Baefeso 1 - Ibayibuli Ingwalaafu

¹ Ibaluwa yino yaama is'ise Paulo, umurume wa Kristu Yezu, lwe khukana khwa Wele, nga ingibaronela inywe bakhosefu ba Wele be mu Efeso, babaali babeyikinwa mu khufukiilila Kristu Yezu.

² Bubweela ni lukoosi bibyaama isi Wele Paapa weefwe n'Umukasya Yezu Kristu, bibe khusiinywe mweesi.

Tsikhabi tsitsiili mu Kristu

³ Khakhusiime Wele lundi Paapa w'Omukasya weefwe Yezu Kristu, lwekhuba mu butweela ni Kristu, wakhuwa ifwe ikhabi iya buli saambo iye kumwoyo niye mu shiibala she mwikulu.

⁴ Lwekhuba akhurobola ifwe khuuba babeewe mu butweela ni Kristu, nga shiibala shishiili nakhubuumbibwa ta, nio akile khube bakhosefu, lundi babakhalikho likoondo lyoosi mu moni tseewe ta. Mu khukana khweewe,

⁵ Wele wakhwawula ifwe khaale mu khukana ari khube babaana beewe babeene, khulwa Yezu Kristu, nga shino shikholebwa mu khusiima khweewe, ni shitsiililwa sheewe.

⁶ Shino shili shiryo nio akile ifwe khubuyile shiriifwa she bubweela bwa Wele, lwe shiwaanwa sha busa sheesi niye akhuwa ifwe khubirira mu Mwana weewe isi akana naabi.

⁷ Ni lwe khuufwa khw'omweeneyo, ifwe khwanyoola khuwonesebwa khu lwe kamafuki keewe nio bibyonako byeefwe byeyakhilwa. Mu shino nimwo mumuuli buyiindifu bwe bubweela bweewe,

⁸ bweesi akhutsukhila ifwe mu makyesi koosi ni khumanya.

⁹ Wele akhumanyisa ifwe shimoonyo she khukana khweewe, lwe khusiima khweesi aŋoonaŋoona khaale mu Kristu,

¹⁰ khukhuulitabusibwa mu bifukhu bibyeene nga byoolele, khureera bibiindu byoosi atweela; bye mwikulu nibye mu shiibala, asi e kumurwe mutweela, nga nikwo Kristu.

¹¹ Mu Kristu fweesi khwarobolewa, nga ni khwamala khukhwawulibwa khuuba babaandu beewe, nga niyaba iŋoonaŋoona yeewe khukhwaama makiboole. Khuno khwaba khukana khweewe,

¹² ari nio ifwe khukhwanyoowa khuuba ni kumwiyikino mu Kristu, khunyale khubuyilisa shiriifwa sheewe.

¹³ Ni nanywe muryo mwenjisibwa mu Kristu nga ni mwawulila burume bwa ŋali, niko Kamakhuuwa Kamalayi ke buwonesi bweenywe. Ni nanywe ni mwamala khufukiilila, mwareebwakho khabonelo kh'Omwoyo Umukhosefu isi Wele abalomela.

¹⁴ Umwoyo yuno niye uŋaŋasa busikha bweefwe, khukhwoolesa khu buwonesi bubweene bweesi Wele aliiwa babaandu beewe lwe shiriifwa ni lubuyi lweewe.

Khusiima ni khuloomba

¹⁵ Ni lwe lomo yino, khukhwaama nga ni namala khuwulila khu khufukiilila khweenywe mu Mukasya Yezu, ni khukana khweesi muli nakhwo isi bakhosefu ba Wele boosi,

¹⁶ ise sinayakamisakho khusiima Wele khulweenywe ni khubashebulila mu khuloomba khwase ta.

¹⁷ Inoomba ndi Wele w'Omukasya weefwe Yezu Kristu, Paapa uwe shiriifwa abawe inywe Umwoyo we kamakyesi ni khubimbulilwa, nio mumumanye niye bulayi.

¹⁸ Ise inoomba lundi ndi tsimoni tseenywe tse mu mwoyo khali tsimokele mubona buwaanga bweewe nio akile mumanye kumwiyikino kweesi abalaangila ni bukali bwe buyiindifu bwe shiriifwa sheesi abalomela inywe nga bakhosefu beewe,

¹⁹ ni butsowe bwe kamaani keewe nga ni buli bubukholela musiifwe babafukiilila. Kamaani iko musiifwe niko bunyala bweewe bwe kamaani,

²⁰ keesi araambisa nga n'alamusa Kristu mu bafu, wamwikhasa khu mukhono kweewe kumulayi mwikulu.

²¹ Ibweeneyo isi amura niye khufuura buwuli bwoosi, ni bunyala, kamaani ni bukasya, nga niye ali angaaki e kamasina koosi, akhuba mu muboolo kuno kwonyene ta, ne ni mu muboolo kukwiitsa.

²² Wele wara bibiindu byoosi khuuba asi ebikyele byeewe, wamuwa niye khuuba kumurwe kwe babaandu ba Wele babafukiilila,

²³ nga nibo kumubili kweewe, ni bubwitsufu bweewe umweene uwitsusilisa bibiindu byoosi, osi osi.