwa ta; kamaru kaakhawulila, sikekura ta.

⁹ Bibiindu bibyabawo khaale nibyo bibiitsya khubawo luundi; bibyakholikha khaale nibyo bibikhaakholikhe nyaanga luundi; mbaawo shishiindu shishaakha aasi e nyaanga ta.

¹⁰ Umuundu anyala waaloma ari, “Bona shishiindu shino shili shiyaakha!” Ne nga isho shabawo khaale, nga ifwe khushiili khusaalikha ta.

¹¹ Mbaawo umuundu ushebulila bibiindu bibyakholikha khaale ta, namwe s'ikhabewo khuushebulila ibyo bibikhaakholikhe lwanyuma, khus'iibo babaakhaabewo lwanyuma lweefwe ta.

Byeesi umuleekeli aabiramwo khaale

¹² Ise Umuleekeli, naba umuyiinga uwa Isiraeli nga imenya mu Yerusalemu.

¹³ Ise naraambisa kamakhula kaase koosi, khuweentsa nga ingana imanye ibyo byoosi bibikholikha mu shibala. Ne she kumutaambo indi Wele wakhola shino khuuba shihangafu naabi isi ifwe babaandu.

¹⁴ Ise naabona bibiindu byoosi bibikholikha aasi e nyaanga; ne byoosi bili busa nga n'utimisa imbewo, imbaamo kumukaso ta.

¹⁵ Isho shishaborokha, si banyala bashitsalaasa ta, ni n'esho shishikhaliwo ta, si banyala baashibala ta.

¹⁶ Ise neelomela seenyene ndi, “Ise ndi ni kamakhula kamakali naabi, khuuminyisa abo boosi babaabakho baawuli mu Yerusalemu nga ise ishiili khubawo ta. Indi ise naaboone bye kamakhula ni bye khuumanya biikali.”

¹⁷ Kila ise ikhalawo ndi inaambise kamakhula kaase imanye bye kamakhula, ni bye kamalalu, ni bye busilu. Ne nakelawo naashifumbula ndi, shili busa nga khuutimisa imbewo uri ukiwaambe.

¹⁸ Khulwekhuuba mu khumanya naabi, uba ni khukhwiyembeelela khuukali; ni n'oyo uwiloosela ni khuumanya, aloosela ni kumutaambo kweewe.