Engero 1 - Luganda DC Bible 2003

Omugaso gw'engero

¹ Zino ze ngero za Solomooni mutabani wa Dawudi, era kabaka wa Yisirayeli.

² Ziyamba abantu okufuna amagezi n'okuyigirizibwa, n'okutegeera ebigambo eby'amakulu amakusike.

³ Ziyigiriza amagezi ag'okukola ebituufu, n'okusala ensonga mu bwenkanya, n'okuba abeesimbu.

⁴ Ziyigiriza amagezi abatalina bumanyirivu, ziwa abavubuka okumanya n'okutegeera.

⁵ Omugezi bw'aziwulira, yeeyongera okuyiga, era zibuulirira abategeevu,

⁶ ne beeyongera okutegeera amakulu g'engero agoomunda, n'ebigambo ebyogerwa abakugu.

Okubuulirira abavubuka

⁷ Mu kutya Mukama, okumanya mwe kusookera. naye abasiru banyooma amagezi, era tebaagala kuyiga.

⁸ Mwana wange, wulira kitaawo by'akuyigiriza, era tova ku ebyo nnyoko by'akukuutira.

⁹ Birungiya empisa zo, ng'ekiremba ky'oku mutwe n'emikuufu gy'omu bulago, bwe biwoomera abirina.

¹⁰ Ababi bwe bakusendasendanga, mwana wange, tokkirizanga.

¹¹ Singa bagamba nti: “Jjangu tuyite ffenna, tuteegeyo gwe tunatta, tugwikirize abataliiko musango, tubalumbe awatali nsonga,

¹² tubafuukire amagombe tubamire, basaanewo ng'abakka mu bunnya.

¹³ Tuneezuulira ebintu eby'omuwendo ennyo, tujjuze amayumba gaffe omunyago.

¹⁴ Jjangu otwegatteko naawe, tugabanire wamu ebibbe.”

¹⁵ Mwana wange togezanga n'oyita nabo, era tobeesemberezanga,

¹⁶ kubanga tewaliyita bbanga nga tebannakola bya mbyone. Tebalirwa kuyiwa musaayi.

¹⁷ Ekitimba otegera bwereere, ng'ennyonyi gy'otega ekulaba.

¹⁸ Naye abantu ng'abo, bateega bulamu bwabwe bwennyini, era be bafiira mu nkwe zaabwe.

¹⁹ Bwe kityo bwe kiba ku buli afuna eby'obunyazi: ababifuna, biribatta.

Amagezi gakoowoola abantu

²⁰ Amagezi galeekaanira mu nguudo, gakoowoolera mu bifo ebyalukale.

²¹ Googera n'eddoboozi ery'omwanguka awayingirirwa mu kibuga, n'abangi we bakuŋŋaanira. Ne gagamba nti:

²² “Mmwe abatalina magezi, mulituusa wa okwagala obutamanya? Nammwe abanyoomi mulituusa wa okusanyukira obunyoomi? Era nammwe abasiru mulituusa wa okukyawa okumanya?

²³ Musseeyo omwoyo ku bye mbanenya. Era nja kubabuulirira, mbamanyise ekindi ku mwoyo, mbagabanyize ku bye mmanyi.

²⁴ Mbayise ne mugaana okujja. Mbawenyezzaako n'omukono, ne wataba afaayo.

²⁵ Temuwulirizza bye mbabuulirira, temwagadde mbanenye n'akatono.

²⁶ Kale nange bwe mulikaaba, ndiseka; ndikudaala nga muli mu ntiisa.

²⁷ Entiisa bw'eribajjira ng'omuyaga, akabi ne kabeetooloola ng'embuyaga ey'akazimu, obuyinike n'obulumi ne bibagwira,

²⁸ olwo mulimpanjagira, naye siribaddamu; mulinnoonya, naye temulinzuula,

²⁹ kubanga mwakyawanga okumanya, era temwalondawo kutya Mukama.

³⁰ Temwayagalanga mbabuulirire n'akatono, temwakkirizanga mbanenyeeko n'akamu.

³¹ Kyemuliva mufuna empeera egwanira bye mwakola, mulyoke mwetamwe enkwe zammwe,

³² kubanga ekitta ababuyabuya, kuva ku bituufu; n'ekizikiriza abasiru, buteefiirayo.

³³ Naye buli awuliriza bye ŋŋamba, anaabanga mirembe, era anaatereeranga nga tewali kabi k'atya.”