Abalam 2 - EKITABO EKITUKUVU BAIBULI

Malayika wa Mukama ayogera n'abaana ba Isiraeri e Bokimu

¹ Awo malayika wa Mukama n'ava e Girugaali n'agenda e Bokimu. N'ayogera nti, “Nnabaggya mu nsi y'e Misiri, ne mbaleeta mu nsi gye nnalayirira bajjajjammwe; ne njogera nti, ‘sirimenya ndagaano yange gye nnalagaana nammwe,

² mmwe temulagaananga ndagaano n'abo abatuula mu nsi muno; mumenyemenyenga ebyoto byabwe;’ naye mmwe temuwulidde ddoboozi lyange, kiki ekibakozesa bwe mutyo?

³ Nange kyennava njogera nti Siibagobenga mu maaso gammwe naye banaabanga ng'amaggwa mu mbiriizi zammwe, ne ba katonda baabwe banaabanga kyambika gye muli.”

⁴ Awo olwatuuka malayika wa Mukama bwe yabuulira abaana ba Isiraeri ebigambo ebyo, abantu ne batema emiranga ne bakaaba amaziga.

⁵ Ekifo ekyo ne bakituuma erinnya Bokimu; ne baweera eyo ssaddaaka eri Mukama.

Okufa kwa Yoswa

⁶ Awo Yoswa bwe yamala okusiibula abantu, abaana ba Isiraeri ne bagenda buli omu mu butaka bwe yagabana.

⁷ Abantu ne baweerezanga Mukama ennaku zonna eza Yoswa, n'ennaku zonna ez'abakadde abaawangaala okusinga Yoswa, abaalaba omulimu gwonna Mukama gwe yakolera Isiraeri.

⁸ Yoswa omwana wa Nuuni, omuddu wa Mukama, n'afa, nga awangadde emyaka kikumi mu kkumi (110).

⁹ Ne bamuziika mu butaka bwe e Timunasukeresi, mu nsi ya Efulayimu ey'ensozi, mu bukiikakkono obw'olusozi Gaasi.

¹⁰ Era n'ab'omulembe ogwo bonna ne bafa. Ne waddawo ab'omulembe ogwaddirira, abataamanya Mukama, wadde ebyo bye yakolera Isiraeri.

Abaana ba Isiraeri balekayo okusinza Mukama

¹¹ Awo abaana ba Isiraeri ne bakola ekibi mu maaso ga Mukama ne baweereza Babaali;

¹² Ne bava ku Mukama Katonda wa bajjajjaabwe, eyabaggya mu nsi y'e Misiri, ne bagoberera bakatonda abalala ab'amawanga agabeetooloola, ne babavuunamira, ne basunguwaza Mukama.

¹³ Ne baava ku Mukama ne baweereza Baali ne Asutaloosi,

¹⁴ Obusungu bwa Mukama ne bubuubuukira ku Isiraeri, n'abagabula mu mikono gy'abanyazi abaabanyaga, n'aleka abalabe babwe ababeetoolodde ne babawangula. Abaisiraeri nga tebakyasobola kwetaasa.

¹⁵ Gye baatabaalanga yonna, omukono gwa Mukama ne gubaleeteranga akabi, nga Mukama bwe yayogera, era nga Mukama bwe yabalayirira; ne beeraliikirira nnyo.

¹⁶ Mukama n'ayimusa abalamuzi abaabalokolanga mu mukono gwabo abaabanyaganga,

¹⁷ Naye ne batawulira balamuzi baabwe, kubanga tebaali beesigwa, bagoberera bakatonda abalala, ne babavuunamira; ne baakyama mangu okuva mu kkubo bajjajjaabwe lye baatambulirangamu, nga bawulira ebiragiro bya Mukama; naye bo tebaakola bwe batyo.

¹⁸ Buli Mukama lwe yabayimusizanga abalamuzi, Mukama n'abanga n'omulamuzi oyo, n'abawonyanga abalabe baabwe ebbanga lyonna omulamuzi oyo lye yamalanga nga mulamu; kubanga Mukama yabakwatiranga ekisa olw'okusinda kwabwe olw'abo ababeeraliikirizanga.

¹⁹ Naye omulamuzi bwe yafanga, abantu baddanga mu bibi byabwe eby'edda nga bakola bubi n'okusinga bajjajjaabwe, nga bagoberera bakatonda abalala okubaweereza n'okubavuunamira; tebaakendeezanga ku bikolwa byabwe wadde okulekayo empisa zaabwe embi.

²⁰ Obusungu bwa Mukama ne bubuubuukira ku Isiraeri; n'agamba nti, “eggwanga lino limenye endagaano gye nnalagaana ne bajjajjaabwe, tebakyampulira;

²¹ nange okuva leero sikyagobyemu mu nsi mawanga Yoswa ge yalekamu weyafiira,

²² ndyoke ngezese Isiraeri nga mpita mu mawanga ago ndabe oba banaakwatanga amakkubo gange nga bajjajjaabwe bwe bakola oba tebagakwatanga.”

²³ N'olw'ekyo Mukama n'aleka ab'amawanga ag'omu nsi eyo, era teyaganya Yoswa kubawangula.