یهودا 1 - کتاب مقدس به زبان لکی - گویش مرکزی

¹ اژ یهودا، خُلُم عیسی مسیح ئو بِرا یعقوب، وَه کسَلی گه دَوَت بینَ ئو اِنوم خداءِ باوَه عزیزگرامیِن، ئو اَرِه عیسی مسیح حفظ بینَ:

² ریَمَت ئو سِلامتی ئو مِحبت، چَل‌چَل اَر هُمَه بو.

مَکوم کِردِن مَلِمَل دروزِنِ

³ اِاِ رولَه‌ل، وَه‌یاآگه شوق فِرَه‌می داشد تا اِبارَه نجادی‌ گه کُلمو وَه‌گَرد یَک اَژی هُم‌بیَریم اَرِنتو بِنُیسِنِم، مِنتائای لازمِم ذِناسد گه چَن خطتونی اَرِه بِنُیسِنِم، ئو اَژینتو بِم گه اَرِه ایمونی تقِلا بِهِینو گه یِگِل اَرِه همیشَه سپارتیاسَ ایمودارَل مسیح.

⁴ اَرِیَگه بِری گه اژ قدیم اَرِه ایی مَکومیتَ مَیِّن بینَ، وَه بی‌کِشکیا هاتِنَس اِنوم هُمَه. یوئنَ خدانشتاسَلی‌ کِن گه فیض خدا ایمَه مَهَنَ عِیاشی ئو یَکونَه آقا ئو خداونمو، عیسی مسیح حاشاءَ مَهَن.

⁵ وَه‌یاآگه هُمَه یِگِل کامل اژ یَه خَوَردارا بینونَ، میا بارِمَ ویرتو گه خداون عیسی وَه‌یاآگه قوم یهود اژ وِلات مصر نجاد داتی، مِنتائای دُماتِر اونَلی گه ایمونو ناآشد، اژ بِن بِردی.

⁶ ئو فریشدَه‌لی‌شی گه نوسیان اَرسر مقوم قدِرت‌واختیار ووژو، بلکِم جالیز دُریس ووژو هُیشتونِ جا چِن، اِ زنجیرَل ابدی هُیشتیَسیِ تیَریکی شوءَزنگی تا موقَع داوری اِ اَ روژ کَلِنگَ.

⁷ ئو هَمیش، شیَرَل سُدوم ئو عَمورَه ئو شیَرَل اَ هِناسَ، گه اِجور اونَل بی‌عصمتیو کِرد ئو چِنَ دُم شَوَتَلی گه اَرِه لار طبیعی نیِن، ئو وَه کَتِن اِنوم مِجازات آگِر ابدی بینَ عبرتی اَرِه ایمَه.

⁸ وَه ایی حالا، هِرِ ایی جورَ ایی آمَل‌یشَ تَکیو ها اَر خاوَلی گه موئینِن، لار ووژو نِجسَ مَهَن ئو قدِرت‌واختیار خداون رد مَهَن ئو کِفِرَ موشِنَ کَلِنگَل آسمونی.

⁹ مِنتائای جُ‌جُ میکائیل، فریشدَه اعظم، اَسَه گه وَه‌گَرد ابلیس اِبارَه لَش موسی دَمَرَگَ مَهَردی، وخدی حکمَ مَهَرد اَری وَه ووژاِرا نِئیتی گَن بوشتیَ بی، بلکِم فَخَد وِتی: «خداون، خِضت اَری بِهِه!»

¹⁰ مِنتائای یوئنَ گَنَ موشِنَ اَ چیئَه گه نِمَفیَمِن، ئو اِجور حِوونَل نَفیَمی کِن گه چیئَلی گه اژ غریزَه مَفیَمِن، هَر اونَ نابودونَ مِهِه.

¹¹ هِرّو اَرِنو، اَرِیَگه چِنَ تُرّ قائِنا ئو وَه خاطر نفع، چِنَ تُرّ خِلَط بَلعاما ئو اِ شورش قورَح اژ بِن چِن.

¹² یوئنَ اِنوم مِمونیَل پِر اژ مِحبت هُمَه بی‌هُیچ خجالتی وَه‌گَردتو میرِن ئو خُرَّ میَن، مِنتائای اِجور کمرَل ژیر آوِن گه نِماو بوئینیو؛ یوئنَ شوئونَلی کِن گه ووژونَ مَگِرِن اَر بَن؛ اُرَل بی‌وارونی کِن گه وائونَ میَری، ئو دارَل بی‌ثمر آخِر پایزِن گه دو گِل مِردِنَ ئو ریشیون اِرهاتیَ.

¹³ یوئنَ موجَل تاف دریان گه کارَل نَنگو اِجور کف دریا ما اَر رُی آو، ئو آسارَه‌ل وِیلونی کِن گه تیَریکی شوءَزنگی اَرِنو مَیِّن بیَ.

¹⁴ خَنوخ، گه نسِل هفتِم دُما آدم بی، اِبارَه ایی چیئِلَ پیشگوئی کِردیِ، موشی: «اِسگَه، خداون وَه‌گَرد هزارون هزار اژ مقدّسَل ووژَ مای

¹⁵ تا اَر کُل داوری بِهِه ئو کُل خدانشتاسَل وَه‌سونگَ کُل کارَل شرَباری‌ای گه اِنوم خدانشتاسیو کِردیَ مَکوم کِ، ئو وَه تقاص کُل قصَه‌ل گَنی گه گناکارَل خدانشتاس اَرضد اوُ وِتیَ، مَکومو کِ.»

¹⁶ یوئنَ هَر خُت‌خَتَ مَهَن ئو گِلِیَ مَهَن ئو هانَ دُم هُواوهوسَل گنابار ووژونا؛ یوئنَ چِنَه‌مِفتَل قُراتِن ئو وَه نفع ووژو جونِمداریَ مَهَن.

دَوَت وَه پایاری اِنوم ایمو

¹⁷ مِنتائای هُمَه اِاِ عزیزَل، پیشگوئی رسولَل خداونمو عیسی مسیحتونَ ویر بو

¹⁸ گه وِتونَ بینتو: «اِ زمونَل آخِر، تیزمَتَل‌کَرَلی مان گه هانَ دُم هُواوهوسَل شرَبار ووژونا.»

¹⁹ هَر یوئنَنَ گه جیاییَ ماوژِنِ نومتو ئو آمَل دنیاییِن ئو روحِ خدا نِرِن.

²⁰ مِنتائای هُمَه اِاِ عزیزَل، ووژتون اِنوم ایمو فِرَه مقدّستو بِنا بِهَن ئو اِنوم روح‌القدس دوعا بِهَن

²¹ ئو ووژتون اِنوم مِحبت خدا حفظ کَن، هَرهُنَ گه چیَمَ‌رئی ریَمَت خداونمو عیسی مسیحینو گه ژییاین ابدیَ ماری،

²² ئو اَر کسَلی گه دودِلِن، ریَمتو داشدوئی؛

²³ بِری اِنوم آگِر بارِنَ دِریر، نجادو دَن؛ ئو اَر بِری‌تِر وَه ترس ریَمتو داشدوئی. جُ‌جُ اژ جِنِکی گه وَه شَوَتَل جسمونی لکَه‌دارا بیَ بیزار بوئن.

²⁴ اَر او گه مَتونی هُمَل اژ کَتِن اژ ایمو حفظ بِهِه ئو پِر اژ خَوشی کَلِنگی بی‌عِو باریتون‌ اَرِه درگا جِلال ووژ،

²⁵ اَر اَ خداءِ یَکونَه ئو نجاددهندَه ایمَه وَه‌سونگَ عیسی مسیح، خداون ایمَه، جِلال ئو عظَمت ئو سِلطنت ئو قدِرت بو، گه اژ اَ اولَ بیَسی، اِسگَه هَسی، ئو تا ابد هَسی! آمین.