Oluyimba 1 - Luganda Bible 2003

Oluyimba olusooka

¹ Oluyimba Ssennyimba, lwe luyimba lwa Solomooni.

Omukazi

² Emimwa gyo ginnywegere, kubanga okwagala kwo kusinga omwenge okuwooma.

³ Omuzigo gwe weesiize guwunya kawoowo keereere. Erinnya lyo liri ng'omuzigo omusaanuuse. Abawala abatannafumbirwa kyebava bakwegomba.

⁴ Ntwala gy'olaga tudduke tweggyewo. Ayi Ssaabasajja, nfuula owuwo, onnyingize mu kisenge kyo, tusanyukire wamu naawe, okwagala kwo tukutendereze okusinga omwenge. Abakwegomba baba batuufu.

⁵ Abawala b'e Yerusaalemu, ngubye langi, naye ndi mulungi ng'eweema z'omu ddungu ly'e Kedari, ng'entimbe z'omu lubiri lwa Solomooni.

⁶ Temunziimuula olw'okuguba langi, kubanga okwokebwa omusana kwe kundeetedde ekyo. Bannyinaze bansunguwalira ne banteeka ku gw'okulabirira ennimiro y'emizabbibu, kale olususu lwange ne sirulabirira.

⁷ Ayi muganzi wange, mbuulira gy'olundira eggana lyo, gy'oliwummuliza mu ttuntu, nneme kukunoonyezanga eri banno gye balundira.

Omusajja

⁸ Ayi Nnalulungi mu bakazi bonna, oba nga tomanyi gye nnundira, fuluma ogoberere ekisinde ky'eggana, olundire embuzi zo okumpi n'eweema z'abasumba.

⁹ Ayi muganzi wange, osikiriza abasajja ng'embalaasi enkazi bwe zisikiriza ensajja ezisika ebigaali ebya kabaka wa Misiri.

¹⁰ Amatama go ganyiridde n'emivumbo gy'enviiri ennange. Obulago bwo buwundiddwa n'ebyobuyonjo ebiteŋŋeenya.

¹¹ Tujja kukukolera emivumbo egya zaabu, egitimbiddwamu ne ffeeza.

Omukazi

¹² Kabaka bwe yali agalamidde ku katanda ke, omuzigo gwange ogw'omugavu ne guwunya akawoowo kaagwo.

¹³ Muganzi wange ali ng'akawoowo ke ntadde wakati w'amabeere gange.

¹⁴ Muganzi wange ali ng'ekisaaganda eky'ebimuli eby'omu ttale, ebimulisa mu nnimiro ez'emizabbibu mu Engedi.

Omusajja

¹⁵ Laba, oli mulungi ggwe gwe njagala! Amaaso go malungi ng'enjiibwa!

Omukazi

¹⁶ Ddala oli mulungi. Ayi muganzi wange, osanyusa! Ekitanda kyaffe kinaaba kya muddo.

¹⁷ Emivule gye ginaabeera empagi z'enju yaffe, ng'emirabba gya nkanaga.