MARKUS 10 - New Testament in Today's Taghulandang Version

I Yesus nanintiro hal᷊i u pusasindo

¹ Bou e'e I Yesus nanintang u tampa e'e, dang natamai sarang Yudea l᷊au wanua su simbuka ngu sal᷊uhu Yordan. Taumata maul᷊i sau nusumongo nul᷊ahumbung si Yesus. Dang kere biasange I Yesus nanintiro si sire.

² Pirangkatau tau Farisi nusumongo l᷊ai tadeau mundea pusasal᷊a-Ngi Yesus. I sire nukina, “Tumuhu atorang u agama ngi kite, apa botonge taumata manindo kawinge?”

³ I Yesus nusumimbahi, “Apa parenta nionggo i Musa si kumu?”

⁴ Sasimbahi i sire, “I Musa mupakawala ngu taumata mupusindo kawinge, asal᷊u mambeng mukoa suratu talaki horo.”

⁵ I Yesus nungul᷊i si sire, “I Musa namohe u parenta e'e, watu u i kumu tumaniu makitihi tintironang.”

⁶ “Arawe mborong bou titae, su tempo ngu Mawu Ruata nundiadi taumata, seng kal᷊ahabari, ‘Mawu Ruata nundiadi si sire ko ese dingang u kokowawine.

⁷ E'e sabapie ko ese sarung manintang i mamange dingang i papange dang masimbau dingang u kawinge,

⁸ kute i sire rua nakoa simbau.’ Inau, i sire seng wal᷊inge l᷊ai duangkatau, kateho seng simbau.

⁹ E sabapie, apa ko seng nipukauhu Mawu Ruata, ta botonge i putal᷊ei ngu taumata!”

¹⁰ Suapangu sire nasu su l᷊al᷊ung u wal᷊e, manga tumatuhu-E nukina si Yesus kakakoau hal᷊i e'e.

¹¹ I Yesus nangul᷊i si sire, “I sai musindo ngu kawinge bou e'e mukawing dingang u ko kowawine ko wal᷊inge, kuteu taumata e'e nawuang su tingo ngu kawinge horo e'e.

¹² Kere l᷊ai ko kowawine ko manindo kawinge boe e mukawing dingang u ko ese kowal᷊inge i sie l᷊ai seng mawuang.”

I Yesus nangal᷊amati manga rario

¹³ Pia manga taumata numbawa mangarario sarang koa I Yesus tadeau I Sie pamilo l᷊ima-Nge l᷊au pangal᷊amati si sire. Kateho manga tumatuhu I Yesus nuwawal᷊uang su manga taumata e'e.

¹⁴ I Yesus nuwawal᷊uang nakawua hal᷊i e'e, bou e'e nangul᷊i su manga tumatuhu-E, “Walate manga rario e'e pamai sarang koa Ku! Ariwe l᷊arang i sire, watu u manga taumata ko kere i sire i'i sarung mariadi tataho umat u Mawu Ruata.

¹⁵ Putinaungko i'i! I sai ta mupasaruang Mawu Ruata kere singkatau ana ko dio, i sie ta mariadi tataho u umat u Mawu Ruata.”

¹⁶ Suapang bou nangul᷊i kere'e, I Yesus nanaruru mangarario e'e, bou e'e namilo u l᷊ima-Nge si sire pu singkatau dingang u nangal᷊amati si sire.

Taumata ko kala

¹⁷ Su tempo I Yesus sau nanurusi u l᷊al᷊engang e, pia taumata singkatau nusumongo katal᷊ange sarang koa I Yesus. Tau e'e nusuba sutingong I Yesus l᷊au nukina, “Tuang ko mapia, apa hino ngu daku koateng tadeau botonge manarima u puwawiahi kahingang dang kakal?”

¹⁸ I Yesus nukina, “Nakurawe i kau nangul᷊i Ia Ko mapia? Takoae ko mapia, sul᷊ikuru Mawu Ruata sisane.

¹⁹ I kau seng matitong apang parenta ngu Mawu Ruata, ‘Kumbahang mamate, kumbahang mawuang, kumbahang manako, kumbahang musaksi ngu leo, kumbahang mangakal᷊i, pangadati si papa dingang i mamangu.’ ”

²⁰ Tau e'e nangul᷊i, “Tuang guru, apang parenta e'e seng kaul᷊ie daku nituhukang nanita mborong makuda.”

²¹ I Yesus nutuhung tau e'e dingang u nukumindaghi, bou e'e nangul᷊i, “Kate simbau l᷊ai hal᷊i ko mborong mambeng reakeng u. Dakoe tamai wal᷊ue apang rarotong u; nggile e doi nge su tau ko susa, dang i kau sarung makarea kakakala su sorga. Bou e'e songote mai tuhu si Sia.”

²² Nakaringihi si Yesus nangul᷊i kere'e, tau e'e nadio naunge, bou e'e i sie nanintang u tampa e'e dingang u susa naung, watu u i sie seng napal᷊iung kalae.

²³ Kute I Yesus nutuhung su manga tumatuhu-E wuhue nangul᷊i si sire, “Tumaniu mabuha su taumata ko kala sumu makoa tataho u umat u Mawu Ruata.”

²⁴ Manga tumatuhu-E naherang nakaringihi didatong I Yesus e'e. Arawe I Yesus nangul᷊i l᷊ai, “Manga ana-Ku, mang tingari mabuha makoa tataho u umat u Mawu Ruata!

²⁵ Magampangeng simbau onta sumu su l᷊ohang u rarahung bou singkatau tamata ko kala sumu su Dunia ngu Mawu Ruata ko Wuhu.”

²⁶ Manga didatong I Yesus e'e kaul᷊ie nakaherang manga tumatuhu-E, hakiu sire mangkite nukina i sire l᷊au sire, “Boko kere'e, ko i sai botonge masal᷊amati?”

²⁷ I Yesus nutuhung si sire dingang nusimimbahi, “Su taumata e'e ta mariadi arawe su Mawu Ruata takoae ko ta mariadi; su Mawu Ruata kaul᷊ie botonge.”

²⁸ Bou e'e i Petrus nangul᷊i, “Bawuaite, i kami seng nanintang u kaul᷊ie tadeau tumuhu si Tuang.”

²⁹ I Yesus nangul᷊i, “Pangimangte: taumata ko seng manintang u wal᷊enge, arako ana u simbau e ko ese arako kowawine, arako i mamange, arako i papange, arako manga anae, arako ansere ual᷊ingu Ia dang ual᷊ingu Habari mapia bou Mawu Ruata,

³⁰ taumata e'e seng manarima nangilembo maul᷊i su orasi i'i. I sie sarung makarea mahasu susul᷊enge kaul᷊ie wal᷊enge, anau simbau ko ese, ana u simbau ko kowawine, i mamange, manga anae, ansere, – dang l᷊ai kasasusa. Dang hindo su tempo mai kasongonge, taumata e'e sarung manarima putatumbiahi tutunge dang kakal.

³¹ Kateho su tempo i'i maul᷊i taumata ko kahorokange sarung makoa kasamuringe dang maul᷊i ko su orasi i'i kasamuringe sarung makoa ko kahorokange.”

I Yesus mudidato katilunge hal᷊i u papateng-E

³² I Yesus l᷊au manga tumatuhu-E, karal᷊enge sarang Yerusalem. I Yesus nul᷊umal᷊eng suhoroe, dang manga tumatuhu-E kaul᷊ie mangkate maghagha. Dang manga taumata ko katuhu e bou l᷊ikuri i sire mang l᷊ai makapundang mataku. Bou e'e I Yesus sau nukui manga tumatuhu-E i sire ha dang nangul᷊i si sire apang ko sarung mariadi su badang-E.

³³ I Yesus nangul᷊i, “Raringihe ko, su orasi i'i i kite seng ka sue su Yerusalem. Su se'e Ahusu Taumata sarung isarakang su tumbonang u manga imam dang manga meteru agama. I Sie sarung i hukung pateng, bou e'e i sarakang su manga taumata ko wal᷊inge tau Yahudi.

³⁴ I sire sarung muhinakang si Sie, manguru si Sie, mamahang si Sie, l᷊au munggantong I Sie. Kateho su l᷊ou katilunge I Sie sarung muwangung.”

Ndo i Yakobus l᷊au i Yohanes

³⁵ Bou e'e i Yakobus l᷊au i Yohanes, manga ana Zebedeus, nusumongo sarang koa I Yesus. Angkung i sirerua, “Tuang guru, pia hal᷊i simbau ko kao i kami I Tuang pukoa e'e si kami.”

³⁶ I Yesus nukina, “Apa kao i rua pakikoa si Sia, guna ngi kumu?”

³⁷ I sire nusumimbahi, “I kami mo kukumangiang su kuaneng l᷊au sukuihi-Ngi Tuang, boko I Tuang kukumangiang dingang u kawawantughi.”

³⁸ I Yesus nangul᷊i si sire, “I kumu wugha apa nipundokang i kumu. Botonge I kumu manginung bou cawang u singsara ko sarung daku inungang l᷊au sumu su ral᷊ung haghing u singsara ko sarung daku isukang?”

³⁹ “Makatanggung,” sasimbahi i sire. “Kute I Yesus sau nangul᷊i si sire, tingari i kumu sarung manginung bou cawang singsara ko sarung daku inungang, dang sumu su ral᷊ung u haghing u singsara ko sarung Daku isukang.

⁴⁰ Kateho su hal᷊i i sai ko sarung kumangiang su kuaneng arako su kuihi-Ku e'e walinge we haki-Ku manantu. Mawu Ruata manantu i sai-sai ko sarung kumangiang su manga tampa e'e.”

⁴¹ Su tempo ngi sire mapul᷊o tumatuhu I Yesus ko wal᷊inge e'e nakaringihi hal᷊i e'e, i sire nuwawal᷊uang si Yakobus l᷊au Yohanes.

⁴² Inau I Yesus nukui si sire kaul᷊ie wuhue nangul᷊i, “I kumu matitong himoneu manga pangaha u wanua ko wugha ngu Mawu Ruata mul᷊inda kawanuange. Dang apang tumbonang i sire manira si sire.

⁴³ Arawe i kumu ta botonge makoa kere'e! Arawe, taumata ko mo mutingkakoa ko l᷊abo su taloara i kumu, i sie mambeng makoa mutatal᷊ung si kumu.

⁴⁴ Dang taumata ko mo makoa ko kahimotongange su taloara i kumu, mambeng makoa l᷊angu kaul᷊ie.

⁴⁵ Watu u Ahusu Taumata mang l᷊ai wal᷊inge sumongo tadeau ital᷊ungan. I sie sumongo guna ngu mutal᷊ung dang manarakang badang-E gunang mupakal᷊iwiri taumata maul᷊i.”

I Yesus nupakaul᷊e ngi Bartimeus ko wuta

⁴⁶ I sire nurating su Yerikho. Dang su tempo-Ngi Yesus dingang u manga tumatuhu-E l᷊au taumata maul᷊i nanintang u soa e'e, pia singkatau ko wuta kakangiang su wiwihu ral᷊eng munundo kakindaghi. Arenge i Bartimeus, ana i Timeus.

⁴⁷ Suapang i sie nakaringihi mai kasahenge e'e ko Yesus tau Nasaret, i sie nukumiha, “Yesus Ahusi Daud! Kindaghite ko ia!”

⁴⁸ I sie nidadakeng u taumata maul᷊i dingang u niparentang pakarumasi, kateho i sie kasaunge l᷊ai nukumiha, “Ahusi i Daud, Kindaghite ko ia!”

⁴⁹ Kute I Yesus nahung mbuhue nangul᷊i, “Kuiete mai i sie.” Inau i sire nukui tau ko wuta e'e, I sire nangul᷊i si sie, “Karumasie! Darisie ndai, i kau nikuiang Yesus!”

⁵⁰ Tau ko wuta e'e dingang naneleri jubange, bou e'e dingang u nurumarisi dang tamai nakoa sarang ko I Yesus.

⁵¹ I Yesus nukina si sie, “Apa kaou daku koateng si kau?” Tau wuta e'e nusimimbahi, “Tuang guru, ia mo makawua.”

⁵² Angkung I Yesus, “Dakoe tamai, watu'u kau mangimang si sia, i kau maul᷊e.” Su orasi e'e l᷊ai tau e'e dingang nakawua. Bou e'e i sie nutumuhu si Yesus sural᷊eng.