Et 6 - Luganda DC Bible 2003

Ekiragiro Ekikulu

¹ “Kale gano ge mateeka n'ebiragiro n'ebibuuliriro Mukama Katonda wammwe bye yandagira okubayigiriza. Mubituukirizenga mu nsi gye munaatera okuyingiramu okugyefuga, nga musomose Omugga Yorudaani.

² Mmwe n'abaana bammwe era ne bazzukulu bammwe, mussengamu Mukama Katonda wammwe ekitiibwa obulamu bwammwe bwonna. Mutuukirizenga amateeka ge gonna n'ebiragiro bye, bye mbawa, mulyoke muwangaale nnyo.

³ Kale Abayisirayeli muwulire, mwegendereze okubituukirizanga, mulyoke mubeerenga bulungi, mweyongere nnyo obungi, mubeerenga mu nsi engimu era engagga, nga Mukama Katonda wa bajjajjammwe bwe yabasuubiza mmwe.

⁴ “Muwulire mmwe Abayisirayeli: Mukama, ye Katonda waffe, Mukama yekka.

⁵ Mwagalenga Mukama, Katonda wammwe, n'omutima gwammwe gwonna, n'omwoyo gwammwe gwonna, n'amaanyi gammwe gonna.

⁶ Bino bye mbalagira olwaleero bibeerenga mu mitima gwammwe.

⁷ Mujjukirenga okubiyigiriza abaana bammwe, mubyogerengako nga muli awaka, era nga mutambula mu ŋŋendo, nga mugalamiddeko, era nga mugolokose.

⁸ Mubisibenga ku mikono gyamwe, era mubyetimbenga mu byenyi byammwe ng'akabonero akabibajjukiza.

⁹ Mubiwandiikenga ku myango ne ku nzigi z'ennyumba zammwe.

Okulabula Abayisirayeli baleme kujeema

¹⁰ “Mukama Katonda wammwe bw'alibatuusa mu nsi gye yalayirira bajjajjammwe Aburahamu ne Yisaaka ne Yakobo, alibawa mmwe ebibuga ebinene era ebirungi bye mutaazimba,

¹¹ n'amayumba agajjudde ebirungi bye mutaateekamu. Alibawa enzizi ensime, ze mutaasima, n'ennimiro z'emizabbibu n'ez'emizayiti, gye mutaasimba. Mulirya ne mukkuta.

¹² Kale mwegendereze muleme kwerabira Mukama eyabaggya mu nsi y'e Misiri, gye mwafugirwanga obuddu.

¹³ Mussengamu ekitiibwa Mukama Katonda wammwe, mumusinzenga, era erinnya lye, lye muba mulayiranga.

¹⁴ Temuusinzenga lubaale n'omu ku balubaale b'abantu ababeetoolodde.

¹⁵ Bwe mulisinza balubaale, obusungu bwa Mukama bulibatumbukirako mmwe ng'omuliro, ne bubasaanyaawo, kubanga Mukama Katonda wammwe oyo ali nammwe, wa buggya, tavuganyizibwa.

¹⁶ “Temuukemenga Mukama Katonda wammwe nga bwe mwamukema e Masa.

¹⁷ Munyiikirenga okukuuma ebiragiro bya Mukama Katonda wammwe, n'ebyo bye yabakuutira, n'amateeka ge, ge yabateekera.

¹⁸ Mukolenga ebyo Mukama by'ayita ebituufu era ebirungi, lwe mulibeera obulungi, ne muyingira era ne mwefuga ensi ennungi, Mukama gye yalayirira bajjajjammwe,

¹⁹ abalabe bammwe bonna be musanzeemu ne mubagobamu, nga Mukama bwe yasuubiza.

²⁰ “Gye bujja, abaana bammwe balibabuuza mmwe nti: ‘Amateeka n'ebiragiro n'ebibuuliriro Mukama Katonda waffe bye yabateerawo, bitegeeza ki?’

²¹ Abaana bammwe abo bamubaddangamu nti: ‘Twali baddu ba kabaka w'e Misiri, Mukama n'atuggya mu Misiri ng'akozesa obuyinza bwe obw'amaanyi.

²² Twerabirako n'amaaso gaffe ebyewuunyo n'ebyamagero eby'amaanyi era eby'entiisa Mukama bye yakola ku Misiri ne ku kabaka waayo, ne ku b'ennyumba ya kabaka oyo bonna.

²³ Ffe n'atuggyayo, n'atuleeta wano, n'atuwa ensi eno gye yalayirira bajjajjaffe.

²⁴ Mukama Katonda waffe n'atulagira okutuukirizanga amateeka ago gonna, n'okumussangamu ekitiibwa, tulyoke tubeerenga bulungi bulijjo, era atukuumenga nga tuli balamu nga bwe tuli kaakano.

²⁵ Kye tusaanidde okukola, kwe kwegendereza tutuukirizenga byonna Mukama Katonda waffe bye yatulagira.’