Yohanes 1 - Sura Magali Nuntu Ngkatuwu

Nuntu anu mawai katuwu 1:1-18

¹ Ri uyu-uyunya, ri kabareʼepanya ndapapewali lino, reʼemo Nuntu. Nuntu seʼe sangkani-ngkani pai i Pue Ala pai Nuntu setu i Pue Alamo seʼe.

² Ungka ri pontepuʼunya Nuntu seʼe lawi sangkani-ngkanimo pai i Pue Ala.

³ Nuntu seʼe mewali puʼu mpengaya-ngaya, pai mampapewali pura-puranya, bereʼe anu tepewali ane banya Sira.

⁴ Nuntu seʼe pebete ngkatuwu, pai katuwu anu mawai reme ri tolino.

⁵ Reme setu merara ri kawaninya, pai bareʼe nakoto mbani mamporo peraranya.

⁶ Ratamo sambaʼa tau anu ndapokau i mPue Ala, i Yohane toʼonya.

⁷ Siʼa rata mampobambarika kakononya reme setu, da naka naaya ntau pura-pura.

⁸ Banya siʼa reme setu, paikanya siʼa podo mampobambarika.

⁹ Reme anu monco, anu mampakareme tolino pura-pura rata ri lino.

¹⁰ Nuntu reʼemo ri lino, lawi Sira woʼu anu mampapewali lino paikanya bareʼe naincani lino.

¹¹ Sira rata ri tana-A ngkalio-A, paikanya bancaa bareʼe mantarima Sira.

¹² Paikanya mau ewanceʼe reʼe woʼu waʼa ntau anu mantarima pai maaya Sira; tau seʼe napapewali ana i mPue Ala.

¹³ Sira ndapoana banya ua elo ndaya ntolino, maka katuwu anu dawoʼu ungka ri Pue Ala puʼunya.

¹⁴ Nuntu mewalimo tolino, ri oyotamo peari-A, takitamo peawa-A. Peawa setu ndatarima ua ka-Siranya Ana mPapa anu sambaʼa-mbaʼa. Mampojaya Sira kita mangkita i Pue Ala pai towe ndaya-A ri kita.

¹⁵ I Yohane rata mewali sabi, siʼa mampobambarika, “Siramo seʼi anu roomo kutoʼoka komi, Sira da rata ri puri mantonda yaku, paikanya Sira meruu ngkabangke-A pai yaku, maka ri kabareʼepanya reʼe yaku, Sira lawi reʼemo.”

¹⁶ Sira buke pai towe; bereʼe kapusanya, Sira mangadonco kita.

¹⁷ Padika i mPue tatarima mampoliu i Musa. Paikanya towe pai katodo i mPue Ala, ndapatongawa mampojaya i Yesu Kerisitu.

¹⁸ Bereʼe tau anu mangkitamo i Pue Ala, jawaʼanya Ana i mPapa anu sambaʼa-mbaʼa, anu siwia pai Papa pai mokenta pai Sira. Siramo anu mampatongawa i Papa ri kita.

Posabi i Yohane 1:19-28

¹⁹ Waʼa ntau makuasa nto Yahudi ri Yerusale, mampokau waʼa ntadu mpanyomba pai waʼa nto Lewi njoʼu ri Yohane da mampeoasi ri siʼa, “Isema kojo siko seʼi?”

²⁰ Nasono mpayoa i Yohane, natoʼo, “Yaku seʼi banya Mokole Tadungkadago.”

²¹ Meoasi woʼu tau seʼe natoʼo, “Ane ewanceʼe isema siko? Bara i Elia siko?” Mesono i Yohane, “Banya.” Meoasi woʼu tau seʼe natoʼo, “Bara siko Nabi?” Mesono i Yohane, “Banya.”

²² Natoʼo ntau seʼe, “Ane ewanceʼe toʼoka kami isema kojo siko seʼi, da naka reʼe sononya anu da katoʼoka tau anu mampokau kami kaʼisemanya siko seʼi.”

²³ Mesono i Yohane, “Yakumo seʼi anu natoʼo i Nabi Yesaya: ‘Tau anu meboo-boo ri pada bone, ndipalenekamo i Pue jaya-A.’ ”

²⁴ Waʼa ntau anu napokau nto Parisi setu,

²⁵ meoasi natoʼo, “ane siko banya Mokole Tadungkadago, banya i Elia, banya woʼu nabi, wenu painaka mopariu siko?”

²⁶ Mesono i Yohane natoʼo, “Yaku seʼi podo mampopariuka ue. Paikanya laumo ri oyomi tau sambaʼa anu bareʼe ndiincani.

²⁷ Sira rata mantonda yaku, paikanya sako da malede soʼo ntalupa-A yaku seʼi bareʼe sintinaja.”

²⁸ Pura-pura setu tepewali ri Betania, tondo mpebetea ngKoro Yarade, kareʼe mpopariu i Yohane.

Ana Bimba mPue Ala 1:29-34

²⁹ Bangke reme nakita i Yohane setumo i Yesu madadu siʼa. Nepa natoʼo i Yohane, “Peole, setumo Ana Bimba mPue Ala anu mangkoyo salaa ntolino.

³⁰ Siramo anu kutoʼo da rata mantondaraka yaku, paikanya Sira anu meruu ngkabangke pai yaku, maka ri kabareʼepanya ndapoana yaku Sira lawi reʼemo.

³¹ Riu-riunya yaku seʼe bareʼe kuincani isema Sira setu. Ntanoka yaku rata mampopariuka ue da naka banca Isaraeli mangaincani Sira.”

³² I Yohane woʼu mawai posabi ewaseʼi, natoʼo, “Kukita Inosa mPue Ala menaʼu ewa putiʼa ungka ri yangi metopa ri Sira.

³³ Ri tempo setu bareʼepa kuincani isema Sira. Paikanya i Pue Ala anu mampokau yaku mangariu pai ue, mantoʼokamo yaku, ‘Ane nukita Inosa mPue Ala menaʼu, nepa metopa ri tanoana tau sambaʼa, siʼamo anu da mampopariuka Inosa mPue Ala.’

³⁴ Nakita mataku ngkalioku. Pai yaku mewali sabi kamonconya Sira Ana mPue Ala.”

Anaguru i Yesu anu uyu-uyunya 1:35-42

³⁵ Bangke reme njau woʼu i Yohane mekakore pai anagurunya radua njairia.

³⁶ Pangkitanya i Yesu moliu, natoʼo, “Peole! Setumo Ana Bimba mPue Ala.”

³⁷ Butu nadonge anagurunya radua setu pompaunya ewanceʼe, liu-liu nalulu ntau seʼe i Yesu.

³⁸ Metorobaka i Yesu, ndakita tau anu mangalulu Sira setu ndatoʼo, “Nunjaa anu ndipepali?” Mesono tau seʼe natoʼo, “Rabi, ri mbeʼi kareʼe mpeari-Mi Rabi?” (Rabi posokinya guru.)

³⁹ Ndatoʼo i Yesu, “Maʼimo ndipampeole ngkaliomi.” Tempo setu tinti aopo lauka reme. Ri eo setu tau seʼe maroo-roo sangkani-ngkani pai Sira.

⁴⁰ Sambaʼa ri oyo ntau radua anu malulu i Yesu setu madongemo pompau i Yohane, i Andaria toʼonya, kasangkompo i Simo Peturu.

⁴¹ Ganggara napepali i Andaria kasangkomponya i Simo, natoʼoka siʼa, “Kami momberatamo pai i Mesia!” (Mesia siwia pai Kerisitu posokinya: Mokole Tadungkadago.)

⁴² I Andaria mampoyunu i Simo njoʼu ri Yesu. Ndapatomata i Yesu i Simo, ndatoʼo, “Siko i Simo ana i Yona. Siko da ndatoʼo i Kepa.” (Kepa siwia pai Peturu ri basa Yunani, posokinya roka mbatu.)

I Yesu mampeboo i Pilipu pai Natanae 1:43-51

⁴³ Bangke reme ndapakanotomo i Yesu Sira malai njoʼu ri Galilea. Ndapomberataka i Pilipu ndatoʼoka siʼa, “Maʼi lulumo yaku!”

⁴⁴ I Pilipu to Besaida salipu-lipu pai Andaria pai Peturu.

⁴⁵ Napomberataka i mPilipu i Natanae, natoʼoka, “Kami momberatamo pai tau anu natoʼo i Musa ri raya ncura mPadika i mPue Ala, pai anu napowatika waʼa nabi. Sira setu i Yesu ungka Nasare, ana i Yusu.”

⁴⁶ Paikanya mesono i Natanae, natoʼo, “Ara da reʼemo sangaya anu madago da rata ungka ri Nasare?” Mesono i Pilipu natoʼo, “Maʼi peole ngkaliomu.”

⁴⁷ Pangkita i Yesu kajela i Natanae, ndatoʼo, “Peole, setumo to Isaraeli mpuʼu. Bereʼe mbamba ri rayanya.”

⁴⁸ Meoasi i Natanae ri Yesu, natoʼo, “Ewambeʼi ndipaincani yaku?” Mesono i Yesu, ndatoʼo, “Bareʼepa napeboo i mPilipu siko, kukitamo siko memou ri moko ngkaju ara sinjau.”

⁴⁹ Mesono i Natanae, natoʼo, “Guru, Komi Ana mPue Ala! Manoto komi Mokole banca Isaraeli!”

⁵⁰ Ndatoʼo i Yesu, “Siko meaya, podo ua Kupangantoʼo Kukitamo siko memou ri moko ngkaju ara sinjau? Maria ngayapa anu meruu ngkabangke ungka ri nceʼe anu da nukita!”

⁵¹ Ndatoʼo woʼu i Yesu, “Monco Kutoʼoka siko, da nukita yangi teloka, pai waʼa malaʼeka mPue Ala pone panaʼu ri Ana Manusia.”