Ba Levi 1 - Ibayibuli Ingwalaafu

Tsisaayilo tsitsookhebwa nga tsimbuufu busa

¹ Umukasya aaba nga ali mu lisari mweesi aabonekhela, walaanga Musa, kila amulomela ari,

² atsye akanikhe isi babaandu ba Isiraeli, ababoolele byeesi bali ni khuukhola, nga abe baareerire she khuuwaanayo isi Umukasya, nga bashaamisa mu byaayo, tsikhaafu namwe mu masheese.

³ Nga shishaayo isho shili ikhaafu, bali ni khuuwaanayo iwuunwa, iyo ikhalikho buuleme bwoosi ta. Umuundu ukiwaanileyo, ali ni khuukireera akyakaaniseyo imulyaango we lisari lyeesi Umukasya abonekhelamo, nio Umukasya anyalise khuumufukiilisa khukhwiitsa aambi.

⁴ Umuundu uyo ali ni khuura kumukhono kweewe kumulayi khu murwe kwe shishaayo sheesi awaanileyo isho nga isaayilo, khulwe khuurusawo bibyoonako byeewe.

⁵ Lwanyuma, iwuunwa iyo bali ni khuukikhoonyela mu moni tsy'Omukasya. Basaayi khukhwaama mu shikuuka sh'omusaayi Aroni, bali ni khuuwaanayo kamalasile, bakawaanyake khu sheeso shishiili amulyaango we lisari lyeesi Umukasya abonekhelamo.

⁶ Ali ni khuukibaaka, lwanyuma akisatsakemo bisiintsa.

⁷ Basaayi bali ni khuura tsiikhu khu sheeso, bawaambise kumulilo kurakikhe khuutindiima.

⁸ Basaayi bawaambe kumurwe, ni kiminaawa, babyaantse khu mulilo kwe khu sheeso.

⁹ Ne by'enda ni bileenge, ali ni khuunyoowa abisiinge ni kameetsi. Khukhwaama ni shili shiwaanwa she khukhwookhebwa, nio lwanyuma umusaayi are tsinyama itsyo tsyoosi khu sheeso, bishe bituukhe lisuusi, liliwayo isilikakha indaayi isi Umukasya.

¹⁰ Noola shiwaanwa isho umuundu waashibukuule khukhwaama mu masheese, lili ni khuuba limiiku, ne nga mu mbusi, ili ni khuuba indurume. Shishaayo isho shili ni khuuba nga seshilikho buuleme bwoosi ta.

¹¹ Ali ni khuuyila shishaayo isho ingaaki we shisheeso mu moni tsy'Omukasya, ashiirire ibweene iyo. Basaayi babukule kamalasile bakawaanyake bebotokhelese shisheeso.

¹² Basaayi bawaambe kumurwe, ni kiminaawa, babyaantse khu mulilo kwe khu sheeso.

¹³ Ne by'enda ni bileenge, bali ni khuunyoowa babisiinge ni kameetsi. Khukhwaama ni shili shiwaanwa she khukhwookhebwa, lwanyuma tsinyama itsyo umusaayi atsire tsyoosi khu sheeso, bishe bituukhe lisuusi, liliwayo isilikakha indaayi isi Umukasya.

¹⁴ Umuundu n'aba nga alikho awaanayo khanywiinywi mu shiwaanwa she khukhwoosha nga shino, ali ni khuuwaanayo liwuusi namwe iniinga.

¹⁵ Umusaayi ali ni khuuwaamba khanywiinywi akho, akhayile khu sheeso sha buroonzi, akhaborore likosi lirurekho, lwanyuma are kumurwe khu sheeso. Akheenamise khu luwaande lutweela lwe shisheeso, kamafuki karonyake kawemo.

¹⁶ Lwanyuma arusemo lisakhilo, arusekho ni kamafuumbo, abituume isi batuuma likoshe, shishiili ibwaama inyaanga we shisheeso.

¹⁷ Ikhumaliilisa, akhawaambe tsindaha, akhonuulemo, ne alekhe khukhakabananisamo khabili ta. Umusaayi akhare khu sheeso, akhooshele khu mulilo, nga isaayilo intsoshe, nio bishe bituukhe lisuusi, liliwayo isilikakha indaayi isi Umukasya.