2 Ebyaf 1 - Luganda Bible 2003

Kabaka Solomooni asaba amagezi

¹ Awo Solomooni mutabani wa Dawudi, n'anywezebwa mu bwakabaka bwe, era Mukama Katonda we n'amufuula waakitiibwa nnyo.

² Solomooni n'ayogera n'Abayisirayeli bonna: abaami abatwala abantu olukumi lukumi, n'abatwala ekikumi kikumi; abalamuzi, abakulu b'empya, n'abakulembeze bonna mu Yisirayeli.

³ N'agenda n'abantu abo bonna mu kifo ekigulumivu eky'e Gibiyoni, kubanga eyo ye waali Weema ey'okusisinkanirangamu Mukama, Musa omuweereza wa Mukama gye yakolera mu ddungu.

⁴ Naye Essanduuko ey'Endagaano yali mu Yerusaalemu, ng'eteekeddwa mu Weema, Dawudi gye yagisimbira, bwe yagiggya mu Kiriyati Yeyariimu.

⁵ Alutaari ey'ekikomo eyakolebwa Bezaleeli, mutabani wa Wuri, muzzukulu wa Huuri, nayo yali mu Gibiyoni, mu maaso ga Weema ey'okusisinkanirangamu Mukama.

⁶ Solomooni n'asinza Mukama ng'awaayo ebitambiro bya nsolo lukumi, ezattibwa ne zookebwa ku alutaari eyo ey'ekikomo.

⁷ Ekiro ekyo, Katonda n'alabikira Solomooni mu kirooto, n'amugamba nti: “Nsaba ky'oyagala, nkikuwe.”

⁸ Solomooni n'agamba Katonda nti: “Wayagala nnyo kitange Dawudi, era kaakano onzikirizza okumusikira ku bwakabaka.

⁹ Kale ayi Mukama Katonda, tuukiriza kye wasuubiza kitange. Onfudde Kabaka w'abantu abali ng'enfuufu ey'oku nsi obungi.

¹⁰ N'olwekyo, nkusaba ompe amagezi n'okumanya, nsobole okukulembera abantu bano. Kale ani ayinza okulamula eggwanga lino ekkulu bwe lityo?”

¹¹ Katonda n'agamba Solomooni nti: “Ekyo ky'olowoozezza kirungi, obuteesabira bugagga oba ebintu, kitiibwa wadde okuzikiriza abalabe bo, era obuteesabira kuwangaala, naye n'osaba amagezi n'okumanya, osobolenga okulamula abantu bange, be nkuwadde obeere kabaka waabwe.

¹² Kale amagezi n'okumanya mbikuwadde. Era nja kukuwa n'obugagga n'ebintu n'ekitiibwa, ebitafunibwanga kabaka mulala mu baakusooka, era ebitalifunibwa mulala mu balikuddirira.”

Obuyinza n'obugagga bwa Solomooni

¹³ Awo Solomooni n'ava e Gibiyoni awali Weema ey'okusisinkanirangamu Mukama, n'akomawo mu Yerusaalemu, n'afugira eyo Yisirayeli.

¹⁴ N'akuŋŋaanya amagaali lukumi mu bina n'abaserikale abeebagala embalaasi omutwalo gumu mu enkumi bbiri, n'abateeka mu bibuga ebirimu amagaali, ne mu Yerusaalemu, ye yennyini mwe yali.

¹⁵ Mu biseera bye, ffeeza ne zaabu byayala mu Yerusaalemu, ne biba bingi ng'amayinja. N'emivule ne giba mingi ng'emisikamoreya mu biwonvu bya Buyudaaya.

¹⁶ Embalaasi Solomooni ze yalina, baaziggyanga mu Misiri ne Kilikiya. Abasuubuzi, baazigulanga Kilikiya, ng'ebbeeyi yaazo bwe yali.

¹⁷ Amagaali baagaggyanga mu Misiri, nga buli kigaali kigula ebitundu lukaaga ebya ffeeza, ate embalaasi ng'egula ebitundu kikumi mu ataano ebya ffeeza. Abasuubuzi baazireetanga, ne baziguza bakabaka b'Abahiiti n'ab'Abassiriya.