Hosea 14 - E’yo Siza Alatararu Munguniri BIBLIA

Matu ’bazu Israeli vu yi ma emvi Yehova vu

¹ Israeli la, emi emvi Yehova Mungu emini vu, emini e’dele e’yo onzi emini ma e’yosi ’borisi.

² Emi eji e’yo ’yoza emi be, emi emvi Yehova vu; emi ’yo tinia, Mi wu e’yo onzi dria fo; mi a’i e’yo ovupi onyiruri, ama nga ani edeta efupi ama tiliari ce mi dri ekile moniole.

³ Asuria ngani ama pa ku; ama ngani tu akanya dria ku; ama ngani vini ’yo afa amani edele dri amanisi ’diyi ma tia dika ku kini, Emi ovu Mungu amani; ’ba imvoanziru ’diyini yiki isule mi aliarisi.

⁴ Ma nga asiza yini asizu vileri ati ra; ma nga yi le ceni, ma adrani eri kule rarisi.

⁵ Ma nga ovu andralile Israeli dri; eri nga fu ’ba ekile ojole, eri nga ola erini su Lebanonile;

⁶ arakala erini nga yi aja ra; rua erini nga ovu ndrizaru ekile pati mizeitunile, aji erini nga ngu ekile pati Lebanonia’diyile.

⁷ ’Ba adripi endri erini ma etia ’diyi nga emvi ra, yi nga enga dika ondule; yi nga fu ’ba pati zabibunile, aji onyiru eriniri nga ovu ekile patiefi ma su Lebanoniarile.

⁸ Efiraimu kini, E’yo mani wura toko ’diyi be curu’do dika ngoni ya? Ma omvi e’yo ’bo, ma nga eri ega ra. Ma ovu ekile pati ovupi ibiru ’danirile; te efi mini enga ma vu.

⁹ A’dini onduaruni ya? Te eri nga e’yo ’diyi va ra. A’dini e’yo vaza beni ya? Eri nga yi ni ra; geri Yehovani ’eliyini ovule onyi­rurisi, ’ba kililiru nga ad alenia, te ’ba azi onzi ’yepi ’diyi nga e’de alenia.