کورینتھیپའ ۲ 1 - New Testament in Ladakhi Langageحضرت پولُسی چھوگسنے سلام۔ 1 ای ایگیبو خُدے تھوگّونگس نانگجینلا، حضرت عیسیٰ مسیح رسُول گُونلا لدامّا زادسکھانّی حضرت پولُسی چھوگسنے این۔ نگاتانگی فونو تِیمُتھیُس نگا نیامپو یود، یانگ نگے ای ایگیبو کرِنتُھس خُدے عبادت خانہ ماتشاد، اخیہ پا یولّی نانّگا یودکھانّی خُدے می ہلژخمہ تشانگمالانگ کالّاد۔ 2 خُدے نگاتانگونّی یاب تانگ حضرت عیسیٰ مسیح کھیوجاگونلا شزدے تانگ جیدے سالّا زادشیگ۔ خُدے سیمسلا جیدے سالّا زادس۔ 3 نگاتانگونّی، حضرت عیسیٰ مسیح یاب خُدا ستودپا پھولشیگ۔ کھونگ نی، سنینگرجے ابا تانگ سیمسدے تشانگمے خُدے جُوگستے اینوگ۔ 4 نگادانگونّیانگ جانماگونلا سیمسّی نانّگا جیدے تانگ نیانچیسّی پھیا، خُدے نگاتانگونلا باردو تشانگمے نانّگا سیمسدے سالّا زادّانوگ۔ خُدے نگاتانگونلا سالّا زادکھانّی تینّا ژوگس جیدے نگادانگونّیانگ باردوی نانّگا یودکھانگونلا تانگنیانین۔ 5 مسیح نانّگا نگاتانگونّی ردوگنگال گُون رگیاسین چھا زانے، نگاتانگی سیمسّی نانّگا ژیدیانگ مسیحا گیُودتے رگیاسین۔ 6 کالتیس نگاجا گُون باردوی لچیدّی نانتے یودنا، تیبو کھیوجاگونلا تھارپا تانگ کھیوجے نانّگا جیدیے پھیا این۔ یانگ کالتیس نگاجا گُونلا جیدے سالّا زادنا، تیبوانگ کھیوجاگونّی سیمسدے پھیا این۔ تینے نگاجا گُونی کھورین یودکھان ژوگس ردوگنگالبو کھیوجاگونّیانگ زودپا تانگ سنینگروس نیامپو کھورین۔ 7 نگاجا گُونلا لوکھیل راگ، کھیوجاگون نگاجے ردوگنگالگونّی نانّگا ڈیس پاسانگ، کھیوجاگون نگاجے سیمسدیے نانّگانگ ڈیسین۔ 8 فونو گُون، کھیوجاگونلا نگاجے آسیہ یولّی نانّگا باردو کھورکھانگون ہاگوگوشیس اینوگ، تے کھوروی لچیدپو نگاجا گُونی کھیود سانگ مانّگا تھالتے یود پاسانگ، نگاجے سونتیا لوسشیسّی ریوابو میدکھان سونگ۔ 9 لدینبا، نگاجا گُون شیانوگ سام۔ اِین نانگ نگاجا گُونلا نگاجا رانگی کھیودگونّیکا راگلاستے مادوگا، شیکھانگون سونتیا لانّگا زادکھان خُدایکا راگلاستے دوگّوشیسّی پھیا، تیگون جونگستے اینوگ۔ 10 کھونگی نگاجا گُون شیچیسّی جیگسپاگونّی کانے تھار چوگّا زادتے اینوگ، یانگ یانگسکیار تھار چوگّا زادِین۔ کھونگی یونگچیسچانّی توسّی نانّگانگ، نگاجا گُون تھار چوگّا زادچیسپویکا نگاجا گُونی لوکھیل بورّاد۔ 11 یانگ کھیوجاگونّی نگاجے پھیا، دُعا ژوچیسگون گیُودتے نگاجا گُونلا روگس چوانوگ۔ تینے می مانگپوجیگی خُدا شُکر جوین، چیازیرنا خُدے شزدے نیامپو، مانگپوجیگی نگاجے ثونگسکیوبّی پھیا دُعا جوکھانگونلا لانسالّا زادتے اینوگ۔ حضرت پولُس میسکیودچیسّی گیونتشان۔ 12 نگاجا گُونی لوکھیل تانگ سیمس لاگمو نیامپو زیرنیانین، نگاجا گُون ای دُنیائی می یانگ میگسالّی کھیوجاگون نیامپو دوگ زانے، خُدے سالکھانّی میتشے ہلژخمہ تانگ ٹانگپوے تشولّا پودپین۔ نگاجا گُون میشیسرابسّیکا مانپا، خُدے شزدے کا راگلاستے دوگسپین۔ 13 نگے ایگے گُون سالپو این، تیگونّی نانّگا، یانگ تونتاگ چانگ باستے مید، یانگ کھیوجاگونلا ہاگوچیسلانگ لامو یود۔ نگے ریوا چواد، جاگشیگ کھیوجاگونّی نگاجے سنینگی نانّگا یودکھان تشانگما ہاگو تھوبین۔ 14 کھیوجاگونّی نگاجا داگسا سینگ ہاگو ماتھوبنانگ، حضرت عیسیٰ مسیح لوگستے پھیبشیسّی جاگّا، کھیوجاگونّی نگاجا، سالپو چوستے ہاگو پاسانگ، کھیوجاگون نگاجے پھیا پھوسو تشورین کازوگ کھیوجے پھیا نگاجا گُون پھوسو تشورّاد۔ 15-16 کھیوجے ہاگوی نانّگا نگا لوکھیل یودپا، نگے کانے کھیوجا پھانتھوگس مانّگا تھوبچیسّی پھیا، نگا کھیوجاگون نیامپو تُھوگا یونگچیسلا لان نیس تھابسلدینگسپین۔ تانگپو مکدنیہ یولّا چھا زانے یانگ نیسپا لوگستے یونگ زانے، تینے نگا یہُودیہ یولّی نانّگا بیسلا چھا زانے، گھوسدوم یودکھانگون کھیوجاگونّی تانگچیسّی ریوانگ اینپین۔ 17 اِین نانگ کھیوجا کھاچیگی، کھوے تھابسلدینگسگونّی نانّگا گیورجا چیپھیا کھیونّگانوگ زیرتے ٹیثیدچیس اینوگ۔ چی کھیوجاگونّی، نگے نگارانگی تھابسلدینگسگون سامبا ماتانّگا چوستے اینوگ سامّا راگا؟ چی کھیوجاگونّی، نگا دُنیائی می گون ژوگس اینوگ سامّا راگا، کاگونّی ”چوین“ زیرّانوگ اِین نانگ چوا مانوگ؟ 18 اِین نانگ کازوگ خُدے ایمان چان جُوگستے این، نگے کھیوجاگونلا ”نگا یونگین“ زیرکھانّی کھاچھادپوانگ ٹانگپو اینپین۔ نگے ”مان“ زیرچیسپوا ”این“ میزیر۔ 19 خُدےبوژا، حضرت عیسیٰ مسیح ”این“ یا ”مان“ مولچیسّی نانّگا تھاما تھےژومس چوا زادّا مانوگ۔ کھیوجاگونلا فونو سِیلاس، تِیمُتھیُس تانگ نگے چھوسشادکھانبو نی کھونگ جُوگستے این، یانگ کھونگ نی خُدے ”چوا زادچیسّی“ ستاگس پو اینوگ۔ 20 چیازیرنا مسیحا گیُودتے، خُدے وعدہ تشانگما ڈوبچوگّا زادّانوگ، تیبویپھیا نگاجا گُونی امین زیرتے خُدا ستودپا پھولّاد۔ 21 نگاجا تانگ کھیوجا نیسکوے ایمان مسیح نانّگا ستانپو گیورچوگّا زادکھانبو نی خُدے جُوگستے اینوگ۔ تھارپے پھیا کھونگی نگاتانگون لدامّا زادتے اینوگ۔ 22 خُدے ہلژخمہ رُوح نگاتانگونّی سنینگی نانّگا تھیتسے تسوگسلا بورّا زادتے، نگاتانگون کھونگی اینکھانبو ستانّا زادس، یانگ تیزوگ زادچیسپوے خُدے نگاتانگونلا زادکھانّی وعدہ تشانگما ڈوبچیسپو تانتان چو زادس۔ 23 تا نگے زیرچیسچانگون ٹانگپو اینکھانّی گواہ خُدے این۔ نگا کرِنتُھس لا لوگستے مییونگچیسّی گیونتشانبو نی، کھیوجاگون نگے ماثانٹے کھاسکیچیسنے سکیوبچیسپو اینپین۔ 24 تیبو نی، کھیوجے ایمان چوکھانبو لاگلینّی نانّگا کھیونگ زیرتے وانگ تانگچیسپو مان، اِین نانگ کھیوجاگون سکیدپوے گانگچیسّی پھیا نگاجے کھیوجاگون نیامپو لاس چونیینراگ۔ کھیوجارانگی ایمان چیگپو گیُودتے کھیوجاگون ستانپو لوسین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation