Ezekeli 1 - Ibayibuli Ingwalaafu

Khuubonekhelwa khwa Ezekeli khukhuunyoowa

¹ Shaba khu shifukhu shishikhola kharaano, mu mweesi kukuukhola khane, mu mwiiko kwe kamakhumi kataru. Khu shifukhu isho, ise Ezekeli, umwaana uwa Buzi, abe imenya atweela ni babaandu ba Isiraeli bashaase abe babaali mu bubowe i Babulooni, nga indi aambi ni luluutsi Kebari. Likulu lyabayuukha, ise naafuna khuubonekhelwa, nga imbona Wele.

² Kuno kwaba niko kumwiiko kukuukhola kharaano khukhwaama nga umuyiinga Yehoyakini ni aayilibwa mu bubowe i Babulooni. Khu shifukhu sheene isho shishiikhola kharaano she kumweesi ukwo,

³ nga ise umusaayi Ezekeli, umwaana uwa Buzi, nga ndi mu Babulooni, aambi ni luluutsi Kebari, Umukasya weetsa waanganikhayo isi ise, ise newulila nga kamaani keewe kaantsikhilekho.

⁴ Ise ni naloma ndi ninyusa tsimoni indola, naabona nga ikhuungu iye kamaani ilikho iwuutsa nga yaama ingaaki. Abe tsimbeni tsilikho tsimulikha khukhwaamila mu lifuumbi lye kamaani, waakila mu ngaaki mwoosi mwatsasa ni buwaanga bukali. Abe isi tsimbeni tsili khuumulikha, iliwo shishiindu shishitsasa nga buroonzi.

⁵ Ise naabona akari we khuungu iye kamaani iyo, nga iliwo tsiisolo tsine nga tsibonekha nga babaandu.

⁶ Ne abe buli isolo ili ni mu moni mwe kimiluundi kine, naluundi nga ili ni tsindaha tsine.

⁷ Bikele byatsyo abe bili bitsalaafu busa, ni bikhaandakilo abe bili busa nga bibutusi by'emoosi iye ikhaafu. Abe bibutusi ibyo bitsasa busa nga byeesi bawakhilekho buroonzi.

⁸ Abe iliyo kumukhono kw'omuundu aasi a buli lutaha, khu buli luwaande lwa buli isolo. Abe buli isolo ili ni mu moni ni tsindaha bibiili musaambo yino:

⁹ abe buli isolo yabaamba tsindaha tsibili, nio waakila buli khu luwaande lutaha lwatiila khu lutaha lwe solo ikiindi. Abe nga tsikeenda, tsyoosi tsitsya kumuluundi mutweela, nga sitsishuusakho tsyekhebukha ta.

¹⁰ Abe buli isolo ili ni mu moni mwe kimiluundi kine: ibweeni nga mu moni muli mw'omuundu, khu mukhono kumuseetsa nga khulikho mu moni mumuuli nga mw'etalanyi, khu mukhono kumunyeletsi nga khulikho mu moni mumuuli nga mw'ekhaafu iwuunwa, ne imukoongo nga iliyo mu moni mumuuli nga mw'ekhosi.

¹¹ Mu moni mwa buli isolo abe mufwanana muryo, ne nga abe buli isolo yabaamba angaaki tsindaha tsibili, nga buli lutaha lutiila khu lutaha lwe isolo ikiindi. Ne abe tsindaha tsitsiramire tsibili tsyabiimba khu mibili kyatsyo.

¹² Abe buli isolo ilola mu maande tsyoosi tsine, nga ikyeenda akhali khulola iyi ni neeyi ta. Abe tsyoosi tsitsya buli aandu isi tsikanile.

¹³ Abe tsisolo itsyo tsibonekha nga tsitsyaburukha busa nga kamaanda ke mu mayika. Naluundi ise naabona nga iliwo shishiindu shishimulikha nga i toki nga shilikho shikyeenda musolo itsyo, shitsya ni shikobola. Abe kumulilo ukwo kutindiima ne kukhaasa tsinimi tsye tsimbeni.

¹⁴ Abe tsisolo itsyo tsikulukha ni tsitsya iyi ni neeyi, nga tsili busa nga khuumulikha khwe tsimbeni.

¹⁵ Ise ni naba nga ishiloleelela tsisolo tsyatsana tsine itsyo, naabona kimikuwu kine nga kitiila aasi khu liloba. Abe buli kukuubira kuli aambi n'isolo indweela.

¹⁶ Abe kimikuwu ikyo kine kyoosi kifwaanana busa; nga buli kukuubira kumulikhamulikha busa nga libaale lye buukusi bwe angaaki, nga iliwo kumukuwu kukuundi kumukeekhe kukuuli mukari mwe kumuboofu.

¹⁷ Abe kimikuwu ikyo nga kitima, kinyala kyaatsya khu luwaande lwoosi lweesi kikanile, ne nga sikibotookhelela ta.

¹⁸ Abe kimikuwu kine ikyo kyoosi, buli kukuubira kulikho lutangata ni tsiimbaki. Abe buli lutangata lwayitsulakho tsimoni.

¹⁹ Buli abe isi tsisolo tsyo tsitsya, kimikuwu ikyo nakyo kitsya; abe nga tsisolo itsyo tsyesutile mu ngaaki khukhwaama khu liloba, kimikuwu nakyo abe kikhola kiryo.

²⁰ Tsisolo itsyo abe tsitsya buli aandu oosi isi tsikanile. Ni kimikuwu nakyo abe kikhola isho ni shisheene sheesi tsisolo tsikhola, khulwekhuuba abe kamaani kakaaraangirira kimikuwu ikyo kaama musolo itsyo.

²¹ Ni nashiryo abe uli tsisolo tsisyeenda, kimikuwu nakyo kyesyeenda; abe uli tsiima, nakyo kyeema; abe uli tsiisuta angaaki khukhwaama khu liloba, nakyo kyesuta angaaki.

²² Angaaki e kimirwe kye tsisolo itsyo, abe iliwo shishiindu shishekhooramo nga shayifuumba nga likulu, ne nga shitsasa tsisasani nga tsye inyaanga.

²³ Abe tsisolo itsyo tsyeemile aasi we shishafwaanana nga likulu isho, nga buli ibira yaabaayulile tsindaha tsyayo tsibili khuulola isi iyashe ikimile aambi. Tsindaha tsitsiramire tsibili abe tsirama nga tsyaakibiimbile inyene.

²⁴ Kila ise nawulila likono lyeesi tsindaha tsyatsyo tsikhupa nga tsisolo tsipamburukha. Abe lili busa nga khuwoloola khwe kameetsi kamakali, namwe liyoombo lye liiye liikali lilyeene, namwe nga likono lya Wele umunyali uwa byoosi. Abe nga tsyakamisile khupamburukha, tsiwuumba atweela tsindaha tsyatsyo.

²⁵ Ne shitweela busa yaba nga ishiliwo likono khukhwaama mu shiindu abe shishefuumba nga likulu, abe shishiili angaaki e kimirwe kyatsyo.

²⁶ Angaaki we shishiindu abe shishefuumba nga likulu, abe iliyo shishibonekha nga shitsoloŋo she khukhwikhalakho, nga abe shibonekha nga libaale lye buukusi bwe angaaki naabi. Abe shishikhaale khu shitsoloŋo isho shibonekha nga umuundu.

²⁷ Abe shishibonekha nga umuundu isho shilikho shitsasa busa nga ni bara buroonzi mu mulilo mukari. Shaatsasa buli aandu ni buwaanga bukali naabi.

²⁸ Buwaanga buno abe bulimo tsiraangi tsyoosi tsitsiiba mu lufutu. Buwaanga bubuutsasa naabi buno abe bwokesanisa buri Umukasya aliwo. Ise ni nabona bibiindu bino, naakwa aasi nga nefumalikhile khu liloba. Kila ari ise imbulila likono nga linganikhayo.