Obadiya 1 - Luganda Bible 2003

Okulanga okubonerezebwa kwa Edomu

¹ Kuno kwe kulabikirwa kwa Obadiya. Mukama atumye omubaka we eri amawanga, era tuwulidde obubaka bwe nti: “Musituke, tulumbe Edomu, tumulwanyise!” Amo 1:11-12; Mal 1:2-5

² Mukama agamba Edomu nti: “Ndikufuula eggwanga etto, erinyoomebwa ennyo.

³ Okwekulumbaza kwo kukuwubisizza. Wazimba mu lwazi olugumu, osula mu nsozi engulumivu, era weebuuza nti: ‘Alimpanulayo ye ani?’

⁴ Wadde weewanika waggulu ng'empungu, ekisu kyo ne kiba ng'ekiri mu mmunyeenye, era ndikuwanulayo ggwe!

⁵ “Ababbi n'abanyazi bwe bajja ekiro, banditutteko bye baagala. N'abanoga emizabbibu, bandireseeko egimu. Naye ggwe abalabe bo bakusaanyirizzaawo ddala.

⁶ Ebya bazzukulu ba Esawu nga bikwekuddwa! Ebyobugagga byabwe nga binyagiddwa!

⁷ Abo abaakolagananga nammwe, babawubisizza mmwe, ne babagoba mu nsi yammwe. Be mwali nabo emirembe, kaakano babawangudde mmwe. N'abo be mwalyanga nabo, babateze mmwe omutego. Baboogerako mmwe nti: ‘Nga tebalina magezi!’

⁸ “Ku lunaku lwe ndibonereza Edomu, ndizikiriza ab'amagezi baamu, okutegeera ne kuggwaawo ku lusozi lwa Esawu.

⁹ Abazira b'omu Temani balikwatibwa entiisa ku lusozi lwa Esawu, buli muntu alittibwa.”

Ensonga ebonerezesa Edomu

¹⁰ “Olw'okukambuwalira baganda bammwe bazzukulu ba Yakobo, mulizikirizibwa ne muswazibwa ennaku zonna.

¹¹ Ku lunaku abalabe lwe baamenya enzigi zaabwe, mwayimirira awo ku mabbali. Nammwe mwali babi ng'abagwira abo, abaanyaga ebintu mu Yerusaalemu ne babigabana.

¹² Mwali temusaanidde kusanyukira lunaku baganda bammwe ab'omu Buyudaaya lwe baatuukibwako akabi, era lwe baazikirira. Mwali temusaanidde kubasekerera nga bali mu buyinike.

¹³ Mwali temusaanidde kuyingira mu kibuga kya bantu bange, okusanyuka nga babonaabona, n'okunyaga ebintu byabwe ku lunaku lwe baagwa mu kabi.

¹⁴ Mwali temusaanidde kuyimirira mu masaŋŋanzira okukwata abo abadduka, n'okubawaayo eri abalabe ku lunaku lwe baagwibwako akabi.”

Katonda alisalira amawanga omusango

¹⁵ “Olunaku lunaatera okutuuka, nze Mukama lwe ndisalirako amawanga gonna omusango. Ggwe Edomu, kye wakola, naawe kye balikukola. Bye wakola birikuddira.

¹⁶ Abantu bange baanywera ku lusozi lwange olutukuvu ekikopo ekikaawa eky'okubonaabona. Naye amawanga gonna ageetooloddewo, galinywa ekikopo eky'okubonaabona ekikaawa okusingawo. Galikinywa kyonna, ne gasaanirawo ddala.”

Abayisirayeli baliwangula

¹⁷ “Naye ku Lusozi Siyooni abamu baliwonawo, era luliba lutukuvu. N'ab'ennyumba ya Yakobo balyeddiza ensi yaabwe.

¹⁸ Ab'ennyumba ya Yakobo ne Yosefu baliba ng'omuliro: balyokya ab'ennyumba ya Esawu ng'omuliro bwe gwokya ekisambu. Tewaliba n'omu ow'ennyumba ya Esawu alisigalawo nga mulamu. Nze Mukama, nze njogedde.

¹⁹ Ensi ya Edomu erifuuka y'abo ab'omu bukiikaddyo. N'ensi y'Abafilistiya eriba y'abo ab'omu bugwanjuba. Abayisirayeli balyefuga ensi ya Efurayimu n'ey'e Samariya. Era Gileyaadi eriba ya ba Benyamiini.

²⁰ Ab'eggye ly'Abayisirayeli abaawaŋŋangukira mu Kanaani, balidda ne bawangula Fenikiya, okutuukira ddala e Zalefaati. N'eggye ly'abo abaava mu Yerusaalemu ne bawaŋŋangukira mu Sefaraadi, baliwamba ebibuga eby'omu bukiikaddyo obwa Buyudaaya.

²¹ Abawanguzi ab'omu Yerusaalemu be balifuga Edomu, era Mukama ye aliba Kabaka.”