3 यूहन्ना 1 - लाहौली बाइबिलअभिवादन 1 गेह यूहन्ना, अंऊ कलीसिया सेंहणा दिह डाक प्यारे साथी गयुस कनिंङ चेहच़ातग, अतंङ गेह हेले दाह लहज़ातग। 2 हे प्यारे, गिऊ दि प्रार्थना तोह कि छना काह केनोह विशवासा रिंङ तरक्की लहज़ी लेह्की तोतोंई, ध्वांए ए काह भत्ते गप्पारिंङ तरक्की लोहू, दंङ रूठे रंङ बंङज़ु। 3 छना कुचे रेह साथी विशवासी ज़ि अंज़े ञेंतिंङ कंड्रा तोह कि काह परमेश्वरो हेले ऊ अमरिंङ श्रींङमी लेहकी तोतोन, दंङ गेह महस ए खुश शुईगा। 4 अपेहल लाह गेह दिह रेड्रा तोग कि दोरे मीहरे अंऊ गिऊ कटुतु ठ्रोह तोतोर दोरे दुह ए तरीका रंङ साते श्रींङमी लेहकी तोतोर, अंऊ सच्चा परमेश्वरे हेंदिंङ कांहषी ततो, दंङ झांह लेह गिह्बी दिबे लाह महस खुशी खोकसा। गयुसो तरीफ 5 हे प्यारे, केई ईमानदारी रंङ साते हेंदु साथी मसीह तु मदत लहच़िमी थल्जी महस कम लहसी तातन, अंऊ दोच़ी रूठे खबरो प्रचार लहज़िमी थल्जी पिला हासी यात्रा लहज़ातोर देर तचेक कि केई दुह मीहतु लाह मदत लहज़ातन अतिंङ केई सेहच़ातन ए माह। 6 दोतु बिचंङ ज़ि रेह मीहच़ी देहर कि कलीसिया ओ विशवासी तिंङ दिह कांहषी ततोर कि केई केनोह साथी विशवासी तंङ साते धिंङघा दाह लहज़ातन। दा गेह कनिंङ कुट्री तातग कि कनिंङ झांह ठ्रोह मीहतु मदत लहच़ी ज़रूरी तोह, अपेहल दोरे कांह कछंङ ज़ि अच्च़ा योर। छना कुचे परमेश्वरा बि खुशी शुहबी 7 छना कुचे दोरे मीहरे मसीहू कमो थल्जी हुंच़ा शुहरे, दंङ ऊई जातितु विशवासी तु दोरच़ी छिल्ला मदत माह लेहपच़ातोर। 8 झांह लेह दोतु केनातु चुंङ स्वागत लंहि, दंङ अंऊ लाह चीज़ो दोतिंङ ज़रूरत तोह दुह दोतिंङ रांई ताकि सच्चाई ओ थल्जी दोतु कमारिंङ हिस्सादार शुहचे योंई। दियुत्रिफेस ए दिमेत्रियुस 9 गेह तुहई लाह दिह कलीसियाओ विशवासी तिंङ इच्च़ा डाक च़ेहसी तरेग, पर दियुत्रिफेस गिऊ हुकुम मनेक्च़ी रंङ साते इंकार लहज़ा, छना कुचे दुह हमेशा ऐनाह ए कलीसियाओ सेंहणा बड़ेक्पी जुंज़ाते। 10 झांह लेह अंऊ मुक्का गेह अपोग दंङ गेह कलीसियाओ मीहतंङ साते रूठे रंङ गप्पा लोहग कि दोई छि-छि लहच़ी लेहकी तोह, मतलब ञेंहतु टोहकठे हप्सी कमो दोष लगासी लेह्की तोत, धोंण ए मशत, दोरे ता एनर (रूठे खबर) प्रचार लहज़ा विशवासी न्वातिंङ स्वीकार ला माह लहज़ा, दंङ अच़ि दोतिंङ स्वीकार लहज़ी जुंज़ातोर, दोतिंङ मना लहज़ा, दंङ दोतिंङ कलीसिया ओ दोरच़ी धकतेखा हुंच़ी केट्रा। 11 प्यारे मित्रा, दुह मीहतु नकल थालोहू अंऊ बुराईओ कम लहज़ातोर, पर दुह मीहतु थले ज़ोज़ा अंऊ रूठे कम लहज़ातोर। अपेहल अच़िया रूठे कम लहज़ा दंङ दोई दि साबित लहज़ा कि गेह परमेश्वरो योह शुगाह दंङ अंऊ बुराई लहज़ा दोई परमेश्वर सेहतिर माह। 12 कलीसिया रिंङ दंङ दिमेत्रियुसो बारे भत्ते ज़ि, वरन सच्चाई ला ऐने गवाही रांई; दंङ हेंज़ी ला गवाही रंड्रातंई दंङ केई ञेंच़ातंई कि केहतु गवाही हेले शुह। अन्तिम अभिवादन 13 ऊई लाह महस गप्पा तोह अंऊ गेह केतिंङ कंड्री तातग पर गेह दोतिंङ झांह ठ्रोह इच्च़ा डाकरिंङ च़ेहसी माहतग। 14 पर गिह्बी उम्मीद तोह कि गेह युरनाह केतंङ साते दोओग, दंङ सामटे बंङज़ा गप्पा लोहग। 15 गेह विनती लहज़ातग कि परमेश्वरे कनिंङ शांति रमतो देरकि विशवासी साथी ज़ि कनिंङ नमस्कार कुट्रातोर, दोहर कि विशवासी साथी तु मिन लेहपच़े-लेहपच़े नमस्कार कुह्चे च़रतु। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation