Baroma 1 - Ibayibuli Ingwalaafu

Khusheesa

¹ Ibaluwa yino yaama isi ise Paulo, nga ndi umwakaanisi uwa Yezu Kristu, nalundi naalangibwa khuuba umurume. Ne khufuura ndi uwarobolebwa khulaangilila Kamakhuuwa Kamalayi kakaama isi Wele.

² Kamakhuuwa Kamalayi kano Wele akasuubisa khaalekho nga abirira mu baŋoosi beewe, nga ni bili mu byaronebwa bikhosefu.

³ Kamakhuuwa kamalayi kawamba khu mwana weewe uwasaalikha nga umuundu, nga ali uwe mu shikuuka sha Daudi,

⁴ nga niye Yezu Kristu, Umukasya weefwe. Niye okesanisibwa nga ali Umwaana uwa Wele khulwe kamaani k'Omwoyo Umukhosefu, nga n'alamusibwa khukhwaama mu bafu.

⁵ Khubirira mu Yezu uyo, ifwe khwaweebwa bubweela ni buraambi bwe khuuba baarume, nga khumanyisa kamanaambo koosi khuri bari ni khutsiila khu bye khufukiilila mu lisiina lyeewe.

⁶ Ni nanywe muli litweela khu manaambo ako, kakalaangibwa khuuba ba Yezu Kristu.

⁷ Isi inywe mweesi babaali i Roma beesi Wele akana, nalundi babalaangibwa khuuba bakhosefu, inoma indi, bubweela ni lukoosi bibyaama isi Wele Paapa weefwe, ni isi Umukasya Yezu Kristu, bibe ni nanywe.

Khuloomba ni Khusiima

⁸ Khunyoowa, ise isiima Wele nga imbirira mu Yezu Kristu, khulwenywe mweesi, khulwekhuba khufukiilila khweenywe khufuma mu shiibala shoosi.

⁹ Wele isi ise nisaaya niye ali umujulisi wase. Umweene uyo niye isi ise ikhalaabanila khukhwakaanisa ni kumwoyo kwase kwoosi nga imboolela babaandu Kamakhuuwa Kamalayi kakawamba khu mwana weewe. Wele wamanya ari ise busheele ishebulila khubaloombela inywe mu khuloomba khwase.

¹⁰ Nga busheele ise inoomba ndi abe nga Wele washisiimile, khali kumulundi kuno anyalisile ise niitsa imbakyeniyilakho inywe.

¹¹ Khulwekhuba ingana naabi khubabonakho nio akile imbareerere tsikhabi tse kumwoyo, nio munyalise khuuba ni kamaani.

¹² Sheesi inoma shili ndi, buli mutweela anyalise khukhwisamo khufukiilila khw'owashe kamaani. Nga inywe muntsisamo ise kamaani, ni nase nga imbesamo inywe kamaani.

¹³ Be buulebe, ingana mushimanye muri, nakhakakho khurekekha khukhwiitsa isi muli, ne ibatsakawo bihangafu, bibiishingilila khukhwolelesa shino. Ingana niitse iyo nio manya inyoole bibyaamo mus'iinywe, ni khukhwaama mu Banaambo babaramile boosi.

¹⁴ Ise indi busa nga uli ni likobi isi babaandu babatsowatsowana ni isi banaambo; isi babaali ni kamakhula ni isi babakhali ni kamakhula ta.

¹⁵ Nashiryo ndi ni kameelu kamakali ke khulaangilila Kamakhuuwa Kamalayi isi inywe nanywe babamenya mu Roma.

Kamaani ke Kamakhuuwa Kamalayi

¹⁶ Ise Kamakhuuwa Kamalayi sikamambisa kamaŋaanyu ta. Khulwekhuba kali niko kamaani ka Wele, kakareera buwonesi isi buli mundu yeesi uli ni khufukiilila mu Wele. Ne khunyoowa isi Bayudaaya, ne khwilekho Banaambo nabo.

¹⁷ Khulwekhuba khubirira mu Makhuwa Kamalayi kano, bukwalaafu bubwama isi Wele bwokesanisibwila mu khufukiilila khwonyene. Nga bibyaronebwa bikhosefu ni biloma biri, “Umuundu uli umukhosefu khulwe khubirira mu khufukiilila, alibatsaka umulamu.”

Sheesi Babaandu Boonaka

¹⁸ Lirima lya Wele lyokesanisibwa khukhwaama mwikulu khulwe bunyaalu ni bibyonako bye babaandu, khulwekhuba bubwonaki bwaabwe bwikhilisa bwa ŋali, bwalekha khubonekha ta.

¹⁹ Ibyo byeesi banyala khumanya bibiwaamba khu Wele, byayokesanisibwa lubuula isi bali. Wele umweene wabokesanisa lubuula.

²⁰ Khukhwaama nga Wele n'abuumba shiibala, isaambo isi niye alimo, iyokesanisibwila mu maani keewe kakakhawawo ta, ni bwa Wele bweewe, byayokesanisibwa bulayi busa khubirira mu biindu byeesi abuumba. Nashiryo si bali ni she khukhwihambilisakho ta.

²¹ Khulwekhuba akhaba nga bamanya Wele, ne si bamwisamo shiriifwa nga Wele ta. Namwe si bamusiima ta. Ne akhali baloondelelatsaka bibyambaaso byaabwe bibikhalimo itsamu ta. Ni khulwe shisheene isho, kimyoyo kyaabwe kimisilu kyayitsula shishiilima.

²² Mu khwiyinga bari bali bakyesi, bekyele basilu.

²³ Shino shakila mu shifwo she khukhwisaaya shiriifwa sha Wele uliwo biilo ni biilo, besaaya bifwaani bibiifwana nga umuundu, namwe bibiifwana nga binywiinywi bye mukyeewa, namwe bibiifwana nga bisolo, namwe bibiifwana nga bisolo bibyalaamila khwiloba.

²⁴ Nashiryo Wele walekha babaandu abo khukhola nga khukhwikoomba khwe kimyoyo kyaabwe ni khuli, nga bonyene na bonyene bakhola bibiindu bibiwaambisa kimibili kyaawe bunyaalu.

²⁵ Khulwekhuba bawamba bwa ŋali bwa Wele babukalusa khuuba bye bubeeyi, nga besaaya nalundi baba babakaanisi be shibuumbe sheesi Wele abuumba. Bakhola shino, mu shifwo she khukhwisaaya Wele umweene umubuumbi, isi baakha khuruuya, biilo ni biilo. Amiina.

²⁶ Khulwe ilomo yino, Wele wabalekha khukhola bye kamaŋaanyu nga ni bakana. Bakhasi baawe mu shifwo she khukana basaani, bakana bakhasi bashaabwe.

²⁷ Ni basaani nabo mu shifwo she khukana bakhasi nga ni shili she busaalikhana, baliliilila khukana basaani bashaabwe. Basaani bakhola bye kamaŋaanyu nga betubaasa ni basaani bashaabwe. Mu khukhola shino, wakila benyoola nga bereereera babeene shitaambiso shishibashila khulwe khukhola buubi khwaabwe.

²⁸ Khukhwaama ni bakhashibona bari shili shilayi khumanya Wele ta, Wele naye wabalekha mu khumooyana, nga bakhola bibiindu bibikhabashila ta.

²⁹ Baaba nga betsuule bubwonaki bwe tsisaambo tsingali, nga nimwo mumuuli khuuba baabi, be kumuluungo, ni khuuba be lirima. Nalundi nga betsuule libuba, khukhwira, khulomana, bubeeyi ni likoko khu bashaabwe.

³⁰ Nalundi bali ni kamakuto, bayinikha bashaabwe tsilomo, babiyila Wele, bali ni lulimi luwalafu, beemanya babeene bonyene, beyaangalisa khukhola buubi, nalundi si bawulila basaali baabwe ta.

³¹ Babaandu bano bali basilu, bayukhaŋana busa, si bali ni kimyoyo kimilayi ta, nalundi si balimo shiisa ta.

³² Bamanyila ilala bulayi bari likaambila lya Wele liloma liri, babaandu babakhola bibiindu nga bino bashila khuhela. Ne shitweela busa nibo batsya mu moni ni khukhola bibiindu ibyo. Nalundi shishifuurisila ilala buubi, baalekha khukhwikiitsa babaandu babaandi bababikhola.