ཆག༌ལས༌གུན༌ 28 - New Testament in Ladakhi Langageمالتا تشولینگ لیب۔ 1 کھامزانگ نیامپو سا سکامپویکا بینگستے ستینگنے نگاجا تے تشولینگ کابوا مالتا زیرکھان گیوسّونگ۔ 2 تے یولمیگونّی نگاجا ماثانٹے سنینگرجے ستانس۔ چھارپا تانگچیسپوے ٹانگمو ثانٹے یودپا، تے میگونّی میے تانگستے نگاجا گاسوس گیالّا چوس۔ 3 حضرت پولُسی شینگ بانشیگ روگستے میا تابچیس چواچیگ، میے تشادّی جاستے تے شینگی ٹونے توگرولجیگ بینگتے حضرت پولُسی لاگپا سوگا تابستے دُوگس۔ 4 تشولینگی میگونلا رولبوے حضرت پولُسی لاگپا سوگا تابستے تھونّگاچیگ، چیگ تانگ چیگّا زیرس، ”ای میبو تانتانلا میسادجیگ اینوگ۔ کھو گیاتشوے نانگنے تھارتے اِین نانگ ٹھیمسچاد زادکھانّی خُدے کھو سونتیا لوس چوگّا مازادّا اینوگ۔“ 5 حضرت پولُسی رولبو ثوگستے میے نانّگا پھانگس سالپا کھونّگا چانگ ماسونگ۔ 6 تے میگونّی حضرت پولُسی زوگسپوبو ثانگساین یا ہونمیدلا سیکا گییلتے شیانوگ سام۔ توس مانگپوجیگ ثونگستے ستینگنیانگ حضرت پولُس لا چانگ ماسونگپا کھونگونی سامکھانبو گیورتے ای میبو خُداشیگ اینوگ زیرس۔ 7 پُبلیُس زیرکھانبو تے تشولینگی نانّگا ساکیاد ما چھینموجیگی داگپو تانگ تے یولّی کالون اینپین۔ کھوے نگاجا کھورانگی کھانگپے نانّگا گاسوس جْوس تے جاگ سوم تشوگپا نگاجا ستاستوگ چوستے شزدے زادس۔ 8 پُبلیُسی ابا تشاد تانگ ٹھولچیسّی زُومو یونگستے مالتسے نانّگا دوگپین، حضرت پولُس کھوا تھوگّالا سکیودس۔ دُعا جوس یانگ کھونگرانگی چھاگ کھوے گویکا بورّا زادتے کھو پھانچوگا زادس۔ 9 تیبو تھونّگاچیگ تے تشولینگی جان نادپا تشانگما کھونگی لدُونلا کھیونگس، یانگ حضرت پولُسی کھونگونانگ پھانچوگا زادس۔ 10 تیبوے جاستے کھونگونی نگاجا گُونلا ما سیوا چوس، یانگ نگاجا تیکانے بینگچیسّی ڈال چواچیگ، کھونگونی نگاجا گھوسدوم یودکھان تشانگما ٹُھوزینگی نانّگا سکانگس۔ رومّا لیب۔ 11 لزاوا سومی ستینگنے نگاجا گُون، گونتوس پھودچیسلا تے تشولینگبویکا دُوگستے یودکھانّی ٹُھوزینگجیگّا ژونتے سونگپین، کا بو اسکندریہ نے اینوگ۔ تے ٹُھوزینگی دونبویکا ڈیسپے تشاگٹوگ خُدے سکونڈے گوگون ستاگس تے دوگپین۔ 12 نگاجا گُون سیراکوس رگیالسا لیب، یانگ تیرو جاگ سوم دُوگس۔ 13 تیکانے ٹُھوزینگی نانّگا سونگتے نگاجا گُون ریگیوم رگیالسا لیب، یانگ ستینگماجاگپو لو چھوگسنے لونگسپو یونگسپا جاگ چیگی ستینگنے نگاجا گُون پوتیولی ڈونگکھیرلا لیب۔ 14 تیرو نگاجا گُونلا ایمان چان کھاچیگ تھوگ، کھونگونی نگاجا جاگپو ردون کھونگون نیامپو دوگسچیسلا جوس۔ تے ستینگنے نگاجا ڈولتے رومی گیالسا لیب۔ 15 رومی نانّگا یودکھانّی فونو گونلا نگاجا یونگدوگ زیرتے گیوسّونگتے ابپیوسّی ٹھومس تانگ، بیسکھانگ سوم زیرکھانّی ڈونگکھیر تشوگپا نگاجا سوستے یونگس۔ کھونگون تھونّگاچیگ حضرت پولُسی سیمسلا سپوسپا سکیستے خُدا شُکر جوس۔ 16 رومی گیالسا لیبستے ستینگنے حضرت پولُس لا چیگپو کھانگپاجیگی نانّگا دوگچیسلا گونگسپا تانگستے ماگمی چیگ ثونّگا بورس۔ رومی نانّگا حضرت پولُسی چھوس شادس۔ 17 جاگ سوم چھاچیگ حضرت پولُسی یہُودی پے اُسکیونگونلا بودس۔ کھونگون لدوسّاچیگ حضرت پولُسی مولس، ”یہُودی پے فونو گون، نگے، نگاتانگی میگون یا اتا اپو ے لوگثولگونّی گیابگال مانے ماچوسپین، تینیانگ نگا یروشالیمّی نانّگا زومستے رومپے لاگا ستادس۔ 18 رومپاگونّی نگا سارچود تانگستے ستینگنے پھودچیسلا تھاد چیازیرنا ثوگی چھادپا پھوگچیسّی لاسشیگ نگے مانے ماچوسپین۔ 19 اِین نانگ یہُودی پاگونّی تے تھاگچادبوا گیابگال چوسپا، نگا رومی گیالپویکا ٹھیمسچادّی پھیا جُووا پھولگوس، نگے نگارانگی میگونّیکا سکیون کالچیسلا تے جُووا ماپھولپین۔ 20 بنی اِسرائیل پاگونّی ریوا، کا بو لدامّا زادکھانّی مسیحا این، کھونگ سکیودتشارکھانبوے نانّگا ایمان چوسپا نگا ای لچاگتھاگ نیامپو چینگستے اینکھانبو ہاگوچوگچیسّی پھیا نگے کھیوجا سپیرا تانّگا بودتے این۔“ 21 کھونگونی لانتانگس، ”نگاجا نیرانگی سکورلا یہُودیہ نے ایگے مالیب، یانگ یہُودیہ نے یونگکھانّی فونو گونّی نیرانگی سکورلا چانگ نگانپا شادّا یا زیرّا میراگ۔ 22 اِین نانگ کارونگسا میگونّی ای سدے گیابگالّا سپیرا تانگکھانبو نگاجا گیوسیود۔ یبوے سکورلا شادّا زاد نگاجا نیانچیسلا تھادّاراگ۔“ 23 حضرت پولُسی سپیرا نیانچیسلا کھونگونی جاگشیگ لدامس۔ تے جاگپو لیبّاچیگ، حضرت پولُس جوگسے کھانگپا سنگونّی سانگ مانّگا میگون دزومس۔ حضرت پولُسی نگاتوگنے پھیتوگ تشوگپا کھونگونلا خُدے گیالثیدّی سکورلا گواہ سالین ہاگوچوگس۔ یانگ حضرت مُوسیٰؔ سی شریعت تانگ پیغمبر گونّی شوقبُو گُون گیُودتے حضرت عیسیٰ سی خُدے لدامّا زادکھانّی مسیحا اینکھانبو ہاگوچوگچیسّی سونڈوس چوس۔ 24 کھاچیگی کھونگی مولکھانگون تشورتے ایمان چوس، اِین نانگ کھاچیگی ماچوس۔ 25 سامتشول سوسوے جاستے کھونگونی نانّگا میڈیگچیس سونگ یانگ کھونگون تیکانے بینگتے چھین یود زانے حضرت پولُسی مولس، ”حضرت یسعیاہ پیغمبر گیُودتے ہلژخمہ رُوح بوے کھیوجے اتا اپو گونلا لدینبا مولتے اینوگ، 26 ای میرابسپویکا سونگتے زیر، ’کھونگونی نگے شادکھانگون تشورنانگ ہاگو تھوبّا میدوگ، کھونگونی نگے چوکھانگون تھونگنانگ نگا سو اینکھانبو نگوشیسّا میدوگ‘ 27 چیازیرنا ای میرابسپوے سنینگبو سکیونگپو گیورتے دوگ، کھونگونلا کاگسپو نیامپو ما نیونگون تشوردوگ۔ یانگ میگون زومستے یودپا کھونگونی میگنے میتُھونگ، نامچھوگنے میتشور، یانگ سیمسلا ہامیگو تے مانے کھونگون نگا چھوگسلا گیورتے نگے کھونگون گیالچوگستے یودڈو۔“ 28 ”تینّابویپھیا خُدے تھارلامی لونبو یہُودی مانکھان گونّیکا کالتے کھونگونی نیانچیسپو کھیوجاگونّی ہاگوگوس“ 30 حضرت پولُس لو نیس رینشالکھانّی تینّا کھانگپے نانّگا جوگس، یانگ کھونگی تُھوگا یونگکھان تشانگمالا گاسوس جوادپین۔ 31 کھونگی ما سپوسپا تانگ چانگ گھاگژا میدپا خُدے گیالثیدّی سکورلا شادتے حضرت عیسیٰ مسیح سکورلا لابجا سالس ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation