२ टिमोठि 1 - लोहोरुङ्1 खिरिस्ट येसुबि चुऎ हिङ्खामामि चुप्लाङ् रक्न निवाँहाङ्मि निवाँबाङ् खिरिस्ट येसुमि सॆःक्ढुङ्पा काङा पावलऎ, 2 काम् पासा रक्मान आना टिमोठि, ग साब्चिरा साप्हाङ्मॆ पाइना। आनाबि कानिम् निवाँहाङ् आपा हाङ् खिरिस्ट येसु पारभुबाङ् नाम्नावाँ नुङ् सान्टि लिर। नुःर योम्पक् मुढाङ्मॆ 3 काम्नुऎ नुङ् काइसॆ फाक्हिखुबा काम् निवाँबाङ् कॆ निवाँहाङ्मि योम्पक् मुकुङ्, म काम् पाप्पा टुबाचिऎ सङ्क लेॽयुङ्सुचि। हाङ् कॆ पारठाना लॆःॽमार आना हानाम्स मिॽलाक्ना हाङ् निवाँहाङ् ओहाक् पिकुङ। 4 आनाम् मिॽवा मिॽलाकुङ् हाङ् आनानुङ् एट्टान चुॽमा मिन्डिङ्, आनानुङ् चुबिङ् हाङ्ग डिरिक् चेन्चाङा। 5 आनाबि चुऎ म चाइबानऎ निवाँयुङ् कॆ लेकुङ। म निवाँयुङ् आनाम् माॽमा लोइस हाङ् आम्मा युनिस्बि सङ्क चुआ। हाङ् कॆ लेकुङ् ग आनाबि सङ्क चु। 6 मसॆ कॆ आना सक्पि हुक् युङ्मार आनॆ टक्चामिम्पा निवाँहाङ्मि बारडाना मिॽलापॆ हाङ् आक्क हेर हामिढाङ्सॆ कामानुङ् लोःक्ना। 7 मान्ठाभनॆ निवाँहाङ्ऎ कानि किसिमॆ निवाँ हॆॽनॆ टर चॆक्मावा नुङ्मा, नाम्नाम् पिसिॽमॆ हाङ् टाङ्पॆ टाङ्पान खाङ्हिमॆ निवाँ पिडि। 8 मसॆ कानिम् पारभुमि हाङ् खोमि निङ्पि सॆक्ढिङ्खॆढिङॆ काङा पावलमि चुमॆक्सङ्मि खानावाँ इमा आङेसिऎ। टर आना सङ्क निवाँहाङ्मि चॆक्मावा नुङ् डुखा आङ्मा परक्याक्कॆ। 9 खोसॆ कानि हिङ्पकि हाङ् सॆङ्सॆङॆ हिङ्खामाबि हिङ्चामाम् लागि सेःरि। कानि नुऎ लिमिम्पासॆ खोसॆ म लॆःॽमिम्पा हॆॽनॆ, टर खोम् निवाँ नुङ् नाम्नावाँऎ रेम। म खानावाँ खोसॆ बाखाटेम् लिमाबाङ् याॽलन खिरिस्ट येसुबाङ् पिकानि कामानुङ् लोमिम्पा लॆटा। 10 टर म नाम्नावाँ कानिम् फाक्खुबा खिरिस्ट येसु टामार खाङ्मिटु। खोसॆ सिखॆॽमॆ लोमॆ खानावाँ हेचाइटु हाङ् नुऎ खानावाँबाङ् हानाम्स आसिखॆॽमॆ हिङ्खामामि खानावाँ लाटॆटु। 11 हाङ् गमि लागिॽन काङा निवाँहाङ्ऎ सॆःक्मानुङ् खेम्मिखुबा, सॆःक्ढुङ्पा हाङ् चिन्खुबा मुडिङ। 12 मसॆॽन कॆ डुखा आङ्मॆ पाइकुङ। टर काङा ङेसिङानि, मान्ठाभनॆ कॆ आसा सक्पि निवाँयुङ् लॆडुङ् म कॆ काम्नुःर लेकुङ। हाङ् कॆग स लेकुङ्, काङॆ निवाँहाङ् सक्पि युङ्मिम्पा खानावाँ खोसॆ खो होइखेपा सङ्क मॆटारढारि काम्नुःर युङ्हिकु। 13 खिरिस्ट येसुबि चुऎ निवाँयुङ् नुङ् नाम्नाम् पिसिॽमाबि आनॆ काङाबाङ् खेम्मिम्पा चाइबानहा खानावाँमि आना टिङ्खुबा खाङ्चामा लुऎ याॽमि लिसॆ। 14 आना पिॽमिम्पा चाइबानऎ नुऎ खानावाँ कानि हङ्सिॽयु पेन्खुबा सॆङ्सॆङॆ लवामि चॆक्मावाबाङ् काम्नुःर युङॆ। 15 हाङ् एसियामि ठालबिहा चोप्पसॆ, गरढारि रु हारमोगेनस नुङ् फुगॆलासऎ सङ्क काङा याइडाइङ्मि लोमॆ खानावाँ आनॆ लेकुना। 16 हाङ् ओनिसिफरसमि खिम्पि पारभुमि नाम्नावाँ टार, मान्ठभनॆ काङा सॆक्ढिङ्खॆम्पाबि खो मॆङेसि। हाङ् खोसॆ काङाम् डुखाबि डिरिक् खेपा खाङिङ। 17 बोरु खो रोमपि टामा अक्सि हेरढारि काङा यगिङ् हाङ् चुबिङ। 18 पारभु टाऎ डिना खोसॆ पारभुबाङ् ढ्या नाम्नावाँ टक्चाउर। आनॆ काम्नुःर लेकुना खोसॆ काङा एफिससबि चुइङ्र सङ्क ऎॽवा योम्पक् मुबाकिङ्। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.