Matayo 1 - Ibayibuli Ingwalaafu

Luruungo lwe bakuuka ba Yezu

¹ Buurone bwe luruungo lwe bakuuka ba Yezu Kristu, umwitsukhulu wa Daudi, umwitsukhulu wa Ibulayimu. Khukhwaama khu Ibulayimu khukhwoola khu Daudi, luruungo nilwo luno:

² Ibulayimu asaala Isaaka, Isaaka wasaala Yakobo, Yakobo wasaala Yuda ni babandaaye.

³ Yuda wasaala Perezi ni Zela mu mukhasi Tamali, Perezi wasaala Kezironi, Kezironi wasaala Ramu,

⁴ Ramu wasaala Aminadabu, Aminadabu wasaala Nahasoni, Nahasoni wasaala Salumoni

⁵ Salumoni wasaala Bowazi mu mukhasi Rakabu, Bowazi wasaala Obedi mu mukhasi Ruse, Obedi wasaala Yese,

⁶ ni Yese naye wasaala Daudi umuyiinga. Khukhwaama khu Daudi khukhwoola khu bifukhu khweesi babaandu ba Isiraeli baawuyisibwila bayilibwa i Babuloni; luruungo nilwo luno: Daudi asaala Solomoni, mu mukhasi uwaba mukha Uriya.

⁷ Solomoni wasaala Rekobowamu, Rekobowamu wasaala Abiya, Abiya wasaala Asa,

⁸ Asa wasaala Yehosofati, Yehosofati wasaala Yolamu, Yolamu wasaala Uziya,

⁹ Uziya wasaala Yosamu, Yosamu wasaala Akazi, Akazi wasaala Kezekiya.

¹⁰ Kezekiya wasaala Manase, Manase wasaala Amoni, Amoni wasaala Yosiya.

¹¹ Yosiya wasaala Yehoniya ni babandaaye mu bifukhu byeesi bawuyisibwa khuutsya i Babuloni.

¹² Lwanyuma lwe khuwuyisibwa khuutsya i Babuloni, Yehoniya wasaala Seyaluteli, Seyaluteli wasaala Zerubabeli,

¹³ Zerubabeli wasaala Abiudi, Abiudi wasaala Eliyakimu, Eliyakimu wasaala Azoli,

¹⁴ Azoli wasaala Zadoki, Zadoki wasaala Akimu, Akimu wasaala Eliudi,

¹⁵ Eliudi wasaala Eliyazari, Eliyazari wasaala Matani, Matani wasaala Yakobo,

¹⁶ Yakobo wasaala Yozefu, uwaba umuseetsa wa Mariya, maayi wa Yezu, ulaangiwa Kristu.

¹⁷ Kiryo kimiboolo kyoosi khukhwaama khu Ibulayimu khukhwoola khu Daudi, kili liikhumi na kine. Ni khukhwaama khu Daudi khukhwoola khu khuwuyisibwila i Babuloni, kimiboolo liikhumi na kine. Ni khukhwaama nga ni baawuyisibwila i Babuloni nakyo kimiboolo liikhumi na kine, khukhwoola khu khusaalikha khwa Yezu Kristu.

Khusaalikha khwa Yezu Kristu

¹⁸ Khusaalikha khwa Yezu Kristu khwaba musaambo yino: maayi weewe Mariya n'aba nga Yozefu ashiimuselela, nga bashiili khuyilana ta, anyoolekhana nga ali shisoombo khulw'Omwoyo Umukhosefu.

¹⁹ Ne lwekhuba Yozefu umuseetsa weewe abe ali umusaani umukwalaafu, walekha khukana amuwambise kamaŋaanyu mu baandu ta, aryo kila ambaasa khumulekha mu shimoonyo busa.

²⁰ Ne n'aaba ali khukhwambaasa aryo, malayika w'Omukasya wamubonekhela mu marooro, nga amuloma ari, “Yozefu, umwitsukhulu uwa Daudi, ukharya khuyila Mariya nga umukyelema woowo ta, lwekhuba shisoombo sheesi ali nasho shili sh'Omwoyo Umukhosefu.

²¹ Alisaala umwaana umusiinde, ni nawe ulimutwiikha lisiina uri Yezu, lwekhuba niye uliwonesa babaandu beewe khukhwaama mu byonako byaawe.”

²² Bino byoosi byabawo khukhwoolelesa bibyalomewa n'Umukasya mu muŋoosi biri;

²³ “Bona, umukhaana uli indungubaasi aliba shisoombo asaale umwaana umusiinde, bamwitwiikhe lisiina bari Emmanueli,” lilimanyisa liri, “Wele ali ni nafwe.”

²⁴ Yozefu n'asiisiimukha mwiilo, wakhola sheesi malayika w'Omukasya amuloma, wayila Mariya ingo nga umukyelema weewe.

²⁵ Ne niye s'etubaasakho ni naye ta khukhwoolesa n'asaala umwaana weewe umusiinde, ni Yozefu wamutwiikha lisiina Yezu.