MARKUS 9 - New Testament in Today's Taghulandang Version

¹ “Katitongte!” angkung I Yesus. “Bou tal᷊oara i kumu su si'i pia ko sarung ta mate, suhorou makawua Mawu Ruata mamarenta dingang u kawasa!”

I Yesus nipakawantughi

² Nungu l᷊ou bou e'e I Yesus numbawa si Petrus dingang i Yakobus l᷊au tuaringe i Yohanes, nutingkahae sarang wul᷊uri simbau ko marange. Su saruang u mata ngi sire I Yesus nuwal᷊u ghahi-E.

³ L᷊aku-E nakoa ko mawira kukerong. Takoae sarang singkatau mangangunsa su dunia i'i makabursi sarang kere'e kawirange.

⁴ Bou e'e i sire tilu tumatuhu-E e'e nakawua si Yesus kapudidatonge dingang i Elia l᷊au i Musa.

⁵ Kuteu i Petrus nangul᷊i si Yesus, “Tuang Guru matemang kahingang i kite su si'i. Mapiang we i kami mukoa raseng tatilu; simbau guna ngi Tuang, simbau guna ngi Musa, l᷊au simbau l᷊ai gunang i Elia.”

⁶ I Petrus seng wugha ngu apang ko hinong i pudidatonge, watu u i sie dingang u dingange darua sukatatakutang ta koae sihinge.

⁷ Bou e'e pia winawa nuhimbukung si sire dang bou l᷊al᷊ungu winawa e'e pia tingihi nikaringihi ko nangul᷊i, “Seng i'i Ana-Ku ko ikukindaghi. Raringihe I Sie!”

⁸ Masahawu-sahawu i sire nutuhung tamai-mai, dang seng ta nakawua l᷊ai manga si sai-sai dingang i sire su se'e, sul᷊ikuri I Yesus sisane.

⁹ Su tempo ngi sire karusung e bou wul᷊uri e'e, I Yesus nungonggo u ingati si sire, “Kumbahang i kumu muwuke si sai-sai apang ko nikawua ngi kumu kanini suhorou Ahusu Taumata ipuwangung bou papate.”

¹⁰ I sire nundaringihi tatanata e'e, kateho su tal᷊oara i sire ha i sire nanita nudidato ngu apa pandung I Yesus dingang u didatong-E “sau muwiahi bou papate”.

¹¹ Kuteu i sire nukina si Sie, “Nakurawe manga meteru agama nangul᷊i ware i Elia mang mambeng sumongo horo?”

¹² I Yesus nusumimbahi, “I Elia tingari seng nusumongo horo tadeau pangatori kaul᷊i u patiku. Kateho kirapa dingang u Ahusu Taumata? Nakurawe su l᷊al᷊ung u Buki Susi kawawohe himoneu I Sie sarung mutatahang u singsara l᷊au ihinakaneng u taumata?

¹³ Kateho Ia mangul᷊i si kumu: I Elia seng nusumongo, dang manga taumata nukoa si sie nutuhu kao i sire. E'e nuhino dingang u ko seng mawawohe su l᷊al᷊ungu Buki Susi hal᷊iu watangenge.”

I Yesus nupakaul᷊e ngu ana ko nikasukang u roh ko dal᷊ai

¹⁴ Su tempo-Ngi Yesus dingang u tumatuhu-E tatilu nasongo sau sutal᷊oara u tumatuhu ko walinge i sire nakawua taumata maul᷊i su se'e. Manga meteri u agama pirang katau seng kapurarendehe dingang u manga tumatuhu I Yesus e'e.

¹⁵ Kere manga taumata e'e nakawua si Yesus, i sire nahuwi, bou e'e nahuntal᷊ang nanginsomahi si Sie.

¹⁶ “Ko apa i purarendehi i kumu dingang u manga meteru agama e'e kakina I Yesus su manga tumatuhu-E?”

¹⁷ Singkatau bou taumata maul᷊i e'e nusimimbahi, “Tuang Guru, ia numbawa anaku sarang ko i Tuang. I sie ko bobo watu'u nikasukang u roh ko dal᷊ai.

¹⁸ Boko roh e'e sumu si sie, badange nibanting-banting sutana, mohonge nusuwu, isinge kukaruti l᷊au badange malome. Ia seng mbua nundo su manga tumatuhu i Tuang panguseri roh dal᷊ai e'e, kateho i sire tawe makakoa hal᷊i e'e.”

¹⁹ Kute I Yesus nangul᷊i si sire, “Wal᷊inge gampang i kumu i'i! I kumu mang tinga-tingari taumata ko ta mangimang. Sarang kangereng Ia mambeng matana dingang i kumu dang musabari si kumu? Bawae anae simai!”

²⁰ I sire numbawa rario e'e sarang koa I Yesus. Saritau roh ko dal᷊ai e'e nakawua si Yesus, i sie nukoa badang anae nutumondohi hakiu rario e'e nanawo nal᷊al᷊unggi sutana. Mohonge nusumuwu.

²¹ Bou e'e I Yesus nukina sipapange, “Seng kira kal᷊iwuenge i sie kiri i?” Angkung i papange, “Nanita i sie mborong kodio.”

²² “Seng masau roh ko dal᷊ai e mukakal᷊ika mamate si sie dang mamandu i sie su putung l᷊au u mundume i sie su ake. Kateho boko i Tuang makatul᷊ung, kere botonge i Tuang kumindaghi l᷊au makatul᷊ung si kami.”

²³ “Apa angkungu? Boko i Tuang botonge makatul᷊ung?” sasimbahi I Yesus. “Kaulie botonge asal᷊u taumata mangimang!”

²⁴ Turusi i papa nge e'e nukumiha, “Mawu, ia mangimang, katewe pangangimang ku singkodo. Tul᷊ung ko ia tadeau lebe mangimang l᷊ai!”

²⁵ Su tempo I Yesus nakawua taumata maul᷊i nanita nusumongo nul᷊ahumbung, I Sie nuparenta roh ko dal᷊ai e'e dingang u nangul᷊i, “Roh wenggeli dang roh bobo, Ia muparenta si kau suwangte bou rario i'i dang kumbahang musau sumu si sie!”

²⁶ Roh ko dal᷊ai e nukumiha, bou e'e nukoa badang u rario e'e nutumondohi, mbuhue nusumuwang bou rario e'e. Rario e'e tuhungang kere tau ko nate hakiu manga taumata kaul᷊i e nunguli, “I sie seng nate!”

²⁷ Arawe I Yesus nuhinggo l᷊ima nge l᷊au nutul᷊ung nupuwangung si sie. Raroi e'e dingang nuwangung.

²⁸ Suapang I Yesus su wal᷊e, manga tumatuhu-E nusumongo pusingkatau singkatau sarang koa-E l᷊au nukina, “Nakurawe i kami ta makauseri roh ko dal᷊ai e'e?”

²⁹ I Yesus nusumimbahi, “Roh ko dal᷊ai kere e ta ikauseri dingang u manga akal᷊i apa, sul᷊ikuru kakal᷊iomaneng.”

I Yesus sau muhabari hal᷊i papate-Nge

³⁰ I Yesus dingang u manga tumatuhu-E nanintang u tampa e'e dang nanurusi l᷊al᷊engang nul᷊umiu Galilea. I Yesus mandiri katitonang u taumata su apa I Sie ene,

³¹ watu u I Sie kapanintiro-Nge manga tumatuhu. “Ahusu Taumata sarung i sarakang sukawasa ngu taumata,” kere'e didatong I Yesus, “Dang I Sie sarung pateng. Kateho su l᷊ou katilunge I Sie sarung muwangung!”

³² Manga tumatuhu-E ta nakahingang apang ko nitintiro-Nge, kateho i sire mataku mukina si Sie.

I sai ko kal᷊abokange?

³³ I sire nahumpa su Kapernaum. Suapang seng su wal᷊e, I Yesus nukina su manga tumatuhu-E, “Ko apa ipurarendehi i kumu kanini tamai su ral᷊eng?”

³⁴ I sire ta nusumimbahi, watu u sural᷊eng i sire kapurarendehu hal᷊i u ko i sai ko kal᷊abokange.

³⁵ I Yesus nukukumangiang, bou e'e nukui manga tumatuhu-E i sire mapul᷊o dua e'e, I Sie nangul᷊i si sire, “Taumata ko mo makoa kahimotongange, i sie mambeng makoa kasamuriange l᷊au mambeng makoa mutatal᷊ung kaul᷊iu taumata.”

³⁶ Bou e'e I Yesus nangal᷊a singkatau ana ko dio, l᷊au nupararisi u ana e'e sutingong i sire kaul᷊ie. I Yesus nanaruru ana e'e dingang nangul᷊i su manga tumatuhu-E,

³⁷ “Taumata ko manarima singkatau rario kere i'i wal᷊ingu Ia, e'e mangal᷊enge manarima si Sia l᷊ai. Dang taumata ko manarima si Sia, i sie wal᷊ingewe kitang manarima si Sia, kateho l᷊ai manarima I Sie ko nundoi si Sia.”

I sai ko ta mundoka si kite tumatawang si kite

³⁸ Bou e'e i Yohanes nangul᷊i si Yesus, “Tuang Guru, i kami nakawua pia taumata singkatau nanguseri setang dingang u areng I Tuang. Dang i sie nil᷊arang i kami watu u i sie wal᷊inge bou koa i kite.”

³⁹ Kateho I Yesus nangul᷊i, “Kumbahang mul᷊arang i sie, watu u takoae sarang singkatau ko mukoa ko makal᷊aherang dingang u areng-Ku, bou e'e turusi mundal᷊ai si Sia.

⁴⁰ Watu'u taumata ko ta mundoka si kite, mangal᷊enge tumatawang si kite

⁴¹ Tinaungete taumata ko nungonggo inung si kumu ual᷊ingu i kumu tumatuhu Ratu Mananal᷊amati, kute seng mal᷊ahe i sie sarung manarima l᷊uange.”

Manga hal᷊i ko makakoa taumata mukoa dosa

⁴² “I sai makako singkatau bou manga ana kodadio i'i ta mangimang l᷊ai si Sia, mapiang seng ikitang watu ghaghil᷊imang sul᷊ehie, dang i sie iwontol᷊i sul᷊auri.

⁴³ Boko l᷊imangu makakoa dosa sikau, potoe l᷊ima e'e! Mapiang i kau muwiahi dingang u l᷊imangu simbuka dingang u Mawu Ruata sihingu i kau dingang u l᷊imangu darua bou e'e mataho su naraka, e'e putung ko tawe mate.

⁴⁴ [Su se'e putung ta we mate l᷊au ul᷊iri tawe mate.]

⁴⁵ Dang boko l᷊aeru makakoa dosa sikau, potote l᷊aeru e'e, mapiang ikau muwiahi dingang u l᷊aeru simbuka dingang u Mawu Ruata, sihingu i kau dingang u l᷊aeru dua mbuka e'e ikau irume su naraka.

⁴⁶ [Su se'e putung ta we mate l᷊au ul᷊iri tawe mate.]

⁴⁷ Boko matangu makakoa dosa sikau l᷊oie mata e'e mapiang i kau sumu su Duniangu Mawu Ruatako Wuhu dingang u matangu simbuka, sihingu i kau dingang matangu dua mbuka bou e'e irume su naraka.

⁴⁸ Su se'e putung tawe mate dingang u ul᷊iri ta mate.

⁴⁹ Apang taumata sarung i suwu su putung, musul᷊ungu sasumba niuhasi u asing.

⁵⁰ Asing e'e mapia, boko makoa malele, dingang u apa l᷊ai sau mariadi mapuhari? Ual᷊ingue i kumu pakakoa ko kere asing – puwiahi ko singkahindo dingang u kapapia.”