FILEMON 1 - New Testament in Today's Taghulandang Version

¹ Ana u simbau Filemon, gawe l᷊au u ringang i kami! Ia i Paulus, singkatau hukumang ual᷊ingu I Kristus Yesus, singkahindo dingang u ana u simbau i kite i Timotius, namohe surati i'i si kau.

² L᷊au u su jamaati ko nakomol᷊i su wal᷊e ngu; l᷊ai su wawine ngi kite, i Apfia l᷊au u ghawe singkahal᷊i kite, i Arkhipus.

³ I kami muharapi mal᷊umbako Mawu Ruata Yamang i kite dang Mawu Yesus Kristus munggile u al᷊amati dang kapapia si kumu.

Kakindaghi l᷊au u pangangimang i Filemon

⁴ Sintinia Ia mukal᷊iomaneng, ia mang musigho areng u dang mutarima kase su Mawu Ruata.

⁵ Watu'u ia nakaringihi ware i kau tinga-tingari mangimang su Mawu Yesus l᷊au u kumindaghi u kaul᷊iu umat u Mawu Ruata.

⁶ Ia mukal᷊iomaneng mal᷊umbako putatingana u simbau i kite kere apang taumata mangimang sarung makakoa pangangina ko lebe l᷊abo su patiku al᷊amati ko taghuaneng kite ual᷊ingu nasimbau dingang I Kristus.

⁷ Ana u simbau i Filemon, kakindaghiu su kaul᷊iu umat u Mawu Ruata, makal᷊uasi sia dang munggileu wawahansang si sia! Kaul᷊iu umat u Mawu Ruata nal᷊uasi watu'u i kau.

Ndo guna ngi Onesimus

⁸ Watu'u e'e kere singkatau ana u simbau simpangimaneng ia botonge l᷊ai mu parenta si kau guna ngu mukoa apang ko harusi koateng u.

⁹ Watu'u ual᷊ingu ia kumindaghi i kau, ia kitang kere mundo. Ia i'i singkatau maghurang dang orasi i'i seng nitahangeng su l᷊al᷊ung u tutupang watu'u I Kristus Yesus.

¹⁰ Ia i Paulus, mumbawa simbau ndo si kau hal᷊i i Onesimus, anaku su l᷊al᷊ung I Kristus. Watu'u su l᷊al᷊ung u tutupang i'i ia seng nakoa yamange rohani.

¹¹ Horo i sie takoae mangal᷊enge si kau; arawe orasi i'i i sie pia mangal᷊enge, wal᷊inge kitang guna ngu, kateho guna ngu ia l᷊ai.

¹² Orasi i'i taumata ko daku ikindaghi e'e sau daku i roho si kau.

¹³ Sumbal᷊i ia mo mamaeri si sie dingangku kere ghaghanti ngu, tadeau i sie botonge musumbala sia, su tempo nitahang su l᷊al᷊ung u tutupang i'i watu'u muhabari Habari Mapia bou Mawu Ruata.

¹⁴ Kateho ia mandiri mukoa manga apa boko i kau ta mangonggo u sasimbahi. Ia lebe mo bo i kau mangonggo u dingang naung mal᷊uasi, ia mandiri manihasa si kau.

¹⁵ Pari i Onesimus nutal᷊ei dingang u guna ngu singkatempo tadeau i kau botonge makarea si sie sau guna ngu sarang kal᷊iwuenge.

¹⁶ Orasi i'i isie wal᷊inge kitang singkatau l᷊ang u; i sie nangilebe bou e'e. I sie ko sinsul᷊ung taumata Sahani ko ikukindaghi. I sie pia mangal᷊enge si sia, Nangilembo l᷊ai si kau tantu i sie pia mangal᷊enge kahingang maneng kere l᷊ang, kere l᷊ai singkatau ana u simbau su l᷊al᷊ung u Mawu!

¹⁷ Watu'u e'e, ual᷊ingu ana u simbau mutuhung si sia kere gawe sinsul᷊ung u taumata Sahani, tarimate sau i Onesimus musul᷊ung u kere i kau nanarima u ia.

¹⁸ Boko i sie nunsal᷊a arako nakautang si kau, balate ia mananggung kaul᷊i e'e.

¹⁹ Ho, balate ia mamohe sisaneku su si'i: Ia i Paulus, sarung mamaehi kaul᷊ie. (Tantu tawahal᷊uasi, ia tumanata si kau sisane watu'u i kau pia utang si sia, e'e ko puwawiahu ko wuhu kere taumata ngu Sahani.)

²⁰ Watu'u e'e su l᷊al᷊ung u Mawu kenang tul᷊ung ko ia, pakal᷊uasiko naungku kere ana u simbau su l᷊al᷊ung I Kristus.

²¹ Ia namohe surati i'i watu'u mangaking uare i kau sarung mukoa apang ko daku pundokang. L᷊ai ia matitong i kumu ko sarung mukoa lebe bou e'e.

²² Tintal᷊a e'e, tul᷊ung sadiai kamari guna ngu ia su wal᷊e ngu; watu'u ia muharapi Mawu Ruata manarima kal᷊iomaneng u ana u simbau kaul᷊ie dang mumbawa si sia sarang koa i kumu.

Adati panginsuenge

²³ I Epafras, ko ene singkahindo dingangku su l᷊al᷊ung u tutupang watu'u I Kristus Yesus, mundoho ngu adate si kau.

²⁴ Tarimako l᷊ai adati manga ringangku i Markus, i Aristarkhus, i Demas l᷊au i Lukas.

²⁵ Mal᷊umbako Mawu Yesus Kristus Mangal᷊amati si kumu. Adati kami i Paulus