Bafilipi 1 - Ibayibuli Ingwalaafu

¹ Ibaluwa yino yaama isi ise Paulo, ni Timosewo, babaakaanisi ba Kristu Yezu, nga ingironela inywe bakhosefu ba Wele mu Kristu Yezu, babaali mu Filipi, atweela ni baraangilisi ni babaandu babayeetakho.

² Bubweela ni lukoosi bibyaama isi Wele Paapa weefwe, n'Umukasya Yezu Kristu, bibe ni nanywe.

Paulo aloomba khulwe Bafilipi

³ Buli lwesi ise imbashebulila inywe, isiima Wele wase khulwenywe mweesi.

⁴ Busheele buli lwesi imbaloombela inywe, inoomba ni kumwikhoyo,

⁵ khulwe'saambo isi munjeetilemo khusalanisa Kamakhuuwa Kamalayi, khukhwaama makiboole, khukhwoolesa ari.

⁶ Ni nase niyikina ndi Wele uwananikhisa kumulimo kuno kumulayi mus'iinywe, alikumalilisa khu shifukhu sha Yezu Kristu.

⁷ Busheele ise imbambaasakho mu mwoyo kwase, khulwekhuba mwetubila atweela mu bweela bwa Wele ni nase, oba nga ndi mu bubowe, namwe nga ndi umulekhuule mu khuboolela ni khukumisa Kamakhuuwa Kamalayi.

⁸ Wele niye umujulisi wase mu byeesi inoma ndi imbatsiinikhila inywe mweesi, mu khukana khwa Kristu Yezu.

⁹ Ni nakhuno nikhwo khuloomba khwase ndi khukana khwenywe khwilooselatsake naabi, atweela ni khumanya khwe khukhwawulawo khwoosi.

¹⁰ Nio manya munyalise khukhwawulawo bibifuura bulayi, nio munyale khuuba bakwalaafu, namwe babakhekiitsibwa khu shifukhu sha Kristu ta.

¹¹ Khali bulamu bwenywe bwitsusibwile ni bubwilama bubwiitsa khukhwaama isi Yezu Kristu, khulwe shiriifwa ni lubuyi lwa Wele.

Isi ise, khuuba umulamu nikhwo Kristu

¹² Be buulebe, ingana mumanye muri bibiindu bibyangwakho byeetsa khulwe khubalaayisa Kamakhuuwa Kamalayi.

¹³ Ni shishamamo, bubowe bwase bwamanyikha mu basilikhale mu lubili ano osi. Ni babaandu boosi bashimanya nga n'indi umubowe, khulwekhuba ndi umwakaanisi wa Kristu.

¹⁴ Ni khulwe khubowebwa khwase mu mapuusu, khwawandalasa be buulebe bakali mu Mukasya, nio bakila baaba ni kamaani khukanikha ilomo ya Wele, nga si barya ta.

¹⁵ Ne mu ŋali ndi, balala baboolela bibiwaamba khu Kristu, lwe liibuba ni khulomana, ne babaandi baboolelela mu mwoyo kumulayi.

¹⁶ Nalundi bashikhola mu khukana nga bamanyile bari ise nareebwawo ni Wele khulwe khutseeta Kamakhuuwa Kamalayi.

¹⁷ Ne babaandi babaaramile ibo si baboola bya ŋali bibiwaamba khu Kristu ta, ne baboola khulwe bitsiilililwa bibiindi. Nga bambaasa bari banyala khulooselakho kimitaambo kyase nga n'indi mu bubowe mu mapuusu.

¹⁸ Ne ari shino shimanyisa shiina? Ari musaambo tsoosi, oba mu khuboolela khulwe bitsiilililwa bibiindi, namwe khulwe mu ŋali, shitweela busa boosi baboolela bilomo bya Kristu. Ni khulwe lomo nyene iyo, ise ndi umusangaafu. Nalundi, ilala kane niloosele khusangaala.

¹⁹ Lwekhuba namanyile ndi khulwe khuloomba khwenywe, ni lwe buyeeti bwenywe bubuwebwa n'Umwoyo wa Yezu Kristu, kane shintsamilemo ise khukangululibwa.

²⁰ Ne khuukana khwase khukhweene ni khukhwiyikina bili ndi, indekhe khuwambibwa tsisoni mu lomo yoosi ta. Nalundi ifune kamaani, indekhe khuba ni khuurya ta, nio Kristu esibwemo shiriifwa bifukhu byoosi, ni ana ari mu mubili kwase, ni mu bulamu, namwe mu khuufwa.

²¹ Lwekhuba is'ise, khuuba umulamu, niye Kristu, ne khuufwa nikhwo kamafuurisa.

²² Ne noola khukhwiloosela khuuba umulamu mu mubili khuloosela khuraamba kumulimo kumulayi, simanya shiina sheesi inyala khurobolawo ta.

²³ Indyo nawambibwiile tsimbeka tsibili, nga ingana khuutsya imbe ni Kristu, shino nga nisho shishiminyisa bulayi.

²⁴ Ne shishifuurisa bulayi khulwenywe, nisho shili ndi ise khuuba umuundu umulamu mu bulamu buno.

²⁵ Shino nashimanyiile ilala ndi kane iname ni nanywe nalundi kane niloosele. Ni nanywe mweesi muryo mwiloosele ni kumwikhoyo mu khufukiilila.

²⁶ Nio shikile nga netsile khuuba ni nanywe lundi, khusangaala khwenywe khwiloosele naabi mu Kristu Yezu.

²⁷ Ne ari shishiindu shishifuura bukhulu isho nisho shino; injeenda yeenywe ikwangwaane ni Kamakhuuwa Kamalayi ka Kristu. Nio nyaanga oba netsile khubabona oba s'indiyo ta, ne imbulile bari mu myoyo kyeenywe mwawandalalila mu shitsiililwa shitweela, nga musoolanila atweela mu khufukiilila khwe Kamakhuuwa Kamalayi,

²⁸ nga basiku si babariisa inywe mulomo yoosi ta. Shino kane shibe she khubonelakho isi bali, shiri nibo babaalihela, ne inywe muliwonesebwa. Lwekhuba Wele umweene niye ubawa inywe bunyali ubwo.

²⁹ Khulwekhuba Wele wabawa inywe tsikhabi khulwa Kristu akhuba khulwe khubirira mu khumufukiilila shonyene ta, ne ni mu khutaambisibwa khweewe.

³⁰ Ari inywe muli atweela ni nase mu khusoolana ukhwo khwesi mwabona lutweela, ni naari khwesi muwulila nga ishisoolana.