Nehemia 1 - E’yo Siza Alatararu Munguniri BIBLIA

Zita Nehemiani zile Mungu tia Yerusalemu ma e’yosiri

¹ E’yo Nehemia Hakalia mvini. Eri nga eca ’dini mba Kisilevi ma alia, eli kali iririsi, mani ovuria Susani opi vile akua,

² Hanani adripi mani ma azi alu nga emu, eri’i ’ba azini engapi Yudaa ’diyi be indi; ma nga di zi tinia oloko ’ba Yahudini yi opapi ’ba uruni jile ati’baru ’diyi ma eselia ’diyi ma e’yosi, Yerusalemu ma e’yosi indi.

³ Yi nga olu ma tia kini, ’ba jolokoru ’ba juruni jile ati’baru ’diyi ma eselia acepi angu ndea ’dayi ovu inzata amboru ma alia, drinza be; abi kaliru Yerusalemuari nyo i ’bo, ve kalitile erini acisi ’bo.

⁴ Eri nga ovu ’dini, ma ka e’yo ’diyi eri ’bo, ma ri va wuzu mindresi, ma ovu candisi tu o’du fudri ci; ma ’da nyaka, ma ovu e’yo zizu Mungu ’buari ma drilia.

⁵ Ma ’yo kini, Ma matu ’ba mi vu, Yehova Mungu ’buari la, Mungu amboru uriuriruri, aziza erini ma ta mbapi yiki aleruri be ’ba eri lepi azini azita erini ’yepi ’diyi vuri;

⁶ mi zi bile mini pi mile be curu’do ati’bo mini ma zita erizu, mani zile mi tia curu’do etu be ini be rra, ati’ba mini Israeli anzipiru ’diyi driri, mani e’yo onzi Israeli anzipini, amani ’yele mi vu ’diyi e’daria, Ada, ma’i, ori’ba ma atini ’diyi be, ama ’ye e’yo onzi ’bo.

⁷ Ama ’ye mi vu onzikanyaru tu, ama mbani azita mini azile ndra ati’bo mini Musa tia ’diyi pi ma ta ku, azita mini sile ’diyi pie, e’yo liza mini pie.

⁸ Ma matu ’ba mi vu, mi dri ma avi ku e’yo mini ndra azile ati’bo mini Musa tiarisi, kini, Emi ka eza ra, ma nga emi ere amve ’ba jururu ma eselia;

⁹ te emi ka emvi ma vu, azita mani inzizu ’yezu indi, ’ba emini ka ovu erezaru kpere ’bu tini asiria ti, engazu ’dale ma nga yi oku ra, ejizu pari ndra mani pele kini ma ru ma adri aleniaria.

¹⁰ Te ’ba ’diyi ovu bani ati’ba mini, suru mini indi, mini onzele okpo mini amboru azini dri mini okporu turisi ’diyi.

¹¹ Opi la, ma matu ’ba mi vu, mi co bile mini zita mi ati’boni zileri erizu fo, ati’ba mini lepi tu ru mini rupi ’diyi ma zita erizu indi; mi fe drileba mi ati’bo dri andru, ma matu ’ba mi vu, mi fe eri ma isu yiki agu ’diri ma milia.