Et 18 - Luganda DC Bible 2003

Omugabo gwa bakabona

¹ “Bakabona Abaleevi n'ab'omu Kika kya Leevi bonna, tebaabenga na mugabo gwa ttaka mu Yisirayeli. Naye banaalyanga ku biweebwayo ebyokebwa, ne ku bitambiro bya Mukama ebirala ebiteekwa okumuweebwa.

² Tebaabenga na ttaka ng'ab'ebika ebirala. Omugabo gwabwe kwe kubeera bakabona ba Mukama, nga bo bwe yabagamba.

³ “Guno gwe mugabo, abantu abawaayo ekitambiro gwe banaawanga bakabona: bw'eba ente oba endiga, bawenga kabona omukono, n'emba zombi, n'ebyenda.

⁴ Kabona munaamuwanga ekitundu ekisooka okukungulwa eky'eŋŋaano yammwe, n'eky'omwenge gwammwe ogw'emizabbibu, n'eky'omuzigo gwammwe ogw'emizayiti, n'ebyoya bye musooka okusala ku ndiga zammwe,

⁵ kubanga mu bika byammwe byonna, Mukama Katonda wammwe yeerobozaamu ab'Ekika kya Leevi okumuweerezanga ennaku zonna mu Weema ey'Okumusisinkanirangamu.

⁶ “Buli Muleevi anaabanga ayagadde okuva mu kibuga kyonna mw'abeera mu Yisirayeli, n'ajja mu kifo Mukama Katonda wammwe ky'aliba yeerobozezza okumusinzizangamu,

⁷ anaaweerezanga Mukama Katonda we nga baganda be Abaleevi abalala bonna abayimirira mu maaso ga Mukama, bwe bakola.

⁸ Anaafunanga omugabo gw'emmere gwe gumu nga banne, nga tobaliddeeko ebyo by'anaabanga afunye mu b'eŋŋanda ze.

Okwewala okukola Mukama by'akyawa

⁹ “Bwe mulimala okutuuka mu nsi Mukama Katonda wammwe gy'abawa, temugezanga ne muyiga okukola eby'omuzizo, ng'ab'amawanga ago bye bakola.

¹⁰ Tewaabenga n'omu mu mmwe ayisa mutabani we oba muwala we mu muliro okumuwaayo okuba ekitambiro, wadde akola eby'okulagula, n'eby'obulogo,

¹¹ wadde ayambala ensiriba, oba omusamize,

¹² kubanga Mukama Katonda wammwe akyawa abakola ebintu ebyo ebyenyinyalwa era kyava agoba ab'amawanga ago mu nsi, mmwe nga mulaba.

¹³ Mmwe mulemenga kubaako kamogo mu maaso ga Mukama Katonda wammwe,

¹⁴ kubanga ab'amawanga ago ge mugenda okwefuga, bawuliriza abalaguzi n'emmandwa. Naye mmwe, Mukama Katonda wammwe tabakkirizza kukolanga bwe mutyo.

¹⁵ Mukama Katonda wammwe alibayimusiza omulanzi mu mmwe, ow'eggwanga lyammwe, ali nga nze. Oyo gwe muliwulira,

¹⁶ nga bwe mwasaba Mukama Katonda wammwe lwe mwakuŋŋaanira ku lusozi Horebu, ne mugamba nti: ‘Tuleme kuddayo kuwulira ddoboozi lya Mukama Katonda waffe, wadde okuddamu okulaba omuliro guno omungi, sikulwa nga tufa.’

¹⁷ Mukama n'agamba nti: ‘Kye bagambye kirungi.

¹⁸ Ndibayimusiza omulanzi ow'eggwanga lyabwe ali nga ggwe, era ndimutegeeza by'alyogera, n'ababuulira byonna bye ndimulagira.

¹⁹ Kale buli atalissaayo mwoyo ku bigambo byange mulanzi oyo by'alyogera mu linnya lyange, ndikimuvunaana.

²⁰ Naye omulanzi aneetulinkirizanga n'ayogera mu linnya lyange ebigambo bye simulagidde kwogera, oba anaayogeranga mu linnya lya balubaale, omulanzi oyo anaafanga.’

²¹ “Muyinza okwebuuza mu mitima gyammwe nti: ‘Tunaategeeranga tutya ekigambo Mukama ky'atayogedde?’

²² Omulanzi bw'ayogera mu linnya lya Mukama, ky'ayogedde ne kitabaawo oba ne kitatuukirira, ekyo kye kiba ekintu Mukama ky'atayogedde. Omulanzi aba akyogedde aba yeetulinkirizza, kale temumutyanga.