Ebyabaleevi 1 - Luganda Bible 2003

Ebitambiro ebyokebwa nga biramba

¹ Mukama n'ayita Musa, n'ayogera naye mu Weema ey'okusisinkanirangamu Mukama, n'agamba nti:

² “Yogera n'Abayisirayeli obagambe nti bwe wabangawo mu mmwe awaayo ekitambiro eri Mukama, anaakiwangayo ng'aggya mu nte ze, oba mu ndiga ze, oba mu mbuzi ze.

³ Bw'anaawangayo ekitambiro ekyokebwa ng'aggya mu nte ze, anaawangayo nnume eteriiko kamogo. Anaagiweerangayo mu mulyango gw'Eweema ey'okusisinkanirangamu Mukama, alyoke akkirizibwenga mu maaso ga Mukama.

⁴ Anaateekanga ekibatu kye ku mutwe gwayo, n'ekkirizibwa okuba ekitambiro eky'okuddaabiriza okuggyawo ebibi bye.

⁵ Anattiranga ente eyo mu maaso ga Mukama, bakabona ab'olulyo lwa Arooni ne batwala omusaayi, ne bagumansira ku njuyi zonna ez'alutaari eri ku mulyango gw'Eweema ey'okusisinkanirangamu Mukama.

⁶ Awo anaabaaganga ensolo eyo, n'agisalaasalamu ebitundu.

⁷ Bakabona banaakoleezanga omuliro ku alutaari, ne bagutindirako enku.

⁸ Banaateekanga ku muliro ogwo ebifi by'ennyama, n'omutwe, era n'amasavu. Ebifi by'ennyama n'omutwe era n'amasavu banaabiteekanga ku nku ezo eziri ku muliro, ku alutaari.

⁹ Omuntu oyo anaayozanga n'amazzi ebyenda byayo, n'ebirenge byayo n'amagulu gaayo, kabona n'ayokera byonna ku alutaari, ne biba ekiweebwayo ekyokebwa. Evvumbe lyakyo eddungi, lisanyusa Mukama.

¹⁰ “Bw'anaawangayo ekitambiro ekyokebwa ng'aggya mu ndiga ze, oba mu mbuzi ze, anaawangayo nnume eteriiko kamogo.

¹¹ Anaagittiranga ku ludda lw'alutaari olw'ebukiikakkono, bakabona ne bamansira omusaayi gwayo ku njuyi zonna ez'alutaari.

¹² Awo anaagisalaasalangamu ebifi, kabona n'abiteeka ku muliro ku alutaari, awamu n'omutwe era n'amasavu.

¹³ Ebyenda n'amagulu anaabyozanga n'amazzi, kabona n'awaayo ekitambiro eri Mukama, era kyonna n'akyokera ku alutaari. Evvumbe lyakyo eddungi, lisanyusa Mukama.

¹⁴ “Era bw'anaawangayo ekitambiro ekyokebwa eky'ekinyonyi, anaawangayo enjiibwa oba ejjiba etto.

¹⁵ Kabona anaaleetanga akanyonyi ako ku alutaari, n'akanyoola obulago, n'akakutulako omutwe, n'agwokera ku alutaari, omusaayi gwako ne gutonnyolokokera ku mabbali gaayo.

¹⁶ Anaakaggyangamu ekisakiro kyako n'ebikirimu, n'abisuula ku mabbali g'alutaari, ku ludda olw'ebuvanjuba, awateekebwa evvu.

¹⁷ Anaakakwatanga ebiwaawaatiro, n'akayuzaamu, naye n'atakakutulamu wabiri, n'akookera ku alutaari ku nku eziri ku muliro. Evvumbe lyako eddungi, lisanyusa Mukama.