३ युहान्ना 1 - लोहोरुङ्1 काङा मान्डालिबिऎ टुङ्घङ्पा युहान्नाऎ ग साब्चिरा कॆ इडुङॆ खानावाँबि एट्टान नाम्नाम् पिसिडानॆ आना गायासमि लागि साप्हाङ्मे पाइकुङ्। 2 काम लाङ्काम्, आनाम् योम्पक् नुःर टङ्खॆॽल हाङ् आम् सालुङ् नुङ् होइढा चोब्न खानावाँ नुःर लिबिॽल कामानुङ् काङा पारठाना लॆःॽङा। 3 एक्क हिप्पा याॽमिचि काबि टाआमिहाङ् आना चाइबानऎ खानावाँबि निवाँयुङ्मा लिमानुङ् पाइना कामानुङ् खेम्मिटिङ्मि। म खानावाँऎ काङा एट्टान चेन्चाइङ्। 4 काम् पासाचि चाइबानऎ लाम्फुबि लाम्ढुढाङ्डामि लोमॆ खानावाँ खेम्मार काङा ऎॽवा हाङ्हाङ् मिङ्ङा, म हाङ्हाङ् काङा माङ्ऎ सङ्क पिॽहिङानि। 5 लाङ्काम्, आना निवाँयुङ्मा लिमानुङ् आम् बुबुनानुसाचिम् लुम्पि पाइना। हाङ् खोचिम् लुम्पि टे हॆॽनॆ, टर आनॆ मानमालेमिम्पा बुबुनानुसाचिम् लागि सङ्क योम्पक् यिगुना। 6 हाङ् खोचिऎ गुबिऎ मान्डालिबि आनॆ नाम्नाम् पिसिॽमानुङ् यिक्मिम्पा योम्पक्मि बारेबि खानावाँ इसुचि। हाङ् निवाँहाङ् चेन्चामॆ गारि डॆङ्पिढारि खोचिमि लाम्फुबि पाइबाकॆचो। 7 मान्ठाभनॆ निवाँयुङ् आलॆखुबाचिबाङ् माङ्स मान्लारे खोचि येसुमि निङ्मि लागि उम्चि लाम्फुबि आम्पःक्डामि। 8 मसॆ गरक्मा याॽमिचि कानिऎ पाइबाक्मा लॆःॽमि। आक्रहाङ् कानि निवाँहाङ्मि चाइबानऎ खानावाँ खेम्मिॽमॆ आक्खाचिमि योम्पक्पि पाइबाखुबा लिकि। 9 काङॆ मान्डालिमि लागि साब्चिरा साबुङ्, टर टुङ्घङ्पा लॆङ्मा यक्खुबा डियोटिरिफसऎ कॆ लोमिम्पा खानावाँबि निवाँ टिसुनि। 10 हाङ् काङा आक्कुबि टामार, खोसॆ कानिम् बारेबि मान्टक्मा हुन्नहा खानावाँ इसे कानि सिच्चाकिहा लोमॆ इखानि। आक्र टेःॽन हॆॽनॆ, खोसॆ निवाँयुङ् लॆखुबा बुबुनुसाचि नुःर लॆटुचिनि हाङ् लॆःॽमा यक्खुबाचि सङ्क ऎगुकुचि हाङ् मन्डालिबाङ् लाबहाङ्कुचि। 11 लाङ्काम्, काइसॆ खानावाँ आटिङॆ, टर काम्नुऎ खानावाँ टिङॆ। हाङ् ग खानावाँ मिॽलाऎ, नुऎ योम्पक् यिक्खुबा चाइ निवाँहाङ्मि पासा यो हाङ् काइसॆ योम्पक् यिक्खुबाऎ निवाँहाङ् लेसुनि। 12 हाङ् डेमेटिरियास चोप्पासॆ नुऎ लोकुचि हाङ् चाइबानऎ खानावाँऎ सङ्क मन इकु। हाङ् काङ्कॆ सङ्क आक्क खानावाँमि चुमॆक्सङ् पिकुङ्का हाङ् काङ्कॆ इमिम्पा खानावाँ चाइबान कामानुङ् आनॆ लेकुनान। 13 हाङ् काङॆ आन्ना लोमॆ खानावाँ ग डिरिक् चु, टर आक्खा खानावाँ ग साब्चिराबाङ् हॆॽनॆ, 14 आन्ना कॆ सॆॽलन चुःप्कानि हाङ् चोब्न खानावाँ लोकानि। 15 हाङ् आनाबि सान्टि लिर। गुबि चुःक्मिहा चोब्न आम् लाङ्काम्चिऎ स्यामिहाङ्डामि यो। हाङ् आक्कुबि चुःक्मिहा चोब्न कानिम् लाङ्काम्चि नुङ् सङ्क स्यामुकिङ्का। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.