Zefania 1 - E’yo Siza Alatararu Munguniri BIBLIA

O’du Yehovani adra ’bazuri

¹ E’yo Yehovani ecapi Zefania Kusi mvi vu; Kusi Gedalia mvi, Gedalia Amaria mvi, Amaria Heze­kia mvi; ewu Yosia, Amoni mvi, opi Yudaarinisiri.

² Ma nga afa dria ovupi nyaku ma dria’diyi dri la teketeke ra, Yehova ’yoni.

³ Ma nga ’ba pi dri ja anyapa be; ma nga aria ’bua ’diyi pi dri la e’bi miria ’diyi be, kumu pi ’ba onzi ’diyi be; ma nga ’ba de nyaku ma driasi ra, Yehova ’yoni.

⁴ Ma nga ma dri eju Yuda pi ma dria, ’ba adripi Yerusalemua ’diyi be; ma nga vini Baali ma joloko pi de pari ’doriasi, ru Kemarini pi, kuhani wura tokoni ’diyi be;

⁵ azini vini ’ba ongulumu ’bua ’diyi inzipi jo senderu ma dria ’diyi pie; ’ba inzipi oyo sopi Yehova ma rusi azini Malikamu ma rusi indi ’diyi pie;

⁶ azini yi’i Yehova ma vuti kupi bikokoro ja ’diyi pie, azini yi’i Yehovani ndrupi ku, kani e’yo zipi eri tia ku ’diyi pie.

⁷ Mi adri ciri Yehova Mungu ma drilia! O’du Yehovanirini ovule inyia­risi; te Yehova ede afa edetaru ngonde ’bo, eri ’ba vini omu ini ’diyi alaro’i ’bo.

⁸ Te eri nga eca ’dini o’du edeta YehovanirisiMa nga panga onzi fe ’ba ’wara pi dri, opianzi pie, ’ba dria bongo ejile angu aziniasiri supi ’diyi pie.

⁹ O’du nde ’dasi ma nga ’ba dria mbupi jotilia ’diyi pi dri panga onzi fe ra, yi’i fepi ’ba ambo yini ’diyi ma joni gazu tre egana pisi lokiri be ’diyi.

¹⁰ Yehova kini, O’du ’dasi awuni nga efu E’bi ma Kaliti­lesi, azini cereni nga enga aku ma esele iriri ma alia, o’duko afipi mgbeeri nga enga oni dria indi.

¹¹ Emi o’be cere, emi ’ba adripi Makitesia ’diyi la! A’disiku ’ba dria afa ozipi ’diyini ovule yorisi; ’ba dria dahabu okupi yi vu tre ’diyi ja dri ’bo.

¹² Te eri nga eca etu nde ’dasi ’dini, ma nga Yerusalemu ma ale nda acisi, azini ma nga panga onzi ofe ’ba ovupi ewa ngaraka zole kurile ’diyi dri,’yopi yi ma asia, Yehova ngani onyi ’ye ku, ngani vini onzi ’ye ku indi ’diyi dri.

¹³ Azini lonyi yini ’ba nga opa ra, jo yini nga ofu andruru. Adaru, yi nga jo si ra ti, te yi ngani ovu alenia ku; yi ka pati zabibuni sa ra ti, yi ngani suni mvu ku.

¹⁴ O’du amboru Yehovaniri ovu inyia, eri ovu inyia, eri emu mbele­mbele tu; o’duko o’du nde Yehovanirini; ’ba okporuri wu ’dale candisi tu.

¹⁵ O’du nde ’dari ovu o’du adraniri, o’du imvoni azini candini, o’du afa ezazurini, azini anguni ofuzu andrururini, o’du angu bizani, azini angu omuniritini, o’du iritini, azini angu bipi iniciciru idururiniri,

¹⁶ o’du gukani azini alicereni aku amboru abi kaliru be ’diyi pi ma dria abi uru izuru nde ’diyi be.

¹⁷ Azini ma nga candi amboru eji ’ba ma dria,’dini yi nga aci ekile ’ba mile kokorurile, a’disiku yini onzi ’yele Yehova vurisi; yi nga ari yini ada ekile irifurale, azini yi nga za yi ma ruaari da ekile dakale.

¹⁸ Kani dahabu yini, kani mele yini ngani eco yi opazaru o’du adra Yehovanirinisi ku. Te angu driani nga ovu dri jazaru adra a’yaru eriniri ma acisi; erini ngale ’ba dria adripi angu ndea ’diyi ma e’yo delerisi, e, deza nde nga ovu uriuriru tu.