KOLOSSIA 1 - REN PAURIINA (BSI)

¹ Isowr plungbin ni Jisu Khrista ki kenyee khat Poul leh nenki nu u nnao in Timothi ngi,

² Kolossia ki Khrista hinki kintiing rek leh trin chaak kurhui nu u nnao rek hin tha: Nenki Npah Isowr hinki kdaai lei plungnee ka am kurthuwk so.

Kpanpaakki mdo ṭhil chaak

³ Neenni naan tumra kṭhil chaak in mpha thu, nenki Mukpu Jisu Khrista ki Mpah hin mpha ktai thu kdo panpaak chaak in.

⁴ Mleija Jisu Khrista hin naan do rin chaak, ungu kintiing rek mkheng hin wonsat adolo chaak in ava neenni karyaak chaak inna.

⁵ Mleija parwaan tha naanni ado bin psuk chaak in lei kurthuwk. Hava leiji naanni mkindit pauna ki kṭha paumin chodu ngi ado aryaak chaak dok in.

⁶ Naan hin kthleng ava dultipaam mkheng thu mthei kchui ungta klin ksaang kat kurthuwk ava leiji Isowr plungnee mkindit ado dee pandit intu aryaak nit kiin kupṭhunni adaksaan thung ruk va anto kurthuwk.

⁷ Ava nen nwonsat lo chaak in sra owr tkurthut ṭhiin Epaphraditas hinki kurchuk dok in pti. Mma ava neen kchang kdonni trin chaak kurhui Khrista sok klo cha kurthuwk.

⁸ Ungta Pthla thu naan wonsat ava neen kihin inni mhai tdet chaan da.

⁹ Ungta ava leiji neenni ava karyaak in nit thungki kupṭhun ni, naanni Pthla ktongki lousing ungu kdei pandi cha mkheng Mma poibin kdei cha tu kilṭhi ngi dim chaan.

¹⁰ Mukpu ki rinkhu kuhui thu a am nraan, kheel siingi Mma ning thlunna tlo da, kṭha nong khim khai thu thei achui nraan, ungta Isowr kdei cha thu akar kheel setset nraan, neenni naan tumra kdo ṭhil chaak in ava down chliit maan ring.

¹¹ Kanpa tu kilṭhi ngi kdiil dei leh kparteel mkheng, Mma laarnee ki rutan dil kṭoiji, rutan mkheng tu kilṭhi ngi ru ajuptan pik chaan so.

¹² Mar awng thu kintiing rek do phaak chaak rang thu ntum in tphaak ṭhiin ava ngi mido tpurhui lei inni Npah in ava panpaak chaan che.

¹³ Mma ngi kjiingnu dopaal na thungki miṭen thuw inda, ungu Mchapa wonsatti Kruwngpaam tha mi punthot chaan da.

¹⁴ Mma hin nenni pnu rek kuptlot pikki kṭenthuw ava tphaak chaak in.

Khrista ungu Mnongtlot

¹⁵ Mma ava tdee pchaan ma Isowr ki arling ngi mdo seem, mkheng thungki ru kri verri kṭou.

¹⁶ Mleija Mma thu do mkheng nga seem da, parwaan leh dulti tun, tdee leh tdee pchaan ma, kruwngrek longkhom daat don, mdit mata kpaal na daat don, mata rutan kthloi rek daat don, do mkheng nga Mma thung ngi Mma tumra seem da.

¹⁷ Mma ava do mkheng mseem dungi am dok da, ungu Mma thu do mkheng nga kthuwk kurtuwl.

¹⁸ Mma ava Rinlop daksaa ki Mluw, Mma ava kdiyou thungki ru kri verri kṭou, mdo pṭhunna, ditta do khim khai thu ma am nrang lei.

¹⁹ Mleija Mma thu mkheng ava kdim dokki ma am nra,

²⁰ ungta Mma thu do mkheng Mma mdaksaa hin mdo pipin dok nra, dulti tuwn daat don, mdit mata parwaan thang daat don, Mma khros ki hii ava ngi, mdo pdaai dok ra, ava Isowr ning thlunna.

²¹ Ungta mpha khat thu naanna kṭha kma tlo in tinu ungu kṭha kma plung ado bin in, Isowr hinki kdung lam karlatti ka am kcha in pti.

²² Tunva Mma maiṭhuwm mi mraal ktaak ungu kar mak ktaakki kchiir deekki ado piik chaak nraan, Mma mdaksaa diyo ngi Mma ngi mi pipin pik inda.

²³ Krin cha thu naanni ado nowl thlit daat nraan, knet ungu kdet liit kma naanni kṭha paumin ado aryaak in thungki, kju kva plung ngi ksun daak ra kbin kma, parwaan tingi ka am mdo seem khim khai hin mdo paryaam dok, ungta ava thu Poul neia sok klou cha ping.

Rinlop Sra owr Khat lulungi Poul Nongtlot

²⁴ Tunva neia naan tummi kja kakham thu kanpa kcha ping, ungu Rinlop ava Mma mdaksaa tum mkurthut leiji nei kdaksaa ngi Khrista ki kja kakham kdo parteel kvaat ava neiji kupṭut chaakka.

²⁵ Naan tummi nei kihin mdo tpiik chaak Isowr ktongki kurchuwl dok nong dil kṭoiji, Isowr pauna kurkhummi mkandan nra, neia naan sok klou cha ping.

²⁶ Kum roi ksot ungta charuwl rek thu, kukthuk pau ava kurdowl kcha pdainu tunva Mma ki kintiing rek hinni mpandan dokka.

²⁷ Mmaan hin tha Isowr ri ktlok chati rek arlakki kukthuk pau hava ki laarnee suwang ava kdung ngi tdet nuwm chda, laarnee kbin cha ngi naan thu Khrista ka am.

²⁸ Neenni naan mii pum ktai ava Khrista hin plung kurchuwlli kdo piik chaak nlamra, lousing mkheng ngi mi pum ktai hin paukham innu, mii pum ktaija purchuk innu neenni Mma mlei kdo paryaam chaak in.

²⁹ Mleija hava tummi nei kthung ngi ru kmuwt daatti kdo tlot, Mma nong ava dil kṭoiji nei kihinni mdo tpiik chaak rutan tu kilṭhi ngi kdo suk chaak.