ཏི༌ཏུས༌ 2 - New Testament in Ladakhi Langage

لدینبے لابجا۔

¹ اِین نانگ کھیرانگی لدینبے لابجا نانگجینلا لابگوس۔

² لو ثنابچُوی سانگ مانّگا چھاکھانّی بُوژا گُونلا رانگسیمس چونچیس، سیوے اوسپاچان گیورچیس تانگ میتشیبو شیسرابسچانجیگ پھودچیسپو لوب۔ کھونگونی ایمان بو خُدے دینبیکا ستانپو یانگ چیسپا تانگ زودپا نیسکوے گنگستے یونگّوس۔

³ تینّا تسوگسلا لو ثنابچُوی سانگ مانّگا چھاکھانّی بوموگونلا، خُدا سیوا کھیونگکھانّی میتشے جیگ پھودچیس لوب۔ کھونگون جانماگونّی سچودپے سکورلا نگانپا زیرکھان، یا چھانگ مانگپو تھونگکھانجیگ یونگ ماگوس۔ اِین نانگ کھونگونی زانگپو اینکھانبو جانماگونلا لابگوشیس اینوگ۔

⁴ تے بوموگونّی بومو ناچھونگّونلا رانگی ماگپا تانگ ٹھوگو گُونلا، چامسپا چوچیسّی نانّگا سپوسپا تانگوس۔

⁵ ماتشاد تیگون رانگسیمس چونّیانکھان تانگ سیمس لاگمو، نانگتشانگسّی ستاستوگ چوچیس، لاس زانگپو چوچیس، یانگ رانگ رانگ کھورانگونّی ماگپے وانگی یوگا بورچیس گُون لابگوس۔ تینے خُدے کا، سوجیگیانگ نلوق زیر مینیان۔

⁶ تینّا تسوگسلا کھیوگتونگّونّانگ، رانگسیمس چونتے بورچیسلا سپوسپا تونگ۔

⁷ یانگ کھیرانگی انگ لاس زانگپوگون چوستے کھونگونی پھیا سپیجیگ گیورگوس۔ کھیرانگی لابجابو ٹانگپو تانگ سیمسّی تھیلنے یونگکھانبو ستون۔

⁸ کھیرانگی لابکھانبوا سکیون رجود مییونگچیسّی پھیا، لدینبابو لوب۔ تینے نگاتانگونلا گیابگال چوکھانگون ٹھیلبا سونگتے نگاتانگونلا چانگ نگانپا زیر مینیان۔

⁹ ایمان چان تشییوگّونّی توسگیون کھورانگونّی، سپونبوے کھانیانتے کھونگون تھادچوگچیسلا سونڈوس چوشیگ۔ کھونگونلا لانلوگ ماتانگشیگ،

¹⁰ یا کوماکو، اِین نانگ کھورانگّون چیساتھوگنے ایمان چان تانگ زانگپو اینکھانبو ستانگوس۔ تینے تیگونلا خُدے نگاتانگونّی کھوم چُوکھانی لابجا ہاگوچیسّی دودپا سکیچُوگین ۔

¹¹ میتشانگمالا تھارپے لام سالّا زادتے خُدے کھونگرانگی شزدے بو سنگون چوگّا زادس۔

¹² یانگ نگاتانگونلا ”نگانپے میتشے پھودچیس تانگ، دِیگپے دودپاگونلا گیابگیورگوس“ زیرتے شادّا زادس۔ نگاتانگونّی ای دُنیا نگانپے نانّگا رانگسیمس چونّیانکھان، ٹانگپو تانگ، خُدے سچودلامیکا ڈولکھانّی میتشے جیگ پھودگوشیس اینوگ۔

¹³ یتسوگسّی میتشے پھود زانے، ریوا نیامپو نگاتانگونّی ٹاگپو خُدے تانگ، کھوم چُوک کھن حضرت عیسیٰ مسیحاگُونی شان سنگونچیسچانّی تے معجزہ جاگپوا ثونگاین۔

¹⁴ نگاتانگون ژانگما چوچیس تانگ دِیگپے ریگس تشانگمانے تھارچوگچیس ماتشاد، سنینگنے لاس زانگپو چوچیسلا رینگسین یودکھانّی کھونگرانگی میگون چوچیسّی پھیا کھونگی کھونگرانگی ثوگپو سالّا زادس۔

¹⁵ کھیرانگی تیگون، ایمان چانگونلا لابستے لاگلینّی نانّگا کھیونگچیسلا سپوسپا تونگ۔ کھونگونی ای لابجاگونّی گیابگال چو زانے، کھیورانّگا کھونگونلا سپوسپا تانگستے سکیونگچیسّی وانگچھا یودتے اینوگ۔ کھیرانگی لابکھانگونلا سوجیگّانگ سنانگمید چو ماچوگ۔