ཡུ༌དཱ༌ 1 - New Testament in Ladakhi Langage

یودے چھوگسنے سلام۔

¹ جولے، نگا یہُوداؔہ حضرت عیسیٰ مسیح جابستوگپا تانگ یعقُوبؔ ی نو این۔ نگے ای ایگیبو، بودّا زادکھان، خُدے یابّی سنینگنے چیسپا زادکھان یانگ حضرت عیسیٰ مسیح پھیا سکیوبستے بورّا زادکھان گُونلا ڈِیاد۔

² نگے دُعا چواد، خُدے کھیوجاگونلا سنینگرجے، جیدے تانگ چامسپا گُون، مانگنے مانّگا سالشیگ۔

لوبپون زوسماگونّی جیگسنانگ۔

³ چیسپے فونو گون، ژانتا نگا کھیوجاگونلا نگاتانگ تشانگما تھوبچیسّی تھارپے سکورلا ڈیچیسلا رینگسین یود، اِین نانگ نگے کھیوجاگونلا خُدے لانچیگ توسگیونّی پھیا کھونگی ہلژخمہ میگونّی لاگا ستادا زادکھانّی ایمانی نانّگا ستانپو دوگچیسلا سپوسپا تانگین ڈیگوشیسپو کھاگچان سامّاراگ۔

⁴ نگے تیبو کھیوجاگونلا زیرّاد، چیازیرنا نگانپا می کھاچیگ کھیوجاگونّی عبادت خانہے نانّگا سانگوے تھوگنے ڈیس تشارتے این۔ تیگونّی خُدے شزدے دُونبو گیورتے نگاتانگونلا نگانپے میتشے پھودچیسّی رانگوانگ یودتے اینوگ زیرّانوگ۔ توس مانگپوجیگی سنگونلا تیزوگ میگونلا چھادپا پھوگچیسّی سکورلا ڈِیازادتے اینوگ، چیازیرنا کھونگونی نگاتانگونّی گیالپو تانگ مسیح چیگپو جوگسکھانّی حضرت عیسیٰ مسیحانگولوگ چوروگ۔

⁵ ژانتا کھیوجاگونلا ایگونّی سکورلا لان مانگپو تشورتے اینوگ۔ نگے کھیوجاگونلا مسیح خُدے بنی اِسرائیل پاگون مصر یولّی ت شینا گنے تھار چوگّا زادتیانگ، ستینگنے کھونگی کا ایمان ماچوسکھانگون، میدکھان چوا زادکھانبو ایدتو سکولنین راگ۔

⁶ یانگ وانگچھے تشاد سالّا زادکھانبوا ماتھادکھانّی فرشتاگونّی تے کوسابو پھانگس۔ خُدے تیگون مونڈیگی نانّگا مانے میچھادچیسّی لچاگتھاگا لدامستے ٹھیمسچادّی تے جاگ ٹاگپوے پھیا بورّا زادس۔

⁷ سدُوؔم تانگ عمورہ پی گیالسا یانگ نیکھورّی ڈونگکھیرپاگون ایدتو چوشیگ، کاگونّی میتشے لوسڈیل نگانپا تانگ دودپا نگانپے نانّگا پھودسپا، خُدے میے نیامپو میدکھان چوا زادس۔ تیگون، تھامیدپے میے چھادپا پھوگچیسچانگونّی پھیا، سپے تانگ لدامجاگشیگ این۔

⁸ تینّا ژوگس تے زوسمے لوبپونگونّی، خُدے کھونگونلا نیلامّی نانّگا سچودلام نگانپے میتشے پھودچیسّی رانگوانگ سالتے این زیرّانوگ۔ تیگونّی وانگ یودکھانگونلا گیابگال چوستے نامکھے نانّگا جوگسکھانّی شان چانگونلا نگانپا زیرتے اینوگ۔

⁹ اِین نانگ فرشتاگونّی اُسکیونگ، میکائیلانگ، پیغمبر حضرت مُوسیٰؔ سی جنازے سکورلا ردودگونّی گوبا نیامپو ٹھابپا زادتوس، کھونّگا کھوے سچودپے سکورلا نگانپا زیرچیسّی ہامپا مایونگس، اِین نانگ کھونگی مولس، ”مسیح کھیودلا ٹھیمسچاد زادشیگ۔“

¹⁰ اِین نانگ ای زوسمے لوبپونگونّی، ہاماگوکھان تشانگمے گیابگالّا سپیرا نگانپا تانّگانوگ۔ یانگ سامبا میدکھانّی ریی سیمسچان تسوگسلا، کھورانگونّی دودپا نانگجین چوچیسپوے، کھورانگّون ٹھیسّتور چھا چوگّانوگ۔

¹¹ تیگونلا تسامشیگی جیگسپا میونگ، چیازیرنا تیگون، حضرت آدم می بُوژا قابِیل لی لام نگانپیکا ڈولتے اینوگ۔ یانگ تیگونّی نورّی پھیا پیغمبر دِیگپاچان بَلعام تسوگسّی نورٹھول چوستے اینوگ۔ خُدا نگولوگ چوکھان کورا تسوگسلا، کھونگونلا تانتان چھادپا پھوگین۔

¹² چھادپا ماجیگسکھانّی تے زوسمے لوبپونگونّی، کھیوجا نیامپو ہلژخمہ شزدے ّی نانّگا، کھاگ لینتے تیبوا ٹھیلبا کھیونگستے اینوگ۔ کھونگون کھورانگ چیگپوا ستاستوگ چوکھانّی ٹھیلمیدّی لُوگ زی گون اینوگ۔ کھونگون چھو میدکھان پھانمیتھوگسّی ثین لونگسپوے ٹھیدتے کھیرکھانگون ژوگس اینوگ، یانگ کھونگون شینگتوگ مانے ماچھاگسکھانّی لچانگما ژوگس این، کا بو پاٹاگنے پھارلا پھودپا شیاد۔

¹³ کھونگون وانگثول مانیانکھانّی گیاتشوے چھولباگ ژوگس اینوگ، کاگونّی ٹھیلمیدّی وواگون کیینلا پھانّگانوگ۔ تیگون سکارما تونتاگ میدپا ڈولکھانگون ژوگس اینوگ۔ خُدے کھونگون توسگیون دوگچیسّی پھیا، مونڈیگی ناسّا تشانگمیسانگ تینگچانبو لدامّا زادتے اینوگ۔

¹⁴ یانگ حضرت حنُوؔک حضرت آدمنے میرابس ردونپا اینکھانّی اِنوک تیگونّی سکورلا ماونگ لونگستان سالتے اینپین، ”ستوسشیگ مسیح، کھونگرانگی ہلژخمہ فرشتا ستونگٹھاق مانگپو نیامپو،

¹⁵ سچودلام نگانپا تشانگما چوستے خُدے گیابگالّا سپیرا نگانپا زیرتے کھونّگا ماجیگسکھان تشانگمالا، کھورانگونّی سنینگی نانّگا ٹھیلبا تشورچوگچیس تانگ شاگس زادچیسلا سکیودّوگ۔“

¹⁶ ای زوسمے لوبپون گُون توسگیون بارکھان، جانمے نانّگا سکیون ژالکھان، کھونگرانگی دودپا نگانپے لامیکا ڈولکھان، کھورانگ تانگ رانگی سکورلا پھوسو چوکھان تانگ رانگی پھانتھوگسّی پھیا جانماگونلا ستودپا تانّگانوگ۔

ایمانی نانّگا ستانپو دوگچیسّی سکور۔

¹⁷ اِین نانگ چیسپاگون، نگاتانگونّی حضرت عیسیٰ مسیح پیغمبر گُونی پیش گوئی سالکھانگون ایدتوا چوشیگ۔

¹⁸ کھونگونی کھیوجا شادّا زادس، ”تھامے تُوسلا مسیحا ٹھیلبا چوین، سپیرا تانگکھانّی میگون یونگستے کھورانگونّی دودپا نگانپے لامیکا ڈولین۔“

¹⁹ تے زوسمے لوبپونگونّی، کھیوجاگونّی ٹوا نانگٹوگس چھاچُوگین۔ کھونگونلا ہلژخمہ رُوح مید پاسانگ، کھورانگونّی دِیگپے دودپا نانگجینلا میتشے پھودّانوگ۔

²⁰ اِین نانگ کھیوجا چیسپاگون، کھیوجے ہلژخمہ ایمانی نانّگا کھیوجارانگون شوگسچان چوشیگ۔ یانگ ہلژخمہ رُوح بوے نانّگا دُعا چوشیگ۔

²¹ حضرت عیسیٰ مسیح سنینگرجے کھیوجاگونلا تھامیدپے میتشے سالچیسلا ثونگ زانے، خُدے چامسپے نانّگا دوگشیگ۔

²² ایمانی نانّگا تھےژومس یودکھانگونلا سنینگرجے ستونشیگ۔

²³ نیالوے میے چھوگسلا ڈولتے چھاکھانگون کوگستے کھیونگشیگ۔ یانگ جانماگونلا سنینگرجے ستونشیگ، اِین نانگ کھیوجاگون تینّا دِیگپے نانّگا گیل میگیل چیسلا شانگ چوشیگ، ماتشاد کھونگونی دِیگپے لاسگونّی جاستے تشیتو چھاکھانّی کوسلاگپوانگ ناپھراد چوس۔

ستودپے دُعا۔

²⁴ کھیوجا دِیگپے نانّگا گیل چیسنے سکیوبستے بورّا زادتھوبکھانّی خُدے، کھیوجاگونّی سکیون تشانگما میدکھان چوا زادتے، گامو نیامپو کھونگرانگی شانی نانّگا کھونگی سُکُوندونلا کھیونگا زادِین۔

²⁵ نگاتانگونّی حضرت عیسیٰ مسیحاگیُودتے، نگاتانگونّی خُدے تانگ کھوم چُوک کھن چیگپوا، سپال تانگ شان تانگ شید تانگ وانگ گُون، دُنیا چھاگسّی سانگ سنگونّے داگسا تشوگپا، یانگ ستینگژینّانگ توسگیون تھوبشیگ، امین۔