Zabbuli 1 - Luganda DC Bible 2003

EKITABO EKIBEREBERYE (Zabbuli 1–41 ) Essanyu ery'amazima

¹ Wa mukisa oyo atakolera ku magezi ga babi oba okukwata ekkubo ly'aboonoonyi, wadde okutuula awamu n'abanyoomi.

² Wabula amateeka ga Katonda ge gamusanyusa, era g'alowoozaako emisana n'ekiro.

³ Afaanaanyirizibwa n'omuti ogwasimbibwa okumpi n'ensulo z'amazzi, ogubala ebibala mu kiseera kyabyo, era ogutawotoka makoola. Mu buli ky'akola aba wa mukisa.

⁴ Naye ababi si bwe bali. Bafaanaanyirizibwa n'ebisusunku ebifuumuulibwa embuyaga.

⁵ Ababi abo kyebaliva balemwa okugumira olunaku olw'okusalirwako omusango, wadde okwetaba awamu n'abatuukirivu.

⁶ Kubanga Mukama aluŋŋamya abatuukirivu. Naye ababi balizikirira.