प्रकाशित वाक्य 1 - लाहौली बाइबिल

¹ दि कताब दुह गप्पातु पाहठी कंड्रा अंऊ परमेश्वरे यीशु मसीह बि कंङाते। ताकि दुह एनोह परगरा तिंङ दुह गप्पातु पाहठी कंड्री तरपोतो अंऊ युरनाह शोतो। यीशु ज़ि एनोह स्वर्गदूता बि दुह खबर रंङ साते गिऊ कछंङ मतलब एनोह दासबि चेआतो अंऊ गेह तंङातग। गेह दि लेख रिंङ परमेश्वरो वचन ए सच्चाई ओ शिक्षा चेआतग अतु जानकारी गिह्बी यीशु मसीह रांहषी ततो।

² झांह लेह, गेह दुह भत्ते धिर चेआतग अंऊ गेह तंङातग। गेह दि लेख रिंङ परमेश्वरो वचन ए सच्चाई ओ शिक्षा चेआतग अतु जानकारी गिह्बी यीशु मसीह रांहषी ततो।

³ परमेश्वर हर इच्च़ा दुह मीहबी आशीष रमतो अंऊ दि भविष्यवाणी बि ऊईतिंङ पढ़ाके सुनाएच़ा, दंङ दुह हर इच्च़ा दुह मीहबी आशीष रमतो अंऊ दिबी रेड्रा दंङ दिबी मनेक्च़ा। छना कुचे दि गप्पा युरनाह शोतो।

निह्ज़ी कलीसिया बि यूहन्ना ओ नमस्कार

⁴ गेह यूहन्ना, दि डाक केतिंङ निह्ज़ी कलीसिया बि चेहच़ातग अंऊ आसिया प्रदेशारिंङ रिंङ तोह। गेह प्रार्थना लहज़ातग कि परमेश्वर अंऊ तोह, दंङ अंऊ हमेशा बेहच़ी तोहई, दंङ अंऊ अपिमी तोह; दंङ दुह निह्ज़ी आत्माओ तरफे, अंऊ परमेश्वरो सिंहासनो तुईज़ी तोह, केतिंङ मोह्ड़े दाह ए शांति खोकसोतो।

^5-6 दंङ यीशु मसीहू तरफे केतिंङ मोह्ड़े दाह ए शांति खोकसोतो, अतु बचनो टोईच़ी विशवास लेह तरपोंई दुह ए तोह सिमी थल यह्च़ा श्रींङे इलि दंङ दुह दि संसारो रज्ज़ा तु अधिकारी तोह। दोई हेंदंङ साते दाह लहज़ा दंङ हेंदिंङ बचाएच़ा, दोई एनोह शुहई दोरच़ी हेंदिंङ पापो दोरच़ी बचाएच़ा। दोई हेंदिंङ झांह ठ्रोह मीह बणाके चरच़तो, अतु परमेश्वर दोतु रज्ज़ा तोह दंङ दोई हेंदिंङ एनोह बाह परमेश्वरो थल्जी यहुदी पुरोहित बणाके च़रति। दोबि आदर ए अधिकार हमेशा खोकसा लोहतो। अमीन।

⁷ रेड्रुं, दुह डुह रंङ साते अपिमी तोह; दंङ हर इच्च़ा मीह दोबि खमतो, देर तचेक कि अंऊ मीहरे दोऊ मौतो ज़िमेवार तोईरे, दोरे ला दोबि अपि खमोर। धरतीऊ भत्ते मीहरे जोरे-जोरे क्रपोर अपेहल दोरे दोबि खमोर। वोई झांह शोतो! अमीन।

⁸ प्रभु परमेश्वरे कुट्रा, “गेह अल्फा ए ओमेगा शुगाह, मतलब, शुरूआत ए अंत शुगाह। गेह ए शुगाह अंऊ तोतोग, अंऊ तोईगा, दंङ अंऊ एंतेग अपिमी तोह दंङ सर्वशक्तिमान तोह।”

यूहन्ना बि मसीहू दर्शन

⁹ “गेह यूहन्ना, केहतु साथी विशवासी, दंङ यीशु रंङ साते केहतु एकता ओ वहज़ा ज़ि गेह केतंङ साते परमेश्वरो राज रिंङ, दुखा रिंङ, दंङ दुह सहन लहज़िमी शाक्ति रिंङ सहभागी तोतोग, गिह्बी पतमुस टापूरिंङ कैदी बणाके चरच़ि छना कुचे परमेश्वरो खबर ए यीशु दोरच़ी प्रगट लहसी सच्चाई ओ प्रचार लहज़ा।”

¹⁰ गिह्बी आरामो ध्याड़ारिंङ अईतवारे अंऊ परमेश्वरो ध्याड़ा तोह गेह परमेश्वरो आत्मा च़ि एनोह वशारिंङ लहरी, दंङ गेह घेंङौ थल्जी ऊईतिंङ दि कुट्री रेड्रीगा, अंऊ सुरमेऊ ठ्रोह जोरे संङा सगरंङ साते दि कुट्राते,

¹¹ कि “छिल्ला केई खंड्रातन, दोबि कताबारिंङ च़ेहसी ते निह्ज़ी कलीसिया बि चरच़ि च़रतु, अंऊ दि शहरारिंङ तोह, इफिसुस, स्मुरना, पिरगमुन, थुआतीरा, सरदीस, फिलेदिलफिया ए लौदीकिया।”

¹² गेह दि खंड्रिमी थल्जी थलका यहच़िगा कि अरिया गेरंङ साते गप्पा लहज़ा। अपेहल गेह किरज़े इलिगा, दंङ गेह ज़ङों निह्ज दिवट संजवा रंङ साते खंईगा,

¹³ दंङ दुह संजवा तु बिचंङ इच्च़ा मीह खंणीर, अंऊ इच्च़ा गंङमी ओ ठ्रोह तंङफाते, दोई इच्च़ा बागा इच्च़ा लम्हें धकते कि खमज़ेर लेहसी अंऊ दोऊ कोंज़ो ओ कछंङ तचेक तोहई, दंङ एनोह काह् रिंङ छंङसी रंगो कमरबन्द छ़ुह्च़ी तहरे।

¹⁴ दोऊ पुंज़ो क्रा छंङसी च़मतु ठ्रोह या मुघतु ठ्रोह तोहई। दोऊ टिरा मेहू ठ्रोह चमक्केपी लेहकी तोहई।

¹⁵ दोऊ कोंज़र रिओह ठ्रोह चमक्केपी लेहकी तोईरे अंऊ भटीरिंङ चाह्पि लहसी तोहई, अपेहल दोई कुट्री लेहती दोऊ सग झांह ठ्रोह तोहई छना इच्च़ा मोह्ड़े बेंडी ऊ शवात।

¹⁶ दुह एनोह सुचंङ गुह्ट्रे निह्ज कर तहरे, दंङ दोऊ मोह्द ओ तेज झुल्ला हासी धारी तलवार हुंच़ा तोहई; दंङ दोऊ मोह्द निहरो टेमो चमकेक्पा ऐके ओ ठ्रोह चमकेपी लेहकी तोहई।

¹⁷ अपेहल गेह दोबि खंड्रातग ता दंङ गेह दोऊ कोंज़ो टोईच़ी दह्चे इलिगा। गेह इच्च़ा सिए मीहू ठ्रोह शुहचे इलिगा। दंङ दोई गिऊ टोईच़ी एनोह सुचंङ गुह्ट्र केहच़ी कुहतो, “बेऊ था; गेह मुण्डो ए थल मुखङ तचेक शुगाह, दंङ गेह दुह शुगाह अंऊ जहानो जुंशी शुगाह।”

¹⁸ गेह इच्च़ा फेरा सिए इलजी तोईगा। पर हेंतेग गेह श्रींङे तोतोग दंङ हमेशा गेह श्रींङे बंङज़ोग। सिमी ए अधोलोको केईटी गिऊ कछंङ तोतोर।

¹⁹ झांह लेह अंऊ गप्पारे थले शुहबी तोह, दुह भत्ते चे च़रतु।

²⁰ हेंतेग गेह कमोग कि गिऊ सुचंङ गुहड़रिंङ निह्ज करज़े तु छि मतलब तोह दंङ ज़ङों निह्ज दिवटो छि मतलब शुह। दिऊ मतलब दि तोह: निह्ज कर दुह स्वर्गदूता तु पाहठी कंड्रातोर अंऊ दोच़ी निह्ज कलीसिया ओ रखवाली लहज़ातोर दंङ निह्ज ज़ङों दिवट निह्ज कलीसिया बि कंड्रातोर।