LUKAS 1 - New Testament in Today's Taghulandang Version

Panitakenge

¹ Teofilus ko makindaghi, Seng maul᷊i taumata mu tawakal᷊i namohe pakapia hal᷊i u apang ko seng nariadi su tal᷊oara i kite.

² I sire namohe mang musul᷊ung kere ko niwuke si kite bo i sire ko nakawua sisane apang ko nariadi e'e mborong bou titae, dang bou e'e nangeke ngu habari e'e.

³ Suapang ia mbuae namariksa maudupi kaul᷊i e'e bou titate, ia nupikiri mapia boko mamohe simbau buki pakaudupi guna-Ngi Tuang.

⁴ Ia mukoa e'e, tadeau I Tuang matitong himoneu apang ko mbuae nitintiro si Tuang mang tingari.

Pul᷊ahinding Yohanes Mananahani ni habari

⁵ Su tempong i Herodes nakoa ratu ngu su Yudea, pia singkatau imam, arenge i Zakharia. I sie nataho su komol᷊ang u manga imam Abia. Kawinge arenge i Elisabet, l᷊ai bou hintou ngu imam.

⁶ Puwawiahi sire rua singkawingang e'e makal᷊al᷊uasi naung u Mawu Ruata. I sire rua tutuhu kaul᷊i u parenta dang tita ngu Mawu dingang u kal᷊abo u naung.

⁷ I sire takoa e ana, watu u i Elisabet ko wanto dang i sire rua kaul᷊i e seng maghurang.

⁸ Pia su sil᷊aou, su tempo komol᷊ang i Abia nakarea gilirange, i Zakharia nupal᷊al᷊eng u hal᷊i u imam su saruang u Mawu Ruata

⁹ Dingangu undiang, ko biasa i koa u manga imam, i Zakharia ni katibo guna ngu sumu su Wal᷊e-Ngu Mawu l᷊au manutung kamania.

¹⁰ Tintal᷊a kapanutunge kamania, taumata maul᷊i kapukal᷊iomaneng su l᷊ikure.

¹¹ Su tempo e'e Mal᷊aikati u Mawu nutingkaandaghu watangenge si Zakharia. Malaekati e'e kararisi su simbuka kuaneng u meda tampa pananutungang u kamania.

¹² Suapang i Zakharia nakawua Malaekati e'e, i sie nubingo dingang nataku.

¹³ Kateho Mal᷊aikati e'e nangul᷊i, “Kumbahang mataku, Zakharia! Mawu Ruata seng nundaringihi kal᷊iomaneng u. Kawing u i Elisabet sarung mahinding simbau ana koese. I kau mambeng pusigho arenge i Yohanes si sie.

¹⁴ I kau sarung mal᷊uasi kahingang dang maul᷊i taumata sarung l᷊umiaghi boko ana e'e seng nipahinding!

¹⁵ I sie sarung makoa taumata ko l᷊abo tumuhu kao u Mawu, dang i sie sarung ta manginung anggori arako inung makabukang. Bou nipahinding i sie sarung ikawasa ngu Roh u Mawu Ruata.

¹⁶ Maul᷊i tau Israel sarung ahakenge pusul᷊e su Mawu Ruata, Mawu ngi sire.

¹⁷ I sie sarung makoa raroi u Mawu ko matoghasi l᷊au makawasa kere i Elia. Isie sarung mupudame ngu iamang dingang ana. Dang taumata ko ta tumatuhu sarung ahakenge sau pusul᷊e su l᷊al᷊ung sipirang ko mutatahino. Dingang u kere i sie manadia ngu simbau umati ko seng sadia guna ngu Mawu.”

¹⁸ “Kirapa ia matitong u hal᷊i i'i sarung mariadi?” Kakinai Zakharia su Mal᷊aikati e'e. “Ia seng maghurang, dang kawing ku l᷊ai seng maghurang.”

¹⁹ Mal᷊aikati e'e nusumimbahi, “Ia i'i Gabriel, Ia ko paparentang u Mawu Ruata dang i sie nundoi sisia puhabari habari mapia i'i sikau.

²⁰ Apang ko daku i habari, sarung mariadi su temponge. Kateho ual᷊ingu i kau tamangimang, i kau sarung tamakadidato; i kau sarung makoa ko bobo sarang apa ko daku nihabari i'i mariadi.”

²¹ Tintal᷊a e'e, manga taumata mang kapangampal᷊e si Zakharia. I sire naherang nakurawe i sie mal᷊iwue kahingang su l᷊al᷊ung u Wal᷊e-Ngu Mawu.

²² Dang su tempong i sie nusumuawang, i sie seng tanakapudidato si sire. I sie kitang nangonggo tatia dingang u l᷊imange, dang na bobo turusi. Kute i sire l᷊ai seng natitong ko i sie nakawua pia simbau kal᷊al᷊ahe su l᷊al᷊ung u Wal᷊e-Ngu Mawu.

²³ Suapang nasue tempo ngu pul᷊ahal᷊i e su Wal᷊e-Ngu Mawu i Zakharia napul᷊e sarang wal᷊e.

²⁴ Tanal᷊iwue bou e'e i Elisabet kawinge pia kal᷊uwaenge nanguhung badange su wal᷊e l᷊ima wul᷊ang l᷊iwuenge.

²⁵ I sie nungul᷊i, “Samuringe Mawu nutul᷊ung u ia dang nangumu mea ku.”

Pul᷊ahinding I Yesus ni habari

²⁶ Su tempo ngi Elisabet seng nungu wul᷊ang pia kal᷊uwaenge, Mawu Ruata nundoi si Mal᷊aikati Gabriel sarang Nasaret simbau soa su Galilea.

²⁷ I Gabriel niroi sarang koa i singkatau mahua, arenge i Maria. Dario mahua e'e seng pia tunangange singkatau umbaseng arenge i Yusuf, hintou ngi Ratu Daud.

²⁸ Malaekati e nusumongo si Maria dingang nangul᷊i, “Sal᷊amati, si kau ko seng nial᷊amateng ko kapiange bou Mawu. Mawu mahundingang i kau!”

²⁹ Nakaringihi didato ngu Mal᷊aikati e'e i Maria nahuwi, hakiu nakoa kakina su naunge apa mangal᷊enge adati e'e.

³⁰ Kute Mal᷊aikati e'e nu nangul᷊i si sie, “Kumbahang mataku, Maria, watu u ikau nutatahino sunaung u Mawu Ruata.

³¹ I kau sarung pia kal᷊uwaeng dang sarung mahinding singkatau ana, ko mambeng i kau pusigho arenge I Yesus.

³² I sie sarung mawantughi, dang sarung i sigho Ahusu u Mawu Ruata ko karangetange. Mawu Ruata sarung mukoa si Sie musul᷊ung i Ratu ngi Daud, iupung-E.

³³ Dang i Sie sarung mamarenta kere Ratu sutal᷊oarau hintou ngi Yakub sarang kal᷊iwuange. Kararatuange sarung tama hupusi.”

³⁴ “Kateho ia i'i mborong mahua,” angkungi Maria su mal᷊aikati e'e, “Kirapawe hal᷊i e'e wotonge mariadi?”

³⁵ Mal᷊aikati e'e nusumimbahi, “Roh u Mawu Ruata sarung sumongo si kau, l᷊au kawasa-Ngu Mawu Ruata sarung manirung si kau. E'e sabapie ana ko sarung ipahinding e'e sarung i sigho Susi, Ahusu u Mawu Ruata.

³⁶ Putinaung: I Elisabet, ghe u e'e pia kal᷊uwaeng seng nungu wul᷊ang, maning i sie seng maghurang dang taumata mangul᷊i i sie kowanto.

³⁷ Watu u su Mawu Ruata takoae ko tamariadi.”

³⁸ Bou e'e i Maria nangul᷊i, “Ia i'i l᷊ang u Mawu; kariadite si sia musul᷊ung u ko niul᷊i u.” Bou e'e mal᷊aikati e'e natamai nanintang i Maria.

I Maria nutiwo si Elisabet.

³⁹ Tamal᷊iwue bou e'e, i Maria nakoa sarang soa simbau su Yudea su wul᷊ure.

⁴⁰ I sie nakoa sarang wal᷊e ngi Zakharia, dang su apang nasu, i sie nangadati si Elisabet.

⁴¹ Dang kere'e i Elisabet nakaringihi l᷊aadati Maria, ana ko su l᷊al᷊ung u kal᷊uwaeng i Elisabet e'e nukumanoa. Kute I Elisabet nikawasa ngu Roh u Mawu Ruata,

⁴² bou e'e nukumiha, “I kau ko seng nial᷊amateng nangilebe bou tal᷊oara u apang kowawine! Kasasal᷊amati su ana ko sarung i pahinding e'e!

⁴³ Ko i sai ia hakiu i mama ngu Mawu nusumongo si sia?

⁴⁴ Su apang ia nakaringihi si kau nangonggo u adati, ana su kal᷊uwaeng ku nukumanoa u ral᷊iaghi.

⁴⁵ Kasasal᷊amati si kau, ual᷊ingu mangimang humoneu apang ko nihabaru Mawu si kau e'e sarung mariadi!”

Kakal᷊iomaneng tatarimakase i Maria.

⁴⁶ I Maria nangul᷊i, “Naungku mundalo Mawu,

⁴⁷ Dang jiwaku kal᷊iaghe watu u Mawu Ruata mananal᷊amatiku.

⁴⁸ I sie nakatinaung si sia, l᷊ang-E ko dal᷊ai! Manita bou tempo i'i kaul᷊i u wanua muhabaru ia su l᷊al᷊ung u karal᷊uasi.

⁴⁹ Ual᷊ingu Mawu Ruata ko nangilebe Makawasa nukoa manga hal᷊i ko l᷊abo si sia Areng-E i pakasusi.

⁵⁰ Pul᷊ahintou sarang pul᷊ahintou Mawu mang nukumindaghi Su taumata ko mataku i Sie.

⁵¹ Dingang u lima-Nge ko makuati I Sie nuputal᷊eingu taumata ko maoboti dang nupakaghoghahu kiroung i sire.

⁵² Manga Ratu nipal᷊intu-E bou kararatuange dang tau ko susa nipakarange-E.

⁵³ Taumata ko nahutung nipakal᷊aer-E dingang u kaul᷊i u kapapia, ko kala nitokol᷊e dingang u l᷊ima mapul᷊o.

⁵⁴ I Sie mutul᷊ung u Israel l᷊ang-E tumuhu diandi ko nikoa-E dingangi iupung i kite.

⁵⁵ Mawu ta mul᷊iwuhi dianding-E naung-E mal᷊ondo si Abraham l᷊au hintounge sarang kal᷊iwuenge.”

⁵⁶ Manga til᷊u wul᷊ang kal᷊iwuenge i Maria natana dingang i Elisabet, mbuhue i sie napul᷊e sarang wal᷊enge.

Pul᷊ahinding i Yohanes Mananahani

⁵⁷ Seng nurating tempo i Elisabet mahinding. I sie nahinding singkatau ana koese.

⁵⁸ Manga l᷊ampung dingang u manga ghe'e nakaringihi kere'e kapiange Mawu Ruata nukoa si Elisabet, i sire nal᷊uasi singkal᷊uasi dingange.

⁵⁹ Su tempo umuru ana e'e natimu wal᷊u l᷊ou, i sire nusumongo guna ngu manunati si sie. I sire mo mangonggo arenge ana e'e i Zakharia i tuhu su areng i papange,

⁶⁰ Kateho imamange nangul᷊i, “Ta! I sie mambeng i sigho si Yohanes.”

⁶¹ “Takoae sarang singkatau bou ghe u ko pia areng kere'e,” angkung i sire si sie.

⁶² Bou e'e i sire nungonggo tatia si Zakharia, nukina si sie minsang apa areng ko ionggo su ana e'e.

⁶³ I Zakharia nundo batul᷊ei, bou e'e namohe, “Arenge i Yohanes,” I sire kaul᷊i e naherang.

⁶⁴ Su tempo e'e l᷊ai i Zakharia seng sau nakapudidato dang nudalo Mawu Ruata.

⁶⁵ Manga l᷊ampunge kaul᷊ie nataku, dang habari e'e nakeke su kaul᷊i tampa su sindihang u wul᷊uru Yudea.

⁶⁶ Kaul᷊ie ko nakaringihi hal᷊i e'e nukina su naung i sire, “Sarung makoa apa ana e'e mai-mai?” Watu'u Mawu mahundingang i sie.

I Zakharia nuhabaru habari bou Mawu

⁶⁷ I Zakharia, imamangu ana e'e, nikawasangu Roh u Mawu Ruata hakiu i sie nuhabaru tatanata ngu Mawu. I sie nangul᷊i,

⁶⁸ “Maite i kite mundalo Mawu, Mawu Ruata ngu tau Israel! I sie seng nusumongo nutul᷊ungu umat-E dang nul᷊iung i sire.

⁶⁹ I sie nangonggo u mananal᷊amati ko matoghasi si kite Hintoungi Daud, l᷊ang-E.

⁷⁰ Su tempo horo bou manga nabi pileng-E, Mawu seng nangonggo dianding-E

⁷¹ Guna ngu mul᷊iung i kite bou roka i kite dang bou kawasa ngu manga taumata ko mubinsi i kite.

⁷² Guna ngu mupakal᷊ahe kakindaghi u naung-E sumanga i upungi kite, dianding-E ko susi e'e sarung ipakaganap-E.

^73-74 I Sie nutewa sutingong i Abraham iamang i kite, dang nudiandi mul᷊iung i kite bou roka i kite, tadeau i kite ta mataku mutangkiang si Sie.

⁷⁵ Sintinia mutaha Mawu si Sie dang makal᷊uasi naung-E sukanandu u puwawiahi kite.

⁷⁶ I Kau, anaku, sarung isigho nabi-Ngu Mawu Ruata ko karangetange. I Kau niroi pangihoro u Mawu guna ngu pamuka l᷊al᷊eng-E,

⁷⁷ guna ngu mupakatitong su umat-E i sire sarung ipakasal᷊amati, boko Mawu Ruata seng nangampung manga dosa ngi sire.

⁷⁸ Mawu ngi kite mal᷊ondo l᷊au makindaghi; guna ngu manal᷊amati si kite i Sie nusumongo. Kere matangutiti nusuminang mal᷊ukari,

⁷⁹ kere e l᷊ai i Sie mangonggo sua-Nge su patiku taumata ko muwiahi su l᷊al᷊ung u kararundung dang katataku. I Sie mangaha i kite sul᷊al᷊eng makoa sarang purarame.”

⁸⁰ Ana i Zakharia e'e mang kakal᷊abo e dang mang kakatoghase Roh e. I sie natana su tana l᷊inggi, sarang nurating temponge i sie mupakal᷊ahe u watangenge su tau Israel.