Tito 1 - Ibayibuli Ingwalaafu

¹ Ise Paulo, ndi umwakaanisi uwa Wele, nalundi ndi umurume uwa Yezu Kristu. Ise narumaniwa khukhwiloosela khusalanisa khufukiilila isi barobole ba Wele ni khubayeeta mu khumanya bwa ŋali bububoolesa mu khurya Wele.

² Shino ise ishikhola khulwe khukhwiyikina bulamu bubukhawawo ta, bweesi Wele ukhawombesa ta, akhulomela ifwe, khaale khakheene.

³ Khukhwiyikina khuno, Wele akhwokesanisila mu mbuka inyene mu shilomo sheewe, khubirira mu khulaangilila kamakhuuwa kamalayi khwesi ise ikhola, khukhwamaambisibwa ise khulwe khukhalawo khwa Wele, Umuwonesi weefwe.

⁴ Tito, ise indikho ikhuronela iwe, uli umwaana uwase ilala, mu khufukiilila khwesi khulimo fweesi, nga ikhulomela ndi, bubweela ni lukoosi bibyaama isi Paapa Wele, atweela n'umuwonesi weefwe Kristu Yezu, bibe ni nawe.

Buuraambi bwa Tito mu Kureti

⁵ Ilomo iyakila nio ise nakhulekha iwe mu Kureti yaba ndi utabusake ibyo bibyaba nga bishiili khutereera ta, nalundi ndi urobole baraangilisi mu khufukiilila mu buli shiriimba, nga ise ni nakhulomela.

⁶ Uyo yeesi iwe urobola khuuba umuraangilisi akha khuuba umusaani ukhalikho ni likoondo lyoosi ta, nalundi akha khuuba n'umukyelema mutweela yenyene. Babaana beewe baakha khuuba be tsisaambo tseesi babaandu bakhekanakana lwekhuba tsili tsye busilu ta, nalundi si baakha khuuba be bumiinyi ta.

⁷ Lwekhuba nabwayi ali umuliindi uwe kimilimo kya Wele, akha khuuba umuundu ukhalikho ni likoondo lyoosi ta. S'akhila khuuba umuundu uwiniinisa, namwe uwikhalalisaka, namwe umumeesi, namwe uwe bisaayumba, namwe uwiwuuma bibiindu khulwe kumuluungo ta.

⁸ Ne akhali ali ni khuuba umuundu umweela, ukana khukhola bibiindu bilayi, uwitsililisa naabi mu byeesi akhola, umukwalaafu, umukhosefu, nalundi uwe tsisaambo tsindayi.

⁹ Ali ni khuwandalalila khu shilomo sha Wele sha ŋali, nga ni shili, nio akile khuleekela khweewe khube khukhuulimo itsamu, nalundi nio akile anyalise khutsuntsumilisa abo babakhaandisa khuleekela khuno.

¹⁰ Khulwekhuba iliwo babaandu banabumiinyi bakali, babekhoomba busa ni kimilomo, nalundi babeeyi, ni khufuurira ilala, abo babenjila imbalu.

¹¹ Babaandu bano baakha bakamisibwa. Khulwekhuba balikho bakosaasa babaandu be mungo tsingali, nga babaleekela bibiindu byeesi bakhandyakhiile khuleekela ta. Bakhola shino khulwekhuba nibo bali n'isaambo yeesi bafunamo kamafuurisa.

¹² Umuundu mutweela khu Bakurete beene abo, uli mutweela khu baŋoosi baabwe aloma ari, “Bakurete busheele bali babeeyi, bali busa nga tsisolo, be kumuluungo naluundi baatoro.”

¹³ Sheesi niye abalomakho shino shili sha ŋali. Nashiryo uli ni khubabiiyisa ni kamaani, nio akile nabo batsowatsowane mu khufukiilila khwaabwe.

¹⁴ Ukheela khurekeeresa tsingano tsye Shiyudaaya tsye bubeeyi, namwe kamakaambila ke babaandu babakhakana bya ŋali ta.

¹⁵ Isi babaandu bakwalaafu, bibiindu byoosi bili bikwalaafu. Ne isi ibo babakhali bakwalaafu ta, babaali banyaalu nalundi babakhafukiilila ta, imbaawo shikwalaafu isi bali ta. Bibyambaaso byabwe ni kimyoyo kyaabwe byaborokha.

¹⁶ Babaandu nga babeene abo bekholisa bari barya Wele, ne buraambi bwaabwe bwokesanisa buri si baamumanya niye ta. Bali babawuraana, nalundi si barekeeresa bya Wele ta, lwekhuba mbaawo shikholwa sheesi banyala khukhola shishiili shilayi ta.