२ ठेसलोनिकि 1 - लोहोरुङ्1 ठिसालोनिकिबिऎ मान्डालिबि निवाँहाङ् आपा हाङ् पारभु येसु खिरिस्टबि चुक्मिहा बुबुनानुसाचिम् लागि काङा पावल, सिल्भानस हाङ् टिमोठिऎ ग साब्चिरा साप्हाङ्मॆ पाइकुङ्का। 2 निवाँहाङ् आपा हाङ् पारभु येसु खिरिस्टबाङ् आन्नाबि सान्टि नुङ् नाम्नावाँ लिर। ओहाक् नुङ् पारठाना 3 बुबुनानुसाचि, आन्नामि लागि काङ्कॆ निवाँहाङ् हानाम्स ओहाक् मापिॽरे पेन्हिसिङ्कानि हाङ् ग नुऎ योम्पक् स रेम, मान्ठाभनॆ आन्नामि निवाँयुङ् एट्टान चॆकुयॆ लिसे खॆडा हाङ् आन्नामि लुम्पि एक्कसॆ होइक नाम्नाम् पिसिॽमॆ खानावाँ सङ्क फुबक्से खॆडा। 4 मसॆ याॽमिचिऎ आन्ना पिॽमिम्पा डुखा हाङ् आन्नॆ आङ्मे पाइमिम्पा चोब्न खोप्चिनावाँबि सङ्क आन्नामि डुखा आङ्मॆ निवाँ हाङ् निवाँयुङ्मि बारेबि होइढा मान्डालिबि छाक्छाक् मिन्से खानावाँ इहिकुङ्का। 5 इघा चोब्न खानावाँऎ निवाँहाङ्मि न्यायॆ नुऎ लॆ लोमॆ खानावाँ खाङ्मुकु। मसॆॽन आन्ना निवाँहाङ्मि हाङ्डाम्पि भॆन्हिखुबा याॽमिचि लिकानि कामानुङ् खाङ्मुकु। ग हाङ्डाम्मि लागिॽन आन्नॆ डुखा आङ्मॆ पाइकाम्नि। 6 निवाँहाङ्ऎ नुःर न्यायॆ लॆकु, आन्ना डुखा पिक्खुबाचि खोसॆ आक्खाचि डुखा पिकुचि। 7 हाङ् निवाँहाङ्ऎ आन्ना हाङ् काङ्का डुखा पिक्खुबाचिबाङ् नाचामिकि। हाङ् ग खानावाँ चाइ निवाँहाङ्ऎ पारुबाङ् पारभु येसु चॆक्मावा नुङ्मा निवाँखाटॆखुबाचि नुङ् मिःबि खाङ्ङुमिॽमार लि। 8 हाङ् निवाँहाङ् आलेक्खुबाचि हाङ् कानिम् पारभु येसुमि नुऎ खानावाँ आखेम्खुबाचि खोसॆ डान्डा पिकुचि। 9 हाङ् आक्खाचि हानाम्स लुक्खॆॽनॆ डुखाबि सिःक्मि, पारभु हानाम्स आटक्चामॆ गारि हाङ् खोम् चॆक्मावा नुङ्मा निङ्लावाबाङ् फाॽलाङ्। 10 हाङ् आक्क डिनान खो खोम् सॆङ्सॆङॆ याॽमिचिबाङ् निङ्लावा टक्चासि टा हाङ् खोबि निवाँयुङ् लॆखुबा चोब्न आक्खॆकुचि। आन्ना सङ्क आक्खाचिनुङ् लिकानि मान्ठाभनॆ आन्नॆ काङ्कॆ पिॽमिम्पा चुमॆक्सङ्पि निवाँयुङ् लॆटाम्नि। 11 मसॆॽन आन्ना निवाँहाङ्ऎ सेःॽमिम्पा आनुसारॆ हिङ्खामाबि हिङ्चाहिसानॆ हाङ् चोब्न नुहा योम्पक् नुङ् निवाँयुङ्पिऎ खानावाँ खोम् चॆक्मावाबाङ् मुबाक्मानुङ् यॆॽहिसाम्नॆ कामानुङ् हानाम्स पारठानबि मिॽलाक्चिम्। 12 मसॆ कानिम् निवाँहाङ् हाङ् पारभु येसु खिरिस्टमि नाम्नावाँ रक्न आन्नामि हिङ्खामाबाङ् कानिम् पारभु येसुमि निङ्लावा लिर हाङ् आन्नाम् चाइ खोबि निङ्लावा लिर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.