2 Petero 1 - Ibayibuli Ingwalaafu

¹ Ibaluwa yino yaama isi ise Simoni Petero, umwakaanisi nalundi umurume uwa Yezu Kristu. Ingironela abo boosi babanyoola khufukiilila khwe lisuno nga khuno, atweela ni nafwe. Khufukiilila khukhuleekhaana ni khukhwefwe, mu bukwalaafu bwa Wele wefwe nalundi niye uli umuwonesi wefwe, Yezu Kristu.

² Bubweela ni lukoosi mu bukali bibe mus'iinywe, nga bibirira mu khumanya Wele, ni mu Yezu Umukasya wefwe.

Wele alaanga nalundi Warobola

³ Khulwe kamaani ka Wele, ifwe khwaweebwa bibiindu byoosi bibiwaambakana ni bulamu bukhosefu, nga khubirira mu khumanya uyo uwakhulaanga ifwe ari khukabanane khu shiriifwa sheewe ni bulayi bweewe.

⁴ Ni musaambo nyeene iyo, wakhuwa ifwe biwaanwa bye angaaki nalundi bye lisuno, byeesi akhulomela ifwe. Akhola aryo ari nio khulwe biwaanwa ibyo, akhumuse ifwe khukhwaama mu bumoyaani bubuuli mu shiibala shino. Nalundi nio mwikyele babakabananila atweela ifwani iya Wele.

⁵ Ni khulwe ilomo inyene yino, mwakha mukhakekho naabi khulooselakho bulayi mu khufukiilila khwenywe. Ni khu bulayi bwenywe ni mulooselekho khumanya,

⁶ ni khumanya khwenywe ni mulooselekho khuwula kimibili kyenywe. She khuwula kimibili kyenywe, ni mulooselekho khukhwikhaliilikha, ni khukhwikhaliilikha mulooselekho khuurya Wele.

⁷ Ni khu khurya Wele mulooselekho khukhwinaanayo isi basheenywe, ni khukhwinaanayo isi basheenywe mulooselekho khukanana.

⁸ Khulwekhuba ni muba nga muli ni bibiindu bino byoosi mu bukali, bibayeeta khuuba ni kamaani nalundi muba babaandu babaama bibyaamo mu khumanya Umukasya wefwe, Yezu Kristu.

⁹ Uyo yeesi ukhali ni bibiindu byeesi inganikhilekho angaaki bino ta, aba umubofu nalundi abuukabuuka busa. Nalundi aba webiliile ari wasiingibwakho bibyonako byeewe bikhale.

¹⁰ Nashiryo be buulebe, ni mukhakekho naabi khuwandalalila mu khurobolebwa ni khulaangibwa khwenywe. Khulwekhuba ni muba mwakholile muryo, si mulikhaasikha mu khufukiilila khwenywe ta.

¹¹ Ni musaambo iyo, muliweebwa bunyali bwe khukhwinjila mu buyiinga bubukhawawo ta, bw'Omukasya wefwe, nalundi niye Umuwonesi wefwe, Yezu Kristu.

¹² Ni khulwe lomo yino, kane busheele imbashebusatsake bilomo bino, abe akhaba nga mwabimanya khaale, nalundi nga byaamanyikhanila ilala mu bya ŋali byeesi muli ni nabyo.

¹³ Ise nambaasa ndi shili shilayi, nga ise nishiili umulamu mu mubili, busheele khubashebusa.

¹⁴ Khulwekhuba namanyile nga Umukasya wefwe Yezu Kristu n'amboolela ise lubuula, ndi mu mbuka ikhali iye aleeyi ta, kane nirusekho kumubili kuno kukubola.

¹⁵ Ne kane ikhole shoosi sheesi inyala khubona ndi imbareerawo kumukhoosi, nio abe ise nakhaba nga nafwiile, imbone ndi mushebulila bilomo bino byoosi.

Bujulisi bubuwamba khu shiriifwa sha Kristu

¹⁶ Mu khubaboolela inywe bye kamaani ni khukobola khw'Omukasya wefwe Yezu Kristu, ifwe sikhwababoolela nga khulondelela bye tsingano tsitsarewawo busa ni kamakyesi ke babaandu ta. Ne ifwe khwaba bajulisi khu bye shiriifwa sheewe.

¹⁷ Khulwekhuba ifwe khwabawo nga Yezu n'afuna lukoosi ni shiriifwa khukhwaama isi Wele Paapa. Nga likono ni lyeetsa esi aba nga lyama mu shiriifwa she angaaki nga liloma liri, “Uyuno niye umwaana wase umukanwa; niye esi nikhoyela.”

¹⁸ Ifwe fwabeene khwawulila likono ilyo nga lyama mwikulu, khulwekhuba ifwe khwaba ni naye khu lukiingi lukhosefu.

¹⁹ Bino byoosi byaba nga bihandalasa burume bweesi baŋoosi baakukuula. Ni nanywe ni kane murekeerese bibiindu bino, kane mube mwakholile bulayi. Khulwekhuba bili nga itaala ni yaburushila mu shiilima, khukhwolisa antsye ni bubuluukha. Nalundi bili nga buwaanga bwe inieniesi nabwo bubwaburushila mu myoyo kyeenywe.

²⁰ Ne khunyoowa muli ni khumanya muri, imbaawo umuundu unyala khusontsoola khu bweewe, musaambo iyeewe busa, bye buŋoosi bibiili mu byaronebwa bikhosefu ta.

²¹ Khulwekhuba imbaawo burume bwe buŋoosi bubweetsa khulwe khukana khw'omundu ta. Ne khurusakho ndi Umwoyo Umukhosefu niye uwaraangilila babaandu nio wakila bakanikha bibyaama isi Wele.