تیموتھِی ۲ 1 - New Testament in Ladakhi Langage

حضرت پولُسی چھوگسنے سلام۔

¹ ای ایگیبو خُدے تھوگّونگس نانگجین، حضرت عیسیٰ مسیح رسُول گُونلا لدامّا زادکھانّی نگا حضرت پولُسی چھوگسنے این۔ حضرت عیسیٰ مسیح نانّگا ایمان گیُودتے، تھامیدپے میتشے سالچیسّی کھونگی وعدہ بوے سکورلا شادچیسلا، نگا کالا زادتے این۔

² ای ایگیبو نگے چیسپے بُوژا ژوگس تِیمُتھیُس لا ڈِیاد۔ خُدے یاب تانگ نگاتانگونّی حضرت عیسیٰ مسیح گُونی، کھیورانّگا شزدے، سنینگرجے تانگ جیدے سالشیگ۔

حضرت پولُسی تِیمُتھیُس لا سپوسپا۔

³ تِیمُتھیُس، کھیرانگی پھیا خُدا شُکر جُواد، کھونّگا نگے سیمس لاگمو نیامپو جابستوگ جُواد، کازوگ نگے اتا اپو گونّی جْوس تے اینپین، تشاننین میدپا نگے دُعا گونی نانّگا کھیرانگ ایدتو چواد۔

⁴ نگاتانگون بیستے چھا زانے، کھیرانگی میگچھو ایدتو یونگستے، نگا کھیرانگ نیامپو تھوگچیسّی دودپا ثانٹے راگ۔ نگاتانگون یانگسکیار نیامپو دزومّاچیگ، نگا سکیدپوے گانگچیس راگ۔

⁵ نگا کھیرانگی لدینبے ایمان بو ایدتوا یونگس، کا بو سنگونلا کھیرانگی ابی لویس تانگ کھیرانگی اما ایونیکے گُونی چوادپین۔ تینّا ایمان بو کھیرانگی نانّگا داگسانگ یودچیسپو نگا لوکھیل راگ۔

⁶ تینّا گیونتشانبوے پھیا نگے کھیرانگی کا لاگپا بور زانے، خُدے سالّا زادکھانّی کھیود پو ستانپو تانگ گیاس چوگسچیسلا ایدتو سکولّاد۔

⁷ خُدے نگاتانگونلا جیگشیس تانگ سیمسشوگس میدکھانّی سیمسجیگ سالّا مازادّا ستوبس، چیسپا تانگ رانگسیمس چون تھوبکھانّی سیمس جیگ سالّا زادتے اینوگ۔

⁸ تیبویپھیا نگاتانگی مسیح سکورلا جانماگونلا شادچیس یانگ کھونگی تونلا نگا تسونّی نانّگا یودکھانبوا، کھیرانگ ٹھیل ماٹھیل۔ خُدے کھیورانّگا سالکھانّی ستوبس نیامپو گاموےناتسُول شادچیسّی نانّگا، نگا نیامپو ناگھسباردو کھورچیسّی پھیا ڈالڈیگ چوس۔

⁹ خُدے نگاتانگون سکیوبّا زادتے میتشے ہلژخمہ جیگ پھودچیسلا بودّا زادتے اینوگ۔ ایبو نگاتانگرانگی لاس چوکھانبوے جاستے مانپا، کھونگی تھابس تانگ شزدے جاستے اینوگ۔ توس گوزُوگی سانگ سنگونلا، ای شزدے بو حضرت عیسیٰ مسیح گیُودتے کھونگی نگاتانگونلا سالّا زادچیسپو اینپین۔

¹⁰ تا کھوم چُوک کھن حضرت عیسیٰ مسیح پھیب چیسپوے، خُدے تیگون سالپو چوستے سنگون چوگّا زادتے اینوگ۔ حضرت عیسیٰ مسیح شیچیسّی وانگبو میدکھان چوا زادتے، گاموےناتسُول گیُودتے لدینبے میتشے تانگ توسگیون سونتیا لوسشیسّی لامبو ستانّا زادتے اینوگ۔

¹¹ ای گاموےناتسُولّی لدُونلا خُدے نگا چھوسشادکھان، رسُول تانگ گیرگان جیگ لدامّا زادس۔

¹² تیبویپھیا نگا یرو تسونکھانگی نانّگا ردوگنگال تھونگین یود۔ اِین نانگ نگا تیبوے پھیا ٹھیلّا میراگ، چیازیرنا نگا گیوسیود سویکا نگے ایمان چواد، یانگ نگا تانتان لوکھیل راگ، کھونگ لوگستے سکیودچیسّی جاگ تشوگپا کھونگی چھاگّا نگے ستادکھان تشانگما سکیوبستے بورّا زادِین۔

¹³ کھیرانگی نگے کانے تشورکھان تشانگما، لابجا زانگپوے سپیجیگی تشولّا کولگوشیس اینوگ۔ کھیورانّگا حضرت عیسیٰ مسیح نانّگا یودکھانّی ایمان تانگ چیسپا نیامپو تیگون چوس۔

¹⁴ یانگ نگاتانگی نانّگا یودکھانّی ہلژخمہ رُوح بوے روگس گیُودتے، خُدے کھیرانگی لاگا ستادا زادکھانّی رینچان دینباگونلا گیالّا چوستے ثونگسکیوب چوگوس۔

¹⁵ آسیہ نے اینکھانّی مسیح جابستوگپا نگے ٹوپا تشانگمے نگا پھانگستے اینکھانبو کھیورانّگا گیوس اینّوگ، پیگیلوس تانگ ہیرموگیناس گونّیانگ نگا پھانگستے سونگ۔

¹⁶ اُنیسِفُرسی نانگتشانگّونّیکا خُدے شزدے زیگسشیگ، چیازیرنا نگا تسونپا این اِین نانگ کھو مانے ماٹھیلّا، لان مانگپو نگا تُھوگا یونگس یانگ سیمسّو تانگس۔

¹⁷ رومی نانّگا لیبستے کھوے نگا تھوبتھوب تشوگپا کارونگسا تشانگمالا تسالتوگ۔

¹⁸ مسیحا لوگستے پھیبسّی توسلا، مسیح کھوا سنینگرجے زادشیگ۔ اِفسُس سی نانّگا کھوے نگا تسامشیگی جابستوگ گیالّا چوستے جْوس کھانبو تِیمُتھیُس کھیورانّگا گیالّا چوستے گیوس اینّوگ۔