’Yeta 1 - E’yo Siza Alatararu Munguniri BIBLIA

Orindi Alatararuri ma e’yo azizuri

¹ Waraga oko mani sileri ma alia, Teofilo, ma ece e’yo dria Yesuni e’dole ’yele azini imbale

² ecazu kpere o’du erini tuzu ururia ’diyi; de nga eri tuni ku eri fe azita Orindi Alatararusi ’ba erini ti opele ’diyi dri oko.

³ ’Ba nde ’diyi dri eri ece i ngulupi idriru candi ini nyaleri ma vutia, eceta adaru karakarausi, i ecezu ’ba nde ’diyi milia o’du kali su e’yo suru Mungunirini oluzu.

⁴ Te yini yi okuria tualu eri be eri fe yi dri azita kini yi ma nga Yerusalemuasi ku, te yi ma te aziza Atani; Aziza nde, eri kini, emini ndra erile ma vu ’bori;

⁵ te ada Yohana fe ndra baputizi yisi, te ace o’du were emi nga baputizi a’i Orindi Alatararusi.

Yesuni tuzu ’buari

⁶ E’yo ’disi yi ka yi oku tualu, yi zi eri tia kini, Opi, mi curu’do Israeli dri suru opini omvi ra ya?

⁷ Eri omvi e’yo yi tia, ’Di e’yo emini yo, ewu kani eli Atani pele ovuzu okpo ini ma alia ini lelerile ’diyi nizu.

⁸ Te emi nga okpo isu Orindi Alatararu ka eca emi dria ra, emi nga e’yo mani ma eti nze Yerusalemua, Yudiaa dria, azini Samariaa, cazu kpere nyaku ma kalatini asiria.

⁹ Eri ka e’yo ’diyi ’yo ’bo, yini eri ndreria eri ovu ’duzaru uru, iriti a’bu eri yi milia.

¹⁰ Yini ndreria uru ’dani ’bua erini muria, emi ne, ’ba iri bongo be emveru yi oso pa yi ageia,

¹¹ yi ’yo, Emi ’ba Galilia ’diyi, emi oso pa luzu uru ’dani a’di e’yosi ya? Yesu engapi emi eselia muzu ’bua ’diri, eri nga eca dika ekile emini eri ndrele muria ’buarile.

’Ba Yudasi pariari pezuri

¹² Yi mvi Yerusalemua engazu oni omvele Mizeituniriarisi; oni nde ovu ogogo Yerusalemu ageia ekile acita sabatonile.

¹³ Yi ka fi ra yi tu jo uru pari yini adrizuri Ina alia; Petero pi Yohana pie, Yakobo pie, Andarea pie, Filipo pi Toma be, Baritolomayo pi Matayo be, Yakobo Alifayo mvi pi Simoni Zelote pie, Yudasi Yakobo mvi pie.

¹⁴ ’Ba ’diyi dria yi ovu asi alusi Mungu zizu, okuyi be, azini Mariamu Yesu ma andri pie, adripi erini pie.

¹⁵ Etu nde ’dayisi Petero eri so pa adripi ma eselia (’ba yi okupi nguluru ’diyi ma kalafe ovu ekile turu alu kali irile), eri ’yo kini,

¹⁶ Adripi mani, e’yo siza ma ’ye i tro­tro ekile e’yo Orindi Alatararuni ecele ndra oko Daudi ma tisi Yudasi ’ba Yesuni bipi ’diyi ma dri cepirisirile.

¹⁷ Eri ovu ndra lazaru ama be, azini eri isu azi ’dori ma esele indi.

¹⁸ (’Ba nderi nyamuko e’yo onzi erini ma oyasi; eri eco i va o’buzaru, eri ma ale afi ra, fini efu amve mee.

¹⁹ E’yo nderi ku ’ba adripi Yerusa­lemua ’diyi vu dria, ’dini yi ’da nyamuko ’diri ma ru Akeledama’i ani, efiniri Nyamuko Arini.)

²⁰ Te eri ovu sizaru buku Zaburini ma alia, Eri vile aku ma cea andruru, ’ba azini ma la alenia aluni ku; azini ’Ba azini ma nga azi eri pariani.

²¹ E’yo ’disi ’ba ovupi tualu ama be. 0’du dria Opi Yesuni efiria azini furia ama eselia,

²² engazu Yoha­nani baputizi feria ecazu o’du Yesuni engazu ama eselia muzu ’buaria-’ba ’diyi ma eselia ama ma pe ’ba alu ovuzu tualu ama be e’yo Yesuni engazuri ma eti nzezu.

²³ Yi ope ’ba iri, Yusufu omvele Barasabari, ru erini aziniri Yusito’i, azini Matia.

²⁴ Yi zi Mungu tia kini, Mi Opi ’ba ma asi nipi driari, mi ece ’ba alu mini pele ’ba iri ’diyi ma eselia

²⁵ azi ’ba ti opelerini Yudasini ndra kule muzu i parisi ra ’dori bizuri’i.

²⁶ Yini odrisi ’beria, Odrisi ’de Matia ma dria; La eri tualu ’ba ti opele mudri drini alu ’diyi be.