Nekkemiya 1 - Luganda Bible 2003

Nehemiya asabira Abayisirayeli eri Katonda

¹ Bino bye bigambo bya Nehemiya, mutabani wa Hakaliya. Mu mwezi gwa Kisuleevu, mu mwaka ogw'amakumi abiri, ogw'obufuzi bwa Kabaka Arutazeruzeesi, nze Nehemiya bwe nali mu kibuga ekikulu Susa,

² Hanani, omu ku baganda bange, n'ajja n'abantu abalala okuva mu Buyudaaya. Ne mbabuuza ebifa mu Yerusaalemu, ne ku Bayudaaya bannaffe abaddayo okuva mu buwaŋŋanguse.

³ Ne baŋŋamba nti: “Abo abaddayo mu kitundu ekyo nga bava mu buwaŋŋanguse, banakuwavu nnyo, era bawulira okuswala, kubanga ebisenge bya Yerusaalemu bimenyeddwa era n'enzigi zaakyo zookeddwa omuliro.”

⁴ Bwe nawulira ebigambo ebyo, ne ntuula ne nkaaba amaziga, ne mmala ennaku eziwerako nga nkungubaga, era nga sirya mmere, era ne nsinza Katonda w'Eggulu.

⁵ Ne ŋŋamba nti: “Ayi Mukama, Katonda w'Eggulu, oli mukulu era oli wa ntiisa! Okuuma endagaano yo, era oba n'okwagala okutakoma eri abo abakwagala, era abakola by'olagira.

⁶ Tunula era otege okutu owulire essaala yange, nze omuweereza wo, nga nkwegayirira emisana n'ekiro olw'abantu bo Abayisirayeli. Njatula nti ffe Abayisirayeli twayonoona.

⁷ Twakukolera ebitatuuse, tetwakwata bye walagira, wadde amateeka ge watuwa ng'ogayisa mu muweereza wo Musa.

⁸ Jjukira kye walagira omuweereza wo Musa nti: ‘Bwe mutaabeerenga beesigwa, nnaabasaasaanyizanga mu mawanga.

⁹ Naye bwe munaakyukanga ne mudda gye ndi, ne mukola bye mbalagira, nnaabakomyangawo okuva yonna gye munaabanga musaasaanidde mu nsi, ne mbateeka mu kifo kye nalonda okunsinzizangamu.’

¹⁰ Bano be bantu bo era abaweereza bo, be wanunuza obuyinza bwo obungi era n'amaanyi.

¹¹ Kaakano, Ayi Mukama, tega okutu owulire okwegayirira kwange, n'okw'abaweereza bo abalala abakussaamu ekitiibwa. Ompe omukisa olwaleero, omusajja ono ankwatirwe ekisa.” Mu nnaku ezo nali musenero wa kabaka.