MARKUS 6 - New Testament in Today's Taghulandang Version

I Yesus ta nitarima su Nasaret

¹ Bou tampa e'e, I Yesus dingang u manga tumatuhu-E napul᷊e sarang wanua-Nge.

² Su l᷊ou Sabati I Sie nanita nanintiro su wal᷊e ngu pukakal᷊iomanengang. Su se'e napene u taumata. Su tempo manga taumata e'e nakaringihi tintiro-Ngi Yesus, i sire mangkate naherang. I sire nangul᷊i, “Bou apa taumata i'i nakahombang kaul᷊ie hal᷊i e'e? Kapapande apa ko nariadi si Sie i'i? Kirapa I Sie nakakoa hal᷊i ko makalaherang?

³ I Sie wal᷊inge we base u kau, ana i Maria, dang manga anau simbau i Yakobus, i Yoses, i Yudas dingang i Simon? Manga wawineng-E natana su si'i l᷊ai.” Ual᷊ingu e'e i sire ta nanarima I Sie.

⁴ Bou e'e I Yesus nangul᷊i si sire. “Singkatau nabi i sie iadateng su apang tampa, kitang u su tampa e sisane, dang su tal᷊oarau ana u simbaue dingang u manga ghe'e.”

⁵ Su se'e I Yesus ta nakapukoa tatia ko makal᷊aherang, kitang u nupakaul᷊e ngu taumata masasaki pirang katau dingang u namilo u lima-Nge si sire.

⁶ I Sie naherangi sire ta mangimang. Bou e'e I Yesus nul᷊umal᷊eng sarang apang soa ko masasandighi se'e, dingang nanintiro.

I Yesus nangoro manga tumatuhu-E i sire mapulo dua

⁷ I Sie namadingang u manga tumatuhu-E i sire mapulo dua, bou e'e nangoro si sire taha duang katau dingang nangonggo u kawasa panguseri roh dal᷊ai.

⁸ I Sie nangonggo tatul᷊ara si sire, “Kumbahang mumbawa manga apa sul᷊al᷊al᷊engang u, sulikuru tiking, kumbahang mumbawa sinasa arako manga patoka guna ngu ghaghil᷊e arako doi.

⁹ Pul᷊oho u sapatu, kateho ariwe pumbawa l᷊aku darua.”

¹⁰ I Sie l᷊ai nangul᷊i, “Boko i kumu musumu sarang wal᷊e, katanae se'e sarang i kumu manintang u soa e'e

¹¹ Boko i kumu murating su simbau tampa, dang taumata su se'e ta manarima dingang u mandiri mundaringihi si kumu, tintangte tampa e'e. Dang tontongte awu bou l᷊aeru koa kere l᷊aonggo ingate si sire!”

¹² Kuteu i sire tumatuhu I Yesus mapul᷊o dua e'e nul᷊umal᷊eng. I sire tamai namombeng habari himoneu taumata mambeng putobati bou kaul᷊i u dosa nge.

¹³ Manga tumatuhu-E e'e nanguseri roh ko dal᷊ai maul᷊i, namuha l᷊ana ngu Zaitun su taumata masasaki dingang nupakaul᷊e ngi sire.

Kapapate ngi Yohanes Mananahani

¹⁴ Habari apang ko seng nariadi e'e natupasi l᷊ai sarang koa i Ratu Herodes, watu u areng I Yesus seng nutumeleng suapang tampa. Pia tau mata ko nangul᷊i, “I Yohanes Mananahani seng sau nuwiahi! E'e sabapie I Sie pia kawasa mukoa ko makal᷊aherang e'e.”

¹⁵ Arawe taumata ko wal᷊inge nangul᷊i, “I Sie ko i Elia.” Pia l᷊ai ko nangul᷊i, “I Sie nabi, musul᷊ung u nabi su tempo horo.”

¹⁶ Suapang i Herodes nakaringihi hal᷊i e'e, i sie dingang nangul᷊i, “Nal᷊ahe I Sie i'i i Yohanes Mananahani ko l᷊inau kangereng ko seng bua daku nioro nipakipoto timboe. I'i i sie sau nuwiahi!”

¹⁷ Watu u suhoro u e'e i Herodes mbua nuparenta taumata paname si Yohanes, l᷊au putaho si sie su tutupang. I Herodes nakapukoa kere'e ual᷊ing u i Herodias, kawingi Filipus ko ghe'e sisane. Watu u i Herodes seng nukawing i Herodias,

¹⁸ dang i Yohanes seng masau manughu hal᷊i e'e si Herodes, “Ta botonge i kau mukawing dingang u kawingu ghe u e'e!”

¹⁹ Watu'u e'e i Herodias mangune si Yohanes dang mou mamate si Yohanes, kateho i sie ta makakoa hal᷊i e'e, watu diagateng i Herodes.

²⁰ Watu u i Herodes seng nundoi u taumata pundiaga si Yohanes pakapia su l᷊al᷊ung u tutupang, watu'u i sie mataku si Yohanes. I sie matitong i Yohanes singkatau taumata mapia ko niroi u Mawu Ruata. Dang mang tingari boko i Yohanes nangul᷊i, i Herodes mang l᷊ai mo mundaringihi maning naunge takoae sanange watu'u e'e.

²¹ Panginsuenge i Herodias nakarea salakie su tempo l᷊ou ngi Herodes. Su tempo e'e i Herodes nukoa sal᷊iwang guna ngu mapapangkati marange sukararatuange manga parawira dingang u apang maghaghurang u tampa su Galilea.

²² Su sal᷊iwang e'e ana i Herodias ko mahua nusal᷊ai, dang sal᷊ai e'e nakal᷊iaghi naungi Herodes l᷊au manga sakenge. Inau i Herodes nangul᷊i su ana mahua e'e, “Apang ko i kaou, mangkate pundo. E'e sarung daku i onggo si kau!”

²³ Bou e'e i Herodes nudiandi su ana mahua e'e dingang u tewa. I Herodes nangul᷊i, “Apang ko pundokangu sarung daku i onggo, maneng simbuka bou kararatuangku!”

²⁴ Kuteu ana mahua e'e nusumuwang l᷊au nukina si mamange, “Mama, apa kapiange hinong daku pundokang?” I mamange nusumimbahi, “Pundote timbo Yohanes Mananahani.”

²⁵ Ana mahua e'e naehong nusul᷊e sarang koa i Herodes dingang nangul᷊i, “Su orasi i'i l᷊ai ia mundo, onggoe si sia timbo i Yohanes Mananahani taho su l᷊al᷊ung u baki!”

²⁶ Nakaringihi ndo e'e i Herodes mangkate nasusa naunge, kateho i sie tama katagakang ndo e'e watu u i sie seng buae nutewa su tingongu apang sakenge.

²⁷ Inau seng dingang nuparenta singkatau mundadiagae pangala timbo i Yohanes Mananahani. Kuteu sordado e'e tamai nakoa sarang tutupang, bou e'e namoto timbo i Yohanes.

²⁸ Bou e'e i sie numbawa timbo e'e su wawou baki dang nionggo e su ana mahua e'e. Dang ana mahua e'e nangonggo si mamange.

²⁹ Suapangu manga tumatuhu i Yohanes nakaringihi hal᷊i e'e i sire tamai nangal᷊a badangi Yohanes, wuhue nil᷊uwingi sire.

I Yesus nupakang taumata l᷊ima hiwu sukatau nge

³⁰ Bou e'e manga raroi ko nioro-Ngi Yesus e'e nahumpul᷊e, dang nukomol᷊i dingang I Yesus. I sire nuwuke si Sie kaul᷊i e ko seng nikoa dang nitintiro ngi sire.

³¹ Kere'e kaul᷊ie taumata musasul᷊e bou masongo dang mapul᷊e hakiu sarang kumang I Yesus dingang u manga tumatuhu-E seng ta makarea tempo, ual᷊inge e'e I Yesus nangul᷊i su manga tumatuhu-E, “Mangalingte i kite makoa sarang tampa dio marumasi tadeau kitang i kite ha dang ikumu botonge makapangindul᷊e singkodo.”

³² Kute i sire tamai naawi su sakaeng nakoa sarang tampa ko mal᷊umpi.

³³ Kateho maul᷊i taumata nakawua si sire nanintang tampa e'e, dang matitong i sai i sire. Inau manga taumata bou apang tampa su soa e'e nahuntal᷊ang nul᷊umal᷊eng u rul᷊ung e mangihoro si Yesus dingang u manga tumatuhu-E.

³⁴ Suapang I Yesus nul᷊umintu bou sakaeng, I Sie nakawua taumata maul᷊i. I Sie nukumindaghi i sire, watu u i sire musul᷊ung u domba ko takoae tataghuange. Inau I Sie nanita nanintiro ngu hal᷊i maul᷊i si sire.

³⁵ Suapang nawawul᷊aeng, manga tumatuhu I Yesus nangul᷊i si Sie, “Seng kal᷊ahuwinge dang tampa i'i nahae.

³⁶ Mapiang i Tuang puparenta ko taumata tamai i'i paral᷊eng, tadeau i sire makapul᷊uang kangi sire su kampong tamai masandighi su si'i.”

³⁷ Kateho I Yesus nusumimbahi, “I kumu mambeng mupakang i sire.” “Oh, apa i kami mambeng paral᷊eng tadeau pul᷊uang boroti hariga ngu dua hasu doi sal᷊aka, guna ngu pupakang u taumata tamai i'i?” Kere e didato ngu manga tumatuhu I Yesus e'e.

³⁸ Bou e'e I Yesus nangul᷊i, “Pira mbau boroti ko pia si kumu? Kenang tamai tuhunge.” Suapang nituhungangi sire, angkungi sire, “Pia l᷊ima mbau l᷊ai kina dua mbua.”

³⁹ Bou e'e I Yesus nundoi taumata e'e kaul᷊ie nupakaing taha pusingkomol᷊i su rindulu.

⁴⁰ I sire kaul᷊ie nukumangiang mapia, taha pusingkomol᷊i. Pia ko taha mahasu sukataunge, pia ko l᷊ai taha l᷊imangpul᷊o sukatau nge singkomol᷊i.

⁴¹ Bou e'e I Yesus nangal᷊a boroti l᷊ima mbau dingang u kina dua mbua e'e mmbuhue nutumingara tarai sarang l᷊angi nutarimakase su Mawu Ruata. Mmbuhue I Sie nangangompeng boroti e'e dingang l᷊ima nge dang nangonggo su manga tumatuhu-E, tadeau pakipapahia su taumata maul᷊i e. Kina dua mbua e'e l᷊ai nipupapahia si sire kaul᷊ie.

⁴² I sire nukumang sarang nal᷊aeri.

⁴³ Bou e'e l᷊umbei ngu kang e'e nikomol᷊i manga tumatuhu I Yesus – kaul᷊ie mborong mapul᷊o dua su bawewekang.

⁴⁴ Kaul᷊iu kol᷊aese nukumang boroti e'e pia manga l᷊ima hiwu sukatau nge.

I Yesus nul᷊umal᷊eng su wawou ake

⁴⁵ Bou e'e I Yesus turusi nuparenta manga tumatuhu-E puwua susakaeng pangihoro si Sie sarang Betsaida su simbuka ngu rano, su tempo e'e I Sie kapundoie taumata maul᷊i e'e pakapul᷊e.

⁴⁶ Suapang bou nundoi u taumata maul᷊i e'e, I Yesus nusumaka sarang wul᷊ure mukal᷊iomaneng.

⁴⁷ Suapang nahuwi, sakaeng u manga tumatuhu I Yesus seng dare su l᷊oang e, arawe I Yesus mborong surul᷊ung e.

⁴⁸ I Sie nakawua si sire mangkate kapundal᷊unge sakaeng e'e watu u musomahu anging. Ual᷊ingu e'e manga pukul᷊i tatilu sarang pukul᷊i nung mal᷊ukari, I Sie nusumongo sarang koa i sire karal᷊enge su wawou ake. I Sie nurumal᷊eng turusi kere ko l᷊umiu si sire.

⁴⁹ Su tempo ngi sire nakawua ko I Sie karal᷊enge suwawo u ake, su naung i sire I Sie ko himukuri,

⁵⁰ hakiu i sire nukumiha nataku. Watu'u i sire kaul᷊i e nakawua dang nahuwi dal᷊ai l᷊ai. Turusi I Yesus dingang nudidato si sire, “Pakatatapi! Ia i'i I Yesus. Kumbahang mataku!”

⁵¹ Bou e'e I Sie naawi su sakaeng i sire, anging dingang nal᷊enehi. Manga tumatuhu-E mangkate naherang.

⁵² Kal᷊aherang bou l᷊ima mbau boroti e'e mborong ta nikahinganeng i sire. Mabuha i sire makahingang.

I Yesus nupakaul᷊e ngu taumata masasaki su Genesaret

⁵³ Su tempo nurating u simbuka ngu rano, i sire namal᷊ango su apeng u Genesaret.

⁵⁴ Suapang i sire nal᷊intu bou sakaeng, manga taumata maul᷊i nakawua himoneu nusumongo e'e ko I Yesus.

⁵⁵ Bou e'e i sire nahuntal᷊ang sarang apang tampa su kaul᷊i u tampa e'e dang nanita numbawa manga taumata masaki su wawou tupihi sarang koa I Yesus. Boko i sire nakaringihi himoneu Yesus ene su simbau tampa, i sire numbawa manga taumata masaki sarang pai e'e.

⁵⁶ Maneng l᷊ai su apa I Yesus masongo – walaete minsang su kampong, su soa arako su desa nge – taumata mang turusi susongo mumbawa taumata masaki su tampa pukomol᷊ang. Mmbuhue i sire mundo singapang botonge tadeau manga taumata masaki e'e i wala panuhung juba-Ngi Yesus, maning kitang pondol᷊e, kaul᷊ie ko nakasuhung sisie naul᷊e.