Marako 16 - E’yo Siza Alatararu Munguniri BIBLIA

Yesuni engazu ’ba draza ma eselia

¹ Sabato ka aga ’bo, Mariamu Magadaleni pi, Mariamu Yakobo ma andriruri pie, Salome be, yi nga ajinguru arikariru je, yi ma mu eri rua efi ani.

² O’biti drio drio, o’du sabatoni okorisi, yi nga mu gule tia etuni efuria.

³ Yi ri te e’yo ’yo yi eselia kini, A’dini nga era gu gule tiliarisini ya?

⁴ Te yini mile engaria, yi ndre de gu era ’bo; te eri era amboro tu.

⁵ Yini firia gule alia ’bo, yi nga ’ba karilauru ndre erini riria kala dri ndiria, de bongo emveru izuro eri ruaa judi; yi nga osu tu.

⁶ Eri nga ’yo yi tia kini, Emi osu ku; emi Yesu Nazaretiarini ndru, ndra yini dile pati ruaari’i. Eri enga ’bo, eri ’doa yo; emi ndre pari ndra yini eri ’bazuri do.

⁷ Te emi mu e’yo olu ’ba erini imbale ’diyi ma tia, Petero tia indi, kini, eri mu emi drilia Galilia; emi nga eri ndre ’dale, ndra ’erini ’yale emi tiarile.

⁸ Yi nga fu amve, nga apa gule tiarisi apa apa; yi ruari oya oya asi osuza be tu; ’yoni e’yo ’ba azini be ku, urini yi bilerisi,

Yesuni i e’dazu Mariamu Magadaleni dri

⁹ Eri ka enga ’bo, o’du alu sabatonirisi o’biti drio drio, eri nga li rua ece oko Mariamu Magadaleni idri, ndra erini orindi onzi odrozu ’eri ma alia aziriri’i.

¹⁰ Oku nderi inga mu e’yo olu ’ba ndra ovupi eri be ’diyi ma tia, yini otaria candisi awu be.

¹¹ ’Ba nde ka eri kini eri idriru, azini eri ece di i rua oku nde dri ’bo, yi a’ini ku.

Yesuni i e’dazu ’ba i vuti bipi iri ’diyi dri

¹² Vilerisi eri nga i rua ece wura andinisi ’ba iri yi ma eselia ’diyi dri, yini aciria geria, muna aseari.

¹³ ’Ba nde ’diyi nga fu mu e’yo olu ’ba acepi ’diyi ma tia, te yi a’ini vini ’ba ’diyi ku indi.

Yesuni e’yo azizu ’ba mudri drini alu ’diyi ma tia

¹⁴ Vilerisi eri nga i rua ece ’ba mudri drini alu ’diyi dri yini riria nyaka nyaria; eri nga ega yi dria a’itaako yini pisi asi mbaza yini be, yini ’ba eri ndrepi de erini engaria ’boria ’diyi ma e’yo a’ile kurisi.

¹⁵ Eri nga ’yo yi tia kini, Emi mu angu wudrikuru drisi dria, emi olu e’yo bari ’ba Munguni ’bale ’diyi ma tia dria,

¹⁶ A’ipi baputizi bipiri nga i pa ra; te a’ipi kuri, e’yo lizani nga eri nde ra.

¹⁷ Eceta ’diyi nga ovu ’ba e’yo a’ipi ’diyi be: yi nga orindi onzi odro ma rusi; yi nga e’yo ’yo ti o’dirusi;

¹⁸ yi nga uri ’du; yi ka afa draru mvu ra, eri ngani yi ’ye onzi ku; yi nga dri oti ’ba azo be ’diyi ma ruaa, yi rua nga ati ra.

Yesuni tuzu ’bua

¹⁹ Opi Yesu ka e’yo ’diyi ’yo yi,tia ’bo, nga ini ovu ’duzaru uru ’bua, inga ri va Mungu ma dri ndiria.

²⁰ Te yi’ini, nga fu e’yo olu pari dri dria, de Opi ri azi ’ye yi be tualu, okpo fezu e’yo nde dri eceta ovupi yi be indi ’diyisi. Amena.