Filemoni 1 - Ibayibuli Ingwalaafu

¹ Burume buno bwaama isi ise Paulo, nga ndi umubowe, khulwa Kristu Yezu; nalundi bwama isi uwe buulebe, Timosewo. Khukhuronela iwe Filemoni, uli umukanwa weefwe nalundi umuraambi uwasheefwe.

² Nalundi khuburonela bafukiilisi boosi bababusana khuloombela mu ntsu yoowo, ni Apofiya umukooko weefwe, ni Alikipo umuraambi uwasheefwe.

³ Khuloomba khuri khali Wele Paapa, n'Umukasya weefwe Yezu Kristu babaweele inywe tsikhabi ni lukoosi.

Khukana ni khufukiilila khwa Filemoni

⁴ Uwe buulebe Filemoni, busheele ise n'imba nga inoomba, isiima Wele nalundi ise ikhuloombelakho iwe.

⁵ Khulwekhuba ise imbulila naabi khu biindu bibiwaamba khu khufukiilila khweesi uli ni nakhwo mu Yezu Kristu, ni khukana khweesi uli ni nakhwo isi bakhosefu ba Wele boosi.

⁶ Khuloomba khwase khuli ndi butweela bweefwe ni nawe nga babaandu babafukiilila mu Wele, khali khukhureerere ifwe fweesi ikholakana indayi iya buli ikhabi, musaambo yeesi khukananilamo atweela bulamu bweefwe mu Kristu.

⁷ Khulwekhuba uwe buulebe, khukana khwoowo khweesi uli ni nakhwo, khwandereere ise kumwikhoyo kumukali, nalundi khwantsisilemo ise kamaani. Iwe wekhoyesele kimyoyo kye bakhosefu boosi babafukiilila mu Wele.

Paulo ekontselela Filemoni khulwa Onesimo

⁸ Nashiryo khulwe lomo yino, nalundi nga uwe buulebe khulwa Kristu, nandibeele umunyindalifu naabi khukhulakila iwe khukhola shishiindu shishikaniwa.

⁹ Ne khulwekhuba ise ikhukana iwe naabi, indikho ikhwikontselela. Ikhola shino mu lisiina lya Kristu Yezu, akhaba nga ise Paulo, ari ndi umusaakhulu, nalundi ndi umubowe khulwa Kristu.

¹⁰ Nashiryo indikho ikhwikontselela khulwa Onesimo, uli umwaana uwase umweene, khulwa Yezu Kristu. Ise nekyela umusaali wa Onesimo mu bye kumwoyo nga ndi mu bubowe.

¹¹ Amataayi ako, abe s'ali uwe kumukaso isi iwe ta, ne ari ali uwe kumukaso isi iwe ni nase.

¹² Ni khukana khwase khwoosi, ari imwakaanisa khukobola isi iwe uli.

¹³ Ise nandikoombile khumenya ni naye ino, nga ndi mu bubowe khulwe khulaangilila kamakhuuwa kamalayi, nio aba umwakaanisi wase mu shifwo shoowo.

¹⁴ Ne ise shingana nakhuwanyiinya iwe khukhola bubwakaanisi ise ndi ta. Ingana wamweene ushikhole nga shaama khu bulayi bwoowo. Nashiryo ise shingana ikhole shishiindu shoosi sheesi iwe ukhafukiilisile ta.

¹⁵ Shinyala shaba shiri Onesimo akhururakho khuumala imbuka ifwiiti, ari nio akile akobole khu menya ni nawe khumala biilo ni biilo.

¹⁶ Ne ari s'ali umukulwa busa nga n'aba amataayi ta; ari afuurisakho umukulwa. Khulwekhuba ari ali uwe buulebe umukanwa mu Kristu. Ise ari andikho kumukaso kumukali naabi. Akhaba khus'iwe, kane akhubekho kumukaso kumukali naabi, khuyilila atweela nga umuundu umukulwa nalundi nga uwe buulebe mu Kristu.

¹⁷ Nashiryo, noola iwe untsambaasakho ise khuuba uwashoowo, n'umwakaanile musaambo niyo indweela nga abe niwanditsakaaniile ise.

¹⁸ Abe noola Onesimo wakhukholakho iwe shiibi shoosi, namwe iliwo sheesi umubaantsa, ibyo khayo bibe khus'ise.

¹⁹ Ise Paulo, urona ni kumukhono kwase kumweene, nga inoma indi ise ikhaakhuliyile. Ne iwe wamweene washimanya uri uliwo khulwase.

²⁰ Nashiryo, uwe buulebe, n'umambile ise shiisa khulw'Omukasya. Nga uwe buulebe uwashaase mu Kristu, n'untsisemo ise kamaani.

²¹ Ikhaba nga n'indi khurona, naamanyile ndi kane ukhole sheesi ndikho ikhuloomba. Ise naamanyile ndi kane ukhole ni bibiminyisakho byeesi ise ikhuloombile.

²² Mu mbuka niyo indweela, n'unengekhareengekhele shiseenge she khukonamo shitweela. Khulwekhuba niyikina ndi Wele kane arekeerese khuloomba khwenywe mweesi, anyalise khukhungobosa ise isi muli.

Khusheesa khumalilisi

²³ Epafura, uli umubowe uwashaase khulwa Kristu Yezu, wabasheesele.

²⁴ Ni baraambi bashaase, Mariko, Arisitaluko ni Demasi, ni Luka, nabo babasheesele.

²⁵ Khayo bubweela bw'Omukasya weefwe Yezu Kristu, bube ni nanywe mweesi.