Baheburania 1 - Ibayibuli Ingwalaafu

Wele akanikha khubirira mu Mwana weewe

¹ Mu bifukhu bye khaale, Wele akanikhatsaka isi bakuuka beefwe kimilundi mikali musaambo tsingali, nga abirira mu baŋoosi.

² Ne mu bifukhu byalwanyuma bino, Wele akanikha ni nafwe nga abirira mu Mwana weewe yeesi arobola khuuba umusikha wa byoosi. Lundi khubirira mu niye abuumba shiibala shoosi.

³ Mu mwana nimwo mumuuli khumelamela khwe shiriifwa sha Wele, lundi niye shifwananyi sheewe shisheene. Nalundi Umwaana mweene niye uwambiliile shiibala shoosi ni shilomo sheewe she kamaani. Ne n'amala khukhola kumulimo kwe khusiinga bibyonako, aryo ekhala khu mukhono kumulayi kwa Wele umukhulu we mwikulu.

Bukhulu bw'Omwaana wa Wele

⁴ Umwaana ekyela umukhulu khufuura bamalayika, nga ni lisiina lyeewe lyeesi aweebwa ni lili likhulu naabi khufuura lilyaabwe.

⁵ Lwekhuba mbaawo na mutweela khu bamalayika esi Wele alomakho ari, “Iwe uli umwaana wase, shaleelo nekyelile Paapawo ta.” Namwe lundi mbaawo malayika isi Wele alomakho ari, “Ise kane imbe paapawe, ni naye kane abe Umwaana wase ta.”

⁶ Ne Wele nga akaanisa Umwaana weewe umukiboole mu shiibala aloma, ari, “Lekha bamalayika ba Wele boosi bamwisaaye.”

⁷ Ne isi bamalayika beewe Wele aloma ari, “Niye akhola bamalayika beewe imbewo, ni babakaanisi beewe nga khukhwimemula khwe kumulilo.”

⁸ Ne khu mwana aloma ari, “O Wele, shitsoloŋo shoowo kane shibatsakewo biilo ni biilo, ni khuwula khwoowo khulayi nikhwo khuwula khwe buyiinga bwoowo.

⁹ Iwe wakana bukwalaafu, wabiyila bubwonaki. Isho nisho shishakila Wele, Wele woowo akhwawulakho, wakhuwa shiriifwa khufuura bashoowo, nga akhutsukhakho kamafura ni kumwikhoyo.”

¹⁰ Nalundi aloma ari, “Iwe Umukasya, makiboole warawo shiibala, ni likulu nalyo nilyo kumulimo kwe kamakhono koowo.

¹¹ Nibyo byoosi biliwawo, ne iwe kane uramewo. Ibyo byoosi bilikora nga shikwaaro.

¹² Ulibifuumba nga shikwaaro, nalundi nabyo nga shikwaro bilishuusibwa. Ne iwe kane ubatsakewo nga sushuukhakho ta, ni kimiiko kyoowo sikyakama ta.”

¹³ Ne malayika shiina yeesi Wele alomakho ari, “Yikhala khu mukhono kwase kumulayi, khukhwoolesa ni ndikalusa basiku boowo khuuba kharebe kheesi ulaambisakho bikyele byoowo?”

¹⁴ Bamalayika boosi si bali nikyo kimyoyo kikyakaanisa, kikyarumaniwa khukhwakaanisa, lwabo babaatsya khusikhila buwonesi?