MARKUS 8 - New Testament in Today's Taghulandang Version

I Yesus nupakang u taumata pa u hiwu sukatau nge

¹ Ta nal᷊iwue bou e'e, pia l᷊ai taumata singgapang nusumongo nukomol᷊i. Ual᷊ingu i sire takoae kang, I Yesus nukui manga tumatuhu-E dang nangul᷊i,

² “Ia kumindaghi u taumata maul᷊i i'i. Seng tilu l᷊ou kal᷊iwuenge i sire nutumuhu dingang-Ku dang su orasi i'i i sire seng takoae kang.

³ Boko Ia mundoi si sire pakapul᷊e dingang u tiang ko takoae tahoe, i sire sarung mapinsang sural᷊eng. Nangilebe sutal᷊oara i sire pia ko nusumongo bou marau.”

⁴ Manga tumatuhu I Yesus nusumimbahi, “Su tampa ko nahae i'i, su apa taumata botonge makarea kang ko makataung guna ngu taumata maul᷊i i'i?”

⁵ “Pira kaul᷊ie boroti ko pia si kumu?” kakina I Yesus. “Pitu,” sasimbahi i sire.

⁶ Kute I Yesus nuparenta taumata maul᷊i e'e pakaiang su tana, bou e'e I Sie nangal᷊a boroti pitu e'e l᷊au nutarima kase su Mawu Ruata. Bou e'e I Sie nangangompeng boroti e'e dingang u l᷊imang-E bou e'e nunggile su manga tumatuhu-E guna ngu ipahia su manga taumata. Kute manga tumatuhu-E nutumuhu.

⁷ Si sire l᷊ai pia kina kodia pira mbua. I Yesus nutarimakase su Mawu Ruata ual᷊ingu manga kina e'e, bou e'e nuparenta manga tumatuhu-E, pamahia manga kina e'e l᷊ai.

^8-9 I sire nukumang sarang nal᷊aeri – patehang manga pa u hiwu sukataunge taumata ko nukumang. Bou e'e manga tumatuhu I Yesus nangomol᷊i l᷊umbeingu kang – mborong pitu bawewekang napene. Bou e'e I Yesus nuparenta manga taumata e'e pakapul᷊e,

¹⁰ dang I Sie dingang u manga tumatuhu-E turusi nawi su sakaeng dang nakoa sarang tampa Dalmanuta.

Manga taumata ngu Farisi mundo si Yesus pukoa ko makal᷊aherang

¹¹ Pirangkatau taumata ngu Farisi nusumongo sarang koa I Yesus, dang nanita nurarendehi dingang-E guna ngu mumpusal᷊ang I Sie. I sire nundo si Yesus pukoa ko makal᷊aherang kere tatia ngu humoneu I Sie nusumongo bou Mawu Ruata.

¹² I Yesus nadio naunge bou e'e nusumimbahi, “Nakurawe manga taumata orasi i'i mundo si Sia pukoa ko makal᷊herang? Ta! Ia tawe mo munggile u tatia ko kere'e si sire!”

¹³ Bou e'e I Yesus na nintang i sire, dang nawi su l᷊al᷊ung u sakaeng; wuhue nuwua sarang simbukang u rano e'e.

Ragi ngu manga Farisi dang i Herodes

¹⁴ Manga tumatuhu I Yesus nal᷊iwuhi numbawa boroti nipakawaghe. Si sire kitang pia boroti simbau su sakaeng.

¹⁵ “Pakaingati su ragi ngu manga tau Farisi l᷊au ragi ngi Herodes,” angkung I Yesus si sire.

¹⁶ Kute manga tumatuhu I Yesus e'e nanita nahundidato hal᷊i e'e. I sirenangul᷊i, “I Sie nangul᷊i kere'e, watu u si kite takoae boroti.”

¹⁷ I Yesus matitong apa ko ipurarendehi sire. Ual᷊ingu e'e I Sie nukina si sire, “Nakurawe i kumu murarendehi hal᷊iu takoae boroti? Apa i kumu wugha dang l᷊ai mborong ta nakahingang? Kere'e katimomonge sipirang i kumu?

¹⁸ I kumu pia mata – hakiwe tanakawua? i kumu pia tul᷊i hakiwe tanakaringihi? Apa i kumu tanakatinaung

¹⁹ boroti l᷊ima mbau Daku nikakakompeng guna ngu l᷊ima hiwu sukataunge? Pira wawewekang l᷊umbei ngu kang ko nikomol᷊i i kumu?” “Mapul᷊o dua,” angkung i sire.

²⁰ “Dang su tempo Ia nangangompeng boroti pitu guna ngu pau hiwu sukatau nge,” I Yesus sau nukina l᷊ai, “pirang wawewekang l᷊umbei ngu kang nikomol᷊i kumu?” “Pitu,” nisimbahi sire.

²¹ “Jadi, mborong tanakahingang i kumu l᷊ai?” angkung I Yesus.

I Yesus nupakaul᷊e ngu tau ko wuta su Betsaida

²² I sire nurating su Betsaida. Su se'e pia taumata numbawa singkatau ko wuta sarang koa I Yesus, l᷊au nundo si Sie tadeau pamilo l᷊ima-Nge su tau ko wuta e'e guna ngu mupakaul᷊engi sie.

²³ Kuteu I Yesus nuhinggo l᷊ima ngu tau ko wuta e'e l᷊au u nanata si sie nusumuwang bou soa e'e. Bou e'e I Yesus nanguru mata ngu tau e'e. I Sie nanil᷊iri u l᷊ima-Nge su mata ngu tau e'e, wuhue nukina si sie, “Seng botonge i kau makawua manga apa su orasi i'i?”

²⁴ Tau e'e nutuhung sarang saruang bou e'e nangul᷊i, “Iya. Ia nakawua taumata karal᷊enge; kateho i sire tuhungang kere l᷊aesu kau.”

²⁵ I Yesus sau namilo l᷊ima nge su mata ngu tau e'e. Paghisa i'i taumata e'e nutatitehi singapang botonge nutuhung. Matange naul᷊e, dang i sie nakawua kaul᷊ie mal᷊ahe-l᷊ahe.

²⁶ Buhue I Yesus nangul᷊i si sie, “Kapul᷊e e, dang ariwe pusul᷊e sarang soa e'e.”

Pangakuang i Petrus hal᷊i I Yesus

²⁷ I Yesus dingang u manga tumatuhu-E natamai sarang apang kampong su masandighu Kaisarea Filipi. Su ral᷊eng I Yesus nukina si sire, “Tumuhu didato ngu taumata, i sai Ia i'i?”

²⁸ I sire nusumimbahi, “Pia ko nangul᷊i: i Yohanes Mananahani; pia l᷊ai ko nangul᷊i i Elia, dang pia l᷊ai ko walinge nangul᷊i singkatau bou nabi.”

²⁹ “Arawe tumuhu si kumu, Ia i'i i sai?” kakina I Yesus. I Petrus nusumimbahi, “I Tuang ko Ratu ngu Mananal᷊amati!”

³⁰ Bou e'e I Yesus nangonggo u ingati si sire, tadeau kumbahang mupakatitong si sai-sai hal᷊i u watangeng-E.

I Yesus mul᷊ahabaru singsara l᷊au papate-Nge

³¹ Bou e'e, I Yesus nanita nanintiro manga tumatuhu-E himoneu Ahusu Taumata mambeng mutatahangu singsara, l᷊au sarung rokateng u apang pangaha, manga tumbonang imam, l᷊au manga meteri u agama. I Sie sarung pateng, kateho su l᷊ou katilunge I Sie sarung sau ipuwangung.

³² Kere'e kal᷊ahe'e I Yesus nangul᷊i u hal᷊i e'e sumanga tumatuhu. Kuteu i Petrus namol᷊eng si Yesus sarang sindihange, l᷊au nanughu si Sie.

³³ Arawe I Yesus nuwihu dang nutuhung manga tumatuhu-E, mbuhue nanughu si Petrus, “Dakoe pangal᷊ing bou i'i, setang! Sipirang u e'e ko sipirang u taumata; wal᷊inge sipirang u Mawu Ruata!”

³⁴ Bou e'e I Yesus nukui taumata maul᷊i ko ene su se'e dingang u manga tumatuhu-E. Bou e'e I Sie nangul᷊i si sire, “Taumata ko mo tumuhu si Sia, mambeng ari putinaung hal᷊iu watangenge, bou e'e mamikul᷊i salipe, dang turusi putuhu si Sia.

³⁵ Watu u taumata ko mutatatinda puwawiahe sarung kailangeng u puwawiahe. Arawe taumata ko mundume u puwawiahe wal᷊ingu Ia, dang guna ngu Habari Mapia bau Mawu Ruata, e'e sarung makasal᷊amati si sie.

³⁶ Apa untunge su singkatau, boko i sie managhuang kal᷊abou dunia i'i kateho i sie kailangengu puwawiahe?

³⁷ Botonge puwawiahe e'e i ghantiang dingang u kowal᷊inge?

³⁸ Boko singkatau mamea mangaku ngu Ia l᷊au tintiro-Ku su tempo ngu dal᷊awang dang dal᷊ai i'i, Ahusu Taumata l᷊ai sarung mamea mangaku ngu tamata e, su tempo ngi sie sarung ruminta dingang u kawasa ngi Yamang-E, nihundingane ngu manga mal᷊aikati ko susi.”