Abalam 21 - Luganda Bible 2003

Okulabira Ababenyamiini abakazi

¹ Abayisirayeli baali balayiridde e Mizupa nti: “Tewali n'omu mu ffe aliwa wa mu Kika kya Benyamiini muwala we okumuwasa.”

² Awo Abayisirayeli ne bagenda e Beteli, ne batuula eyo mu maaso ga Mukama, okutuusa akawungeezi. Ne batema emiranga ne bakaaba nnyo amaziga,

³ nga bagamba nti: “Ayi Mukama, Katonda wa Yisirayeli, kivudde ku ki Ekika kya Benyamiini okusaanawo mu Yisirayeli?”

⁴ Enkeera mu makya, abantu ne bazimba alutaari, ne bawaayo ebiweebwayo ebyokebwa, n'ebiweebwayo olw'okutabagana.

⁵ Ne babuuza nti: “Baani ab'omu Bika bya Yisirayeli, abataayambuka mu lukuŋŋaana mu maaso ga Mukama e Mizupa?” Baali beeyamye obweyamo obw'amaanyi nti buli atalyambuka Mizupa, yali wa kuttibwa.

⁶ Abayisirayeli ne basaalirwa olwa baganda baabwe Ababenyamiini, ne bagamba nti: “Olwaleero Yisirayeli afiiriddwa ekimu ku Bika bye!

⁷ Abasajja Ababenyamiini abasigaddewo, tunaabalabira tutya abakazi ab'okuwasa, ng'ate twalayirira Mukama obutabawa bawala baffe?”

⁸ Ne babuuza nti: “Baani ab'omu Bika bya Yisirayeli abataayambuka Mizupa mu lukuŋŋaana mu maaso ga Mukama?” Ne bazuula nga mu Yabesi eky'e Gileyaadi tewali n'omu yajja mu lusiisira mu lukuŋŋaana.

⁹ Kubanga abantu bwe baabalibwa, tewaaliwo n'omu ku batuuze b'omu Yebusi eky'e Gileyaadi.

¹⁰ Ekibiina ne kitumayo abasajja omutwalo gumu mu enkumi bbiri ku abo abasinga obuzira, ne babalagira nti: “Mugende mutte ab'omu Yebusi eky'e Gileyaadi, obutataliza mukazi na mwana.

¹¹ Kino kye muba mukola: muzikiririze ddala buli musajja na buli mukazi atali mbeerera.”

¹² Mu batuuze b'omu Yebusi eky'e Gileyaadi ne basangayo abawala abato embeerera ebikumi bina, ne babaleeta mu lusiisira e Siilo, ekiri mu nsi ya Kanaani.

¹³ Awo ekibiina kyonna, ne kitumira Ababenyamiini abaali ku lwazi lw'e Rimmoni obubaka obw'okukomya olutalo.

¹⁴ Awo Ababenyamiini ne bakomawo, Abayisirayeli abalala ne babawa abawala ab'e Yebusi abatattibwa, naye ne batabamala bonna.

¹⁵ Abantu ne basaalirwa olw'Ababenyamiini, kubanga Mukama yali aggyeewo okwegatta mu Bika bya Yisirayeli!

¹⁶ Awo abakulembeze mu kibiina ne bagamba nti: “Tewakyaliwo bakazi mu Babenyamiini. Abasajja abasigaddewo, tunaabalabira wa abakazi?

¹⁷ Tusaanye okubaako kye tukolawo okukuuma Ababenyamiini abaasigalawo, ekika kireme okusangulibwawo mu Yisirayeli.

¹⁸ Naye tetuyinza kubawa ku bawala baffe kubawasa, kubanga Abayisirayeli twalayira ne tukolimira buli aliwa Omubenyamiini muwala we okumuwasa.”

¹⁹ Ne bagamba nti: “Waliwo embaga ya Mukama eya buli mwaka mu Siilo.” Siilo kiri mu bukiikakkono obwa Beteli, n'obukiikaddyo obwa Lebona, mu buvanjuba bw'oluguudo oluva e Beteli okwambuka e Sekemu.

²⁰ Awo ne bagamba Ababenyamiini nti: “Mugende muteegere mu nnimiro z'emizabbibu,

²¹ mutunule. Abawala b'e Siilo bwe bafuluma okuzina amazina, ku bawala abo, mugende nabo mu kitundu kya Benyamiini.

²² Bakitaabwe oba bannyinaabwe bwe balijja gye muli okuvunaana, mubagambanga nti: ‘Tubeegayiridde, mubatulekere, kubanga tetwababanyagaako mu lutalo okubafuula bakazi baffe. Ate nga bwe mutaabatuwa, temulina musango gwa kumenya bweyamo bwammwe.’ ”

²³ Awo Ababenyamiini ne bakola bwe batyo, ne beenyagira abakazi ku bawala abaali bazina, ne batwala. Ne baddayo mu kitundu kyabwe, ne bazimba ebibuga ne babeera omwo.

²⁴ Awo Abayisirayeli abalala ne bavaayo, buli omu n'adda mu bantu be, ne mu kibanja kye.

²⁵ Mu nnaku ezo tewaali kabaka mu Yisirayeli. Buli muntu yakolanga nga bw'ayagala.