Isaya 1 - E’yo Siza Alatararu Munguniri BIBLIA

Suru e’yo onzi beri

¹ Afa ndreza Isaya Amosi mvini, erini ndrele e’yo Yuda pini Yerusalemu berisi, o’du Uzia pini Yotamu pie, Ahazi pie, Hezekia pierisi, yi opi Yudaa ’diyi.

² ’Bu, mi eri e’yoni, mi nyaku, mi co mi bile; Yehovani e’yo ’yole ’borisi; Ma’i ma ezo anzi ’bo, nyaka fezu yi dri, te yi ga e’yo mani si ’bo.

³ Tiago ni i ma e’ini ra, akanya ni pari lazu i ma e’ini ra; te Israeli nini ku, suru mani egani ’di ku indi.

⁴ Suru onzikanyaru la! Yi suru gapi tre e’yo onzisiri, ’ba azi onzi ’yepi ’diyi ma ori, anzi ’yepi lokirisi ’diyi! Yi ku Yehovani ’bo, ’yi ede Mungu Alatararu Israe-lini ma e’yo ra, yi co yi ma esele eri be, yi asi vile ’bo.

⁵ Emi le ’ba ma co emi dika a’disi ya? Emi nga e’yoni ga dika dika ya? Dri ovu azoru dria, asi ovu dria okpo kokoru indi.

⁶ Engazu pa ma agelea cazu kpere dria uru, rua dria ovu alata kokoru, te lu cota rua nyoza pie bele mazaru be; azini vini ’ba opini bele nde ma mile ku, ’ba ombeni ku, ’ba ’bani aro oduru alenia ku indi.

⁷ Angu emini ’ba eza ’bo, aku emini ’diyi ’ba ve acisi ’bo; emi ngulupi ma milia juru nya angu emini ra; ’ba ku eri ra, aku ’ba juruni ogule varile.

⁸ ’Ba ku Zioni zi ekile boroko ’bani sile amvu pati zabibuniri ma aliarile, ekile jo gaaro ’bani sile amvu agoni ma aliarile, ekile aku ari’bani acele kuru­rile.

⁹ Adaru Yehova asikari ongulumu­runi ka te esele azini ku ama dri gaaru ku, te’do ama ovu ekile Sodomule, te’do ama oja ama Gomorale ’bo.

’Ba omvezu asi ojaza adari va

¹⁰ Emi eri e’yo Yehovani, emi opi Sodomaa ’diyi! Emi eri Mungu amani ma azita, emi ’ba Gomoraa ’diyi!

¹¹ Emi ede edeta emini ma dri karakarau a’di e’yosi ya? Yehova ’yo ta; ma tra edeta kabiloagoni vele ma dririsi ’bo, oso ti nguzarunisi indi; ari monioni feni ma dri ayiko ku, kani kabiloanzini, kani ndria­goni indi.

¹² Emini emuria e’daria ma milia, a’di le afa ’di a’i emi dria, emini hekalu mani otuzu pasi anini ya?

¹³ Emi eji afa feza toko dika ku; obiese vele veri ovu ma dri afa onzikanyarule. Okuza mbani e’doria ’diyi, kani sabato, kani okuza ’bani omvele’diyidria di ma ’bo, ma a’ini okuza amboru e’yo onzi pie ’diyi dria ku.

¹⁴ Okuza mbani e’doria emini ’diyi, omu azile azi emini, ’diyi be ma asi ngu yi onzi; yi ma ecandi ’dani, ma ande yi a’izu ra.

¹⁵ Emi ka emi dri eju uru, ma nga ma mile zi emi dri; emi ka zita zi ma tia kakau, ma ngani eri ku; dri emini ga tre arisi.

¹⁶ Emi oji emi; emi ’ba emi alaru; emi nze e’yo emini ’yele ’diyi ma miliasi amve; emi ku e’yo onzi ’yezu ja,

¹⁷ emi oni e’yo onyiru ’yezu; emi nda e’yo lizu kililiru, emi ko ’ba ’bani inzaleri ma aza; emi li imvoanzi ma e’yo kilili, emi ko awuzi ma aza e’yo yini ma alia kililiru opi vu.

¹⁸ Ama ma emu, Yehova ’yo ra, ama nze e’yoni emi be: ka tro e’yo onzi emini ovu ekaru ti, yi nga yi oja emveru sile; ka tro yi e’da okalakokalaru ti, yi nga ovu emveru pambale.

¹⁹ Emi ka ovu asi adarusi e’yo erizu kilili, emi nga afa onyiru ovupi angu ma aliari nya ra;

²⁰ te emi ka ma e’yo ede ra, eka ma ga si, ’ba nga emi ofu seisi; a’disiku Yehova ’yo ’dinile i ma ngulupi ma tisi.

E’yo liza Zionini pi onzeza erini be

²¹ Aku a’ita beri oja i aku saaruriru ’doni ya! Eri’i ndra gapi tre e’yo liza kililirusiri! Onyi adri ndra eri ma alia, te curu’do ’ba ’ba fupi ’diyi adri aleniani.

²² Dahabu mini oja i ayazeru, patiefi ma su mini osa i yi be.

²³ Opianzi mini ovu ’ba e’yo gapi si ’diyi, yi eci yi agyiru ’ba afa ogupi ’diyi be. ’Ba dria alu alu le tu afa ’ba ti razuri a’i, yi afa feza ma vuti bi’i. Yi lini imvoanzi ma e’yo kilili ku, oku awuziru ’diyi ma e’yo cani vini yi vu ku indi.

²⁴ E’yo ’disi Opi ’yo ’dini, Yehova asikari ongulumuru­niri, Mungu okporu Israeliniri’i: Awayo, ma nga di e’yo ewaru ari’ba mani ’diyini fele ma driri fe ma de ira, ma nga ari’ba mani ’diyi ma panga ofe yi dri ra.

²⁵ Ma nga ma dri omvi mi ruaa, ma nga ayaze mini nze teke­teke ani, ma nga aya mini osazaruri nze dria ra.

²⁶ Ma nga ’ba mini e’yo lipi ’diyi ’ba yi paria dika ekile oko­rile, azini ’ba e’yo amapi mi dri ’diyi nga ovu ekile o’du okorisirile. Vilerisi ’ba nga mi omve aku onyini, aku a’ita beri’i.

²⁷ Yi nga Zionini onze e’yo lizasi, azini ’ba emvipi eri alia ’diyi yi nga onze onyisi.

²⁸ Te ’ba nga ’ba ezata ezapi ’diyi ma dri ja ’ba e’yo onzi be ’diyi be tualu, yi nga vini ’ba Yehovani kupi ’diyi dri ja teketeke.

²⁹ A’disiku emi nga ovu drinzasi pari kumara emini lele ’diyisi; te emi drini nga nza amvu emini pele ’diyi ma e’yosi indi.

³⁰ A’disiku emi nga ovu ekile pati kumara bini onyupi onyurile, azini ekile amvu yi kokorurile.

³¹ Azini ’ba okporu nga ovu ase a’wirule, azi erini indi ekile aci nyiri ofizarile, te yi nga ve yi iritro tualu, te ’ba inyupini yo.